ဖုယွင် ဆန္ဒပြအလုပ်သမားများနှင့် အလုပ်ရှင်တို့ ယနေ့ညှိနှိုင်းရာတွင်လည်း အဆင်မပြေခဲ့

ရန်ကုန် — ယမန်နေ့က အမည်မသိသူများ၏ ရိုက်နှက်ခံရမှုဖြစ်ပွားခဲ့သော ဒဂုံမြို့သစ် (ဆိပ်ကမ်း)မြို့နယ်ရှိ တရုတ်လုပ်ငန်းရှင်ပိုင် ဖုယွင်အထည်ချုပ်စက်ရုံ ဆန္ဒပြအလုပ်သမားများနှင့် အလုပ်ရှင်တို့ ယနေ့တွင် ထပ်မံညှိနှိုင်းခဲ့သော်လည်း ပြေလည်မှုမရရှိသေးဘဲ နှစ်ဖက်အပြန်အလှန် အမှုဖွင့်ထားကြသည်။

ဆန္ဒပြအလုပ်သမားများဘက်က အစဉ်တစိုက်တောင်းဆိုနေသည့် အလုပ်ထုတ်ခံရသည့် အလုပ်သမား ၃၀ ကို ပြန်လည်ခန့်ထားရေး ကိစ္စတွင် အလုပ်ရှင်ဘက်က လုံးဝလက်မခံနိုင်သည့်အတွက် ပြေလည်မှုမရရှိခဲ့ဟု ဖုယွင်အထည်ချုပ် အလုပ်သမားသမဂ္ဂ ဥက္ကဋ္ဌ မသက်ထားဆွေက ပြောသည်။

ယနေ့နေ့လယ်ပိုင်း၌ ဒဂုံမြို့သစ်(ဆိပ်ကမ်း)မြို့နယ် အထွေထွေအုပ်ချုပ်ရေး ဦးစီးဌာနရုံးတွင် ဆန္ဒပြ အလုပ်သမားများ၏ ကိုယ်စားလှယ်များ၊ အလုပ်ရှင်ကိုယ်စားလှယ်များ၊ အလုပ်သမားဦးစီးဌာနမှ တာဝန်ရှိသူများ၊ လွှတ်တော်ကိုယ်စားလှယ်များနှင့် တွေ့ဆုံဆွေးနွေးခဲ့ခြင်းဖြစ်သည်။

အလုပ်ထုတ်ခံခဲ့ရသည့် အလုပ်သမား အယောက် ၃၀ ကိုပြန်ခန့်ပေးရေးကိစ္စတွင် အလုပ်ရှင်ဘက်က လုံးဝ ငြင်းဆန်နေသဖြင့် သပိတ်ဆက်မှောက်သွားမည်ဟု မသက်ထားဆွေက ပြောသည်။

“အဲဒီအတွက် ကျွန်မတို့ကတော့ ကျွန်မတို့တောင်းဆိုတာ မရမချင်း ဒီသပိတ်တိုက်ပွဲက ဆက်ရှိနေမှာပဲ။ နောင်ဘယ်လောက် ရက်ရှည်ကြာဦးမလဲဆိုတာ တာဝန်ရှိသူတွေ၊ ညှိနှိုင်းပေးသူတွေပေါ် မူတည်တယ်။ သူတို့က ပြတ်ပြတ်သားသား လုပ်ပေးမယ်ဆိုရင်တော့ မြန်မြန်ပြေလည်သွားမှာပေါ့” ဟု ၎င်းက ဆိုသည်။

ယနေ့ဆွေးနွေးပွဲတွင် ဆန္ဒပြအလုပ်သမားများအနေဖြင့် တစ်ဖက်စောင်းနင်း တောင်းဆိုချက်များဖြစ်သောကြောင့် အလုပ်ရှင်အနေဖြင့် လိုက်လျောပေးရန် အဆင်မပြေခဲ့ကြောင်း ဖုယွင်အထည်ချုပ်စက်ရုံ၏ မန်နေဂျာ ဦးသိန်းဆွေက Myanmar Now ကို ပြောသည်။

ယခု မိမိတို့စက်ရုံမှ အလုပ်ထုတ်လိုက်ရသည်ဆိုသည့် အလုပ်သမား ၃၀ သည် ယခင်ကတည်းက စက်ရုံ စည်းကမ်းများကို အကြိမ်ကြိမ်ချိုးဖောက်ခဲ့ပြီး သတိပေးစာထုတ်ရာတွင်လည်း လက်မှတ်ရေးထိုးရသည့် စည်းကမ်းချက်ကို မလိုက်ကြသည့်သူများဖြစ်သောကြောင့် အလုပ်ပြန်ခန့်ရန် လုံးဝမဖြစ်နိုင်ဟု ၎င်းက ဆက်ပြောသည်။

“သူတို့က အလုပ်ပြန်ခန့်ရေးကိုပဲ ဦးတည်ပြီး ညှိနေကြတယ်။ သူတို့တောင်းတဲ့အချက်တွေမှာ အဲဒီအချက်က အဓိကပဲ။ အလုပ်ရှင်ဘက်က စည်းကမ်းလုံးဝမလိုက်နာခဲ့တဲ့သူကို ဘယ်လိုလုပ် ပြန်ခန့်နိုင်မလဲ။ စံချိန်တောင်းတယ်ဗျာ။ ပေးချင်မှပေးတယ်။ သတိပေးစာမှာ လက်မှတ်ထိုးခိုင်းတယ်ဗျာ။ မထိုးဘူး၊ ‘တိုင်ချင်ရာတိုင်’ လုပ်တယ်ဗျာ။ အဲ့ဒီတော့ ကျွန်တော်တို့က လုပ်ငန်းခွင်ကို ဒီလိုလူတွေနဲ့ ဘယ်လိုစီမံခန့်ခွဲ ရမလဲ။ ကျွန်တော်တို့က အလုပ်သမားဥပဒေပါ ခံစားခွင့်တွေကို ပေးမယ်လို့ အတိအလင်းပြောပြီးသားပါ။ သူတို့ဘာသာ လာမယူကြတာ” ဟု ၎င်းက ဆိုသည်။

အားလုံးပြေလည်အောင် ညှိနှိုင်းသင့်

စက်ရုံ၏ ဝင်ပေါက်ထွက်ပေါက်များကို ပိတ်ဆို့ကာ ဆန္ဒထုတ်ဖော်နေမှုကြောင့် အလုပ်ခွင်ဝင်ကြမည့် အလုပ်သမား ၁၀၀၀ နီးပါးအတွက် စက်ရုံအနောက်ဘက်မှ ခြံစည်းရိုးအုတ်နံရံကို ဖြိုချကာ ဖောက်ထားသည့် အပေါက်တွင် ဆန္ဒပြ အလုပ်သမားများက သွားရောက်ကာ အလုပ်ခွင်ဝင်ကြမည့် အလုပ်သမားများကို ယမန်နေ့က စည်းရုံးဟောပြောခဲ့သည်။

ထို့သို့ဟောပြောနေစဉ် အလုပ်ရှင်က လုံခြုံရေးဟုဆိုပြီး ခေါ်ဆိုထားသူများက ဆန္ဒပြ အလုပ်သမားများကို တုတ်များ၊ လေးခွများဖြင့် ရိုက်နှက်ပစ်ခတ်သည့်အတွက် ဆန္ဒပြအလုပ်သမားများဘက်မှ ၂၅ ဦးခန့် ထိခိုက်ဒဏ်ရာရခဲ့ကြောင်း၊ ခုနစ်ဦးမှာ ယနေ့အထိ သင်္ဃန်းကျွန်း စံပြဆေးရုံတွင် ဆေးကုသ ခံယူနေရဆဲဖြစ်ကြောင်း ဆန္ဒပြအလုပ်သမားများက ပြောကြားခဲ့သည်။ ထိုသို့ ရိုက်နှက်သူများကို “ကြေးစားလူမိုက်” များဟု အရိုက်ခံရသူများက သုံးနှုန်းသည်။

