ရန်ကုန် – ရန်ကုန်၊ သင်္ဃန်းကျွန်းမြို့နယ်၊ စံပြဆေးရုံရှိ အထူး ဂရုပြု ကုသမှုပေးနေရသော လူနာတွင် H1N1 ရာသီတုပ်ကွေးရောဂါပိုး မတွေ့ရကြောင်း ဆေးရုံအုပ် ဒေါက်တာအောင်ဆန်းမင်းက Myanmar Now ကို ဇူလိုