အကြမ်းဖက်မှု တိုက်ဖျက်ရေးဥပဒေနှင့် တရားစွဲဆိုခံထားရသော ရက္ခိုင့်တပ်တော်AA မှ ပြောခွင့်ရအရာရှိ ခိုင်သုခ၏ ယောက်ဖ ဦးမောင်ဖြူသန်းအပါအဝင် ၃ ဦးကို ကျောက်ဖြူခရိုင်တရားရုံးက သက်သေခိုင်လုံမှု မရှိသောကြောင့် ယမန်နေ့က တရားရှင်လွှတ်ပေးလိုက်ကြောင်း ရှေ့နေဦးထိန်လင်းက ယနေ့(အောက်တိုဘာ ၂၂ ရက်) ပြောသည်။
ယခုနှစ် ဇွန်လအတွင်းက အမ်းမြို့နယ်၊ ဓာတ်တော်ရွာအနီးတွင် တပ်မတော်စစ်ယာဉ်တန်း မိုင်းဆွဲတိုက်ခိုက်ခံရပြီးနောက် ဇူလိုင်လ ၇ ရက်တွင် ဓာတ်တော်ရွာသားများဖြစ်သည့် ဦးမောင်ဖြူသန်း၊ ဦးရဲဘော်သူ နှင့် ဦးစံအောင်ကျော်တို့ကို တပ်မတော်နှင့် အမ်းမြို့နယ်ရဲစခန်းတို့က ဖမ်းဆီးခဲ့ခြင်းဖြစ်သည်။
၎င်းတို့ ၃ ဦးကို အမ်းနယ်မြေခံတပ်ရင်း ခမရ ၃၇၃ မှ ဗိုလ်မှူးတင်အောင်လင်းက တရားလိုလုပ်ကာ အကြမ်းဖက်မှု တိုက်ဖျက်ရေးဥပဒေ ပုဒ်မ ၅၀(က)၊ ၅၁(ဂ) တို့ဖြင့် အမ်းမြို့နယ်ရဲစခန်းတွင် အမှုဖွင့်တရားစွဲဆိုခဲ့ခြင်း ဖြစ်သည်ဟု ရှေ့နေဦးထိန်လင်းက ပြောသည်။
၃ လကျော်ကြာ(ရုံးချိန်းပေါင်း ၁၁ ချိန်းခန့်)စစ်ဆေးပြီးနောက် စွဲချက်တင်၊မတင် ဆုံးဖြတ်ရာတွင် သက်သေမခိုင်လုံသည့်အတွက် တရားရှင်လွှတ်ရန် ခရိုင်တရားသူကြီး ဦးခင်မောင်ဌေးက ဆုံးဖြတ်လိုက်ခြင်းဖြစ်ကြောင်း ၎င်းက ဆက်လက်ပြောသည်။
“ တရားလိုသက်သေတွေဘက်က တင်သွင်းတဲ့ သက်သေတွေ၊ အချက်အလက်တွေက ဘာမှ ခိုင်လုံမှုမရှိဘူး၊ ဒီအတွက်ကြောင့်ပဲ လွှတ်လိုက်တာပေါ့ ” ဟု ဦးထိန်လင်းက ပြောသည်။
ဦးမောင်ဖြူသန်းတို့ သုံးဦးလုံး ယနေ့နေ့လယ် ၁၂ နာရီခန့်တွင် ဓာတ်တော်ရွာသို့ ပြန်ရောက်ပြီဖြစ်ကြောင်း အတူလွတ်မြောက်လာသူ ဦးရဲဘော်သူက ပြောသည်။
“ ကျွန်တော်တို့က အစတည်းက အပြစ်မှမရှိတာ လွှတ်ပေးရမှာပေါ့၊ လယ်ပဲလုပ်စားကြတာ တခြားဘာမှမလုပ်ဘူး ” ဟု ဦးရဲဘော်သူက ပြောသည်။
ယင်းအပြင် AA ခေါင်းဆောင် ဗိုလ်ချုပ်ထွန်းမြတ်နိုင်၏ ညီ ကိုအောင်မြတ်ကျော်အပါအဝင် ၈ ဦးကိုလည်း ရဲတပ်ဖွဲ့က အကြမ်းဖက်မှု တိုက်ဖျက်ရေးဥပဒေနှင့် ဖမ်းဆီးကာ ရန်ကုန်မြို့ အနောက်ပိုင်းခရိုင်တရားရုံးတွင် တရားစွဲဆိုထားသည်။
ထို့အပြင် ထိုင်းနိုင်ငံ ချင်းမိုင်မြို့မှ ပြန်လာသည့် ဗိုလ်ချုပ်ထွန်းမြတ်နိုင်၏ ယောက်ဖ ကိုကျော်နိုင်နှင့် ညီမ မမိုးနှင်းဖြူတို့ နှစ်ဦးကိုလည်း အောက်တိုဘာ ၁၉ ရက်နေ့က ရန်ကုန်လေဆိပ်တွင် ရဲတပ်ဖွဲ့မှ ဖမ်းဆီးခဲ့ပြီး မည်သည့်နေရာတွင် ထိန်းသိမ်းထားကြောင်း မသိရသေးပေ။