ထိုသို့ ဖြိုခွင်းခဲ့သည်ကို မခံမရပ်နိုင်ဖြစ်သော ဆန္ဒပြအလုပ်သမားများ၏ မိသားစုဝင်များ၊ ရပ်ကွက်နေပြည်သူများက စက်ရုံဘက်မှ ပါဝင်သူများကိုရော၊ စက်ရုံဝင်းအတွင်းသို့ပါ အုတ်ခဲများဖြင့် ပြန်လည်ပစ်ပေါက်ခဲ့ရာ စက်ရုံဘက်မှ ပါဝင်သူတချို့လည်း ထိခိုက်ဒဏ်ရာရပြီး ယမန်နေ့က ရန်ကုန်ပြည်သူ့ဆေးရုံကြီးတွင် ပြင်ပလူနာအဖြစ် ကုသမှုခံယူခဲ့ရသည်။

ရန်ကုန်တိုင်းရဲတပ်ဖွဲ့၏ ထုတ်ပြန်ချက်တွင် အလုပ်ဆင်းကြသည့် လုပ်ငန်းခွင်ဝင် အလုပ်သမားများနှင့် ဆန္ဒပြ အလုပ်သမားတို့ ခိုက်ရန်ဖြစ်ပွားခဲ့သည်ဟုသာ ထုတ်ပြန်ခဲ့ပြီး ဆန္ဒပြအလုပ်သမားများက စွပ်စွဲသည့် “ကြေးစားလူမိုက်များ”ဆိုသည်အချက်ကို မဖော်ပြခဲ့ပေ။

ယမန်နေ့ ညနေပိုင်း အလုပ်ဆင်းချိန်တွင် လုပ်ငန်းခွင်ဝင် အလုပ်သမားများထဲတွင် မနက်ပိုင်းက အကြမ်းဖက်ခဲ့ကြသူများ ပါဝင်နေသည်ဟုဆိုပြီး ရပ်ကွက်နေပြည်သူအများက ရဲတပ်ဖွဲ့လုံခြုံရေး အတားအဆီးများထဲသို့ အတင်းဝင်ရောက်ခဲ့ကြသဖြင့် ရပ်ကွက်နေ ပြည်သူသုံးဦး အဖမ်းခံထားရသည်။

ဒဂုံမြို့သစ်(ဆိပ်ကမ်း) မြို့နယ် ရဲစခန်း စခန်းမှူး ဒုရဲမှူးကျော်ဝင်းမောင်က အထက်အဆင့်ဆင့်ကို တင်ပြထားသည့်အတွက် အသေးစိတ်အချက်အလက်များအားလုံးကို လတ်တလော မဖြေကြား နိုင်သေးကြောင်း Myanmar Now ကို ပြောသည်။

ယနေ့အထိ အခင်းအဖြစ်အပျက်များနှင့် ပတ်သက်ပြီး စက်ရုံဘက်ကလည်း ဒဂုံမြို့သစ်(ဆိပ်ကမ်း)မြို့နယ် ရဲစခန်းတွင် စက်ရုံတွင်းသို့ ဝင်ရောက်စီးနင်းမှု၊ အနောက်ဘက်တံခါးကို ပိတ်ဆို့မှု၊ အေးချမ်းစွာလုပ်ကိုင်ကြမည့် အလုပ်သမားများကို တားဆီးပိတ်ပင်မှုတို့ဖြင့် တိုင်ချက်ဖွင့်ထားသလို ဆန္ဒပြအလုပ်သမားများဘက်ကလည်း အကြမ်းဖက်ရိုက်နှက်ခံရမှုများကို တိုင်ချက်ဖွင့်ထားသည်။

