လွတ်လပ်ခွင့်အတွက် ကိုယ်လက်စွန့်လွှတ်နေရတဲ့ ကရင်နီလူငယ်များ

အနာဂတ်တွင် အိပ်မက်ကိုယ်စီရှိကြသည့် လူငယ်များသည် စစ်တပ်အာဏာသိမ်းပြီးနောက် အများစုမှာ လက်နက်ကိုင်တော်လှန်ရေးသမားများ ဖြစ်လာကြသည်။ ခုခံတော်လှန်မှုများအနက် နိုင်ငံ၏ အရှေ့တောင်ဘက်စွန်းတွင်ရှိသော ကရင်နီပြည်နယ်(ကယားပြည်နယ်)သည် စစ်ကောင်စီကို လက်နက်ကိုင်တော်လှန်ရာတွင် လက်သံအပြောင်ဆုံး ဒေသဖြစ်သည်။ နေပြည်တော်နှင့် နီးကပ်သော ကရင်နီပြည်နယ်ကို စစ်ကောင်စီတပ်က အပြင်းထန်ဆုံး ထိုးစစ်ဆင်နေသည့်ကြားကပင် ပြည်နယ်၏ ထက်ဝက်ကျော်ကို ကရင်နီတော်လှန်ရေးတပ်များက စိုးမိုးထားနိုင်သည်။ နောက်ကွယ်တွင်လည်း ပေးဆပ်ရမှုက ကြီးမားသည်၊ အသက်ပေးလိုက်ရသည့် တော်လှန်ရေးတပ်ဖွဲ့ဝင်များ ရှိသလို တိုက်ပွဲအတွင်း ကိုယ်လက်အင်္ဂါ စွန့်လွှတ်လိုက်ရသူ အများအပြားလည်း ရှိနေသည်။ ထိုသူများအနက် ထိုင်းနိုင်ငံဘက်ခြမ်း တနေရာသို့ လာရောက်ပြီး ဆေးကုသမှုခံယူနေသော ကရင်နီတပ်မတော်(KA)မှ ဒဏ်ရာရတပ်ဖွဲ့ဝင်အချို့နှင့် Myanmar Now က မကြာသေးခင်က တွေ့ဆုံထားသည်။ ဒဏ်ရာသက်သာလျှင် လက်နက်ကိုင်ပြီး တိုက်ပွဲပြန်ဝင်လိုကြောင်း ၎င်းတို့ အားလုံးက ပြောကြသည်။

သတင်း၊ တင်ဆက် – ဟန်သစ်