ဗိုလ်ချုပ်ထွန်းမြတ်နိုင်၏ ဇနီးနှင့်ကလေးနှစ်ဦးကို ထိုင်းရဲက ဖမ်းဆီးထားပြီး မြန်မာနိုင်ငံသို့ လွှဲပို့ရန် စီစဉ်နေ

ရက္ခိုင့်တပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင်၏ ဇနီး မနှင်းဇာဖြူနှင့် ကလေးနှစ်ဦးကို ထိုင်းနိုင်ငံရဲတပ်ဖွဲ့က ဖမ်းဆီးလိုက်ပြီး လက်ရှိတွင် မြန်မာနိုင်ငံသို့ လွှဲပြောင်း ပေးရန် ပြင်ဆင်နေသည်ဟု Myanmar Now က သတင်းရရှိသည်။

ယမန်နေ့ (နိုင်ဝင်ဘာ ၅) ရက်က ဗိုလ်ချုပ်ထွန်းမြတ်နိုင်၏ ၁၁ နှစ်အရွယ်သမီး၊ စောပြည့်သျှင်အတွက် ဗီဇာ သက်တမ်းတိုးရန် မိသားစုလိုက် သွားရောက်သည့်အချိန်တွင် ထိုင်းနိုင်ငံရဲတပ်ဖွဲ့က ဖမ်းဆီးလိုက်ခြင်းဖြစ်သည်ဟု အမည်မဖော်လိုသူ သတင်းရင်းမြစ်က ဆိုသည်။

“မနေ့က ညနေ ၃ နာရီလောက်မှာ ဖမ်းခံရတာ၊ ဒီနေ့ ချင်းမိုင်ကနေ (တာချီလိတ်နှင့်ကပ်လျက်) မယ်ဆိုင်ဘက်ကို ဟယ်လီကော်ပတာနဲ့ ခေါ်သွားတယ်” ဟု သတင်းရင်းမြစ်က ပြောသည်။

ဖမ်းဆီးခံရသည့်အထဲတွင် ပါဝင်သည့် ဗိုလ်ချုပ်ထွန်းမြတ်နိုင်၏ သားငယ် မြတ်လင်းဇံမှာ အသက် ၁ နှစ်သာ ရှိသေးသည်။

တစ်ဖက်တွင်လည်း ၎င်း၏ ညီမ မယမင်းမြတ်နှင့် ယောက်ဖဖြစ်သူ ကိုကျော်နိုင်တို့ အောက်တိုဘာလက ထိုင်းနိုင်ငံ၊ ချင်းမိုင်မြို့မှ ပြန်လာစဉ် ရန်ကုန်လေဆိပ်တွင် ဖမ်းဆီးခံခဲ့ရပြီး ယခုအခါ မရမ်းကုန်း တရားရုံးတွင် အကြမ်းဖက်မှုတိုက်ဖျက်ရေး ဥပဒေဖြင့် တရားစွဲဆိုခံထားရသည်။

• AA စစ်ဦးစီးချုပ်၏ ညီမနှင့် ယောက်ဖတို့ကို အကြမ်းဖက်မှုတိုက်ဖျက်ရေးဥပဒေနှင့် တရားစွဲမှု တရားရုံး လက်ခံ
• AA စစ်ဦးစီးချုပ်၏ ညီမနှင့်ယောက်ဖတို့ကို ဒုတိယအကြိမ် ရမန်ယူ