“အကြမ်းဖက်ဖို့ စက်ရုံက လူမိုက်တွေငှားထားတယ်လို့ သူတို့က ပြောရအောင် စက်ရုံဘက်ကို ပြန်အကြမ်းဖက် တဲ့ဟာမှာ သူတို့ဆန္ဒပြနေကြတဲ့သူတွေနဲ့ သူတို့မိသားစုဝင်တွေ မဟုတ်ဘူးလား။ အဲဒီလိုပဲပေါ့။ သူတို့က ဟိုးအရင် ဆန္ဒပြကတည်းက အဲဒီလူတွေက ဒီမှာလာစောင့်နေခဲ့ကြတာပဲလေ” ဟု စက်ရုံမန်နေဂျာ ဦးသိန်းဆွေက ပြန်လည်တုံ့ပြန်သည်။

ယခုလို ရက်ရှည် ဆန္ဒပြမှုတွင် သက်ဆိုင်ရာတာဝန်ရှိသူများအနေဖြင့် မည်သည့်ကိစ္စကြောင့် မပြေလည်ရသေးသည်ကို အများပြည်သူများသိရန် ချပြရှင်းလင်းရမည်ဖြစ်ကြောင်း၊ ပြည်သူအများက မသိရှိသည့်အခါ အခုလို ရုန်းရင်းဆန်ခတ်မှုဖြစ်စဉ် ဖြစ်ပေါ်လာကြရသည့် အခြေအနေသို့ ဆိုက်ရောက် လာခဲ့ရကြောင်း ရန်ကုန်တိုင်းဒေသကြီး တိုင်းဒေသကြီးလွှတ်တော် လူမှုရေးရာကော်မတီဝင် တောင်ဒဂုံ မဲဆန္ဒနယ် တိုင်းဒေသကြီး လွှတ်တော်ကိုယ်စားလှယ် ဦးညီညီက သုံးသပ်သည်။

ယခုဖြစ်စဉ်တွင် မည်သူကမှားသည်၊ အပြစ်မဲ့သည်ဆိုသည့်အခြေအနေထက် သွေးထွက်သံယိုဖြစ်ခဲ့သည်က ကောင်းမွန်သည့်အနေအထားမျိုးမဟုတ်သည့်အပြင် သက်ဆိုင်ရာ ဖျန်ဖြေရေးအဖွဲ့များ၊ ဌာနဆိုင်ရာများ၊ အလုပ်ရှင်နှင့် ဆန္ဒပြအလုပ်သမားများအနေဖြင့် အတူတကွ ပူးပေါင်းကာ အဖြေရသည်အထိ ဆွေးနွေးညှိနှိုင်း သင့်ကြောင်း ၎င်းက ဆက်ပြောသည်။

“ဘယ်အချက်က မပြေလည်တာလဲဆိုတာကို ပြည်သူတွေသိအောင် သက်ဆိုင်ရာတွေက ချပြရမယ်။ အခု ပြည်သူက မသိကြတော့ စက်ရုံဘက်နဲ့ ရဲဘက်ကို စိတ်ဆိုးကြတာပေါ့။ ခပ်ရှင်းရှင်းပြောရရင် အားလုံးပူးပေါင်းပြီး အဖြေရှာသင့်ပြီ။ အဖြေရှာတာနဲ့အတူ ထွက်လာတဲ့ ရလဒ်ကိုလည်း လူထုသိအောင် မီဒီယာကနေ ချပြသင့်ပြီ။ မနေ့က ဝင်ရိုက်ကြတဲ့ သူတွေ ဘယ်သူတွေလဲ၊ ဘာ့ကြောင့် ဒီလိုအထိ ဖြစ်ခဲ့ရတာလဲကို သက်ဆိုင်ရာတွေ အနေနဲ့ တိတိကျကျ ပြောဖို့လိုတယ်” ဟု ၎င်းက ဆိုသည်။