နာမည်ဆိုးဖြင့် ကျော်ကြားသည့် ပဲခူးတိုင်း၊ သာယာဝတီအကျဉ်းထောင်အတွင်း မေ ၂၁ ရက် ညနေ ၃ နာရီဝန်းကျင်က နိုင်ငံရေးအကျဉ်းသား လူငယ်တစ်ဦး သေဆုံးခဲ့ပြီး စစ်ကောင်စီက မိသားစုကို ရုပ်အလောင်းသင်္ဂြိုဟ်ခွင့်မပေးခဲ့ဟု စုံစမ်းသိရှိရသည်။
သေဆုံးသူမှာ နိုင်ငံတော်အကြည်ညိုပျက်စေမှုဆိုင်ရာရာဇသတ်ကြီးဥပဒေ ပုဒ်မ ၅၀၅-က၊ ရာဇသတ်ကြီးဥပဒေ ပုဒ်မ ၄၃၆ (မီးရှို့မှု) တို့ဖြင့် စစ်ကောင်စီက စွပ်စွဲ၍ ထောင်ဒဏ် ၇ နှစ် ချခံထားရသည့် အသက် ၂၅ နှစ်အရွယ် ကိုပြည့်ဖြိုးဝင်း (ခ) မဲကြီး ဖြစ်သည်။
ကိုပြည့်ဖြိုးဝင်းသည် ၂၀၂၁ ခုနှစ် ဖေဖော်ဝါရီ အာဏာသိမ်းပြီးစ ဆန္ဒပြကြချိန်ကတည်းက ဖမ်းဆီးခံရပြီးနောက် တောင်ဒဂုံမြို့နယ်ရှိ စစ်ခုံရုံးက ထောင်ဒဏ်သတ်မှတ်ကာ ရန်ကုန်မြို့ အင်းစိန်အကျဉ်းထောင်၊ ထိုမှတစ်ဆင့် ၂၀၂၃ ခုနှစ်၊ ဇန်နဝါရီလက သာယာဝတီထောင်သို့ ပြောင်းရွှေ့ ချုပ်နှောင်ခံထားရသူဖြစ်သည်။
“ထောင်ထဲက ရဲဘော်တစ်ယောက်ပို့တဲ့စာမှာ သူဆုံးတဲ့အကြောင်း ပါတယ်။ မိသားစုကိုလည်း အဲဒီနေ့ (မေ ၂၁) ညမှာ ထောင်အာဏာပိုင်တွေက သေပြီလို့ ဆက်သွယ်တယ်” ဟု ကိုပြည့်ဖြိုးဝင်း၏ မိတ်ဆွေ ကိုညိုထွန်းက ပြောသည်။
ကိုညိုထွန်းသည်လည်း စစ်အာဏာသိမ်းမှုကို ဆန့်ကျင်ဆန္ဒပြမှုဖြင့် ထောင်ချခံခဲ့ရသည့် နိုင်ကျဉ်းတစ်ဦးဖြစ်ပြီး ယခုအခါ ပြန်လည်လွတ်မြောက်နေပြီဖြစ်သည်။ ကိုပြည့်ဖြိုးဝင်းနှင့် ကိုညိုထွန်းတို့သည် သာယာဝတီထောင်သို့ မပြောင်းရွှေ့မီအချိန်အထိ အင်းစိန်အကျဉ်းထောင် တရားစခန်းအဆောင်၌ တစ်နှစ်ကျော် အတူချုပ်နှောင်ခံရဖူးသည်။
ကိုပြည့်ဖြိုးဝင်းသေဆုံးရခြင်းမှာ အဆုတ်ထဲသို့ ပိုးဝင်၍ဖြစ်သည်ဟု ထောင်အာဏာပိုင်များက အကြောင်းပြပြီး မိသားစုကို အလောင်းပြန်မပေးဟု သာယာဝတီထောင်နှင့် နီးစပ်သူ သတင်းရင်းမြစ်နှစ်ဦးကလည်း ပြောသည်။
အတူချုပ်နှောင်ခံထားရရာမှ မေ ၃ ရက်ကမှ သာယာဝတီထောင်မှ ပြန်လွတ်လာသူ အမည်မဖော်လိုသည့် နိုင်ကျဉ်း အမျိုးသားတစ်ဦး၏ အဆိုအရ ကိုပြည့်ဖြိုးဝင်းသည် ကျန်းမာရေးလိုက်စားသူဖြစ်ပြီး ရောဂါသည်တစ်ဦးမဟုတ်ဟု သိရသည်။
“ထောင်အာဏာပိုင်တွေက ဘယ်လိုပဲ ရောဂါနဲ့ သေတယ်ပြောပြော နှစ်ပတ်လောက်ပဲ ရှိသေးတယ်ဗျာ တွေ့ခဲ့တာ။ သန်သန်မာမာကြီး ဘာရောဂါမှ မရှိတဲ့ လူငယ်တစ်ယောက် ဒီလောက်မြန်မြန်သေစရာ ဘာအကြောင်းမှ မရှိဘူး။ ပြီးတော့ သူတို့ရိုးသားရင် Dead body (အလောင်း) ကို မိသားစုထံ ပြန်အပ်လေ။ ခုက မိသားစုကိုလည်း မအပ်ဘူး”။
ကိုပြည့်ဖြိုးဝင်း၏ မိသားစုထံ မေးမြန်းနိုင်ခြင်းမရှိသေး၍ အသေးစိတ်အခြေအနေများကို ထုတ်ဖော်ရေးသားနိုင်ခြင်း မရှိသေးပေ။ ထိုအကြောင်းနှင့် ပတ်သက်၍ စစ်ကောင်စီက နှုတ်ဆိတ်နေသည်။
ယခု မေလအတွင်း၌ပင် ပဲခူးတိုင်း၊ ဒိုက်ဦးထောင်မှ ထောင်ကျ နိုင်ငံရေးအကျဉ်းသား ၁၅ ဦး၊ မန္တလေးတိုင်း မြင်းခြံအကျဉ်းထောင်မှ ၁၂ ဦးတို့ကို စစ်ကောင်စီက အကျဉ်းထောင်အတွင်းမှ အစုလိုက်အပြုံလိုက် ခေါ်ထုတ်ကာ စစ်ဆေးမေးမြန်းမှုများရှိနေကြောင်း Myanmar Now က သတင်းဖော်ပြထားပြီးဖြစ်သည်။
ဒိုက်ဦးထောင်ထဲမှ ခေါ်ထုတ်ခံရသူ ၁၅ ဦးတွင် ပဲခူးမြို့ပြည်သူ့ကာကွယ်ရေးတပ်ဖွဲ့မှ လေ့ကျင့်စုဆောင်းရေးတာဝန်ခံ ကိုသန့်ဇင်ဝင်း ပါဝင်ပြီး မေ ၂၆ က သေဆုံးသွားကြောင်း ပဲခူးမြို့နယ်ပြည်သူ့ကာကွယ်ရေးအဖွဲ့က ယမန်နေ့ (မေ ၂၇) တွင် သတင်းထုတ်ပြန်ထားသည်။
သာယာဝတီထောင်တွင်လည်း မေလအတွင်း နိုင်ငံရေးအကျဉ်းသား ၉ ဦး ခေါ်ထုတ်စစ်ဆေးခံနေရပြီး ထိုအထဲတွင် သေဆုံးသူ ကိုပြည့်ဖြိုးဝင်းလည်း ပါဝင်သည်ဟု ထောင်နှင့် နီးစပ်သူ နိုင်ငံရေးအကျဉ်းသား လူငယ်တချို့က ပြောသည်။ သို့သော် ထိုအချက်ကို အတည်မပြုနိုင်ပါ။
“လက်လွန်ခြေလွန်ဖြစ်ပြီး ဆုံးသွားတယ်လို့ ယူဆတယ်။ ဒါကလည်း မဆန်းပါဘူး။ လူတစ်ယောက်ကို လုပ်ဖို့ (သတ်ဖို့) က သူတို့အတွက် ဘောပင်တစ်ချောင်းနဲ့ စာရွက်တစ်ရွက်ပဲ လိုတယ်ဆိုတာ ထောင်အာဏာပိုင်တွေ ပြောခဲ့တာရှိတယ်” ဟု ကိုညိုထွန်းက ပြောသည်။
အာဏာသိမ်းပြီး နှစ်နှစ်ကျော်အတွင်း ဆန္ဒပြလျှင်ပင် သေနတ်ဖြင့် ပစ်နေသည့် စစ်ကောင်စီလက်ထဲတွင် ဖမ်းဆီးခံရပြီးနောက် သေဆုံးသည့် ဖြစ်စဉ်များစွာ ပေါ်ပေါက်နေသည်။ ထို့ပြင် နိုင်ငံတစ်ဝန်း အကျဉ်းထောင်များအားလုံးတွင် ချုပ်နှောင်ခံထားရသူများ မိသားစုနှင့် တွေ့ဆုံခွင့်ကို စစ်ကောင်စီက ယနေ့တိုင် ပိတ်ပင်ကာ ထောင်တွင်းဖိနှိပ်မှုများကို သတင်းအမှောင်ချထားဆဲဖြစ်သည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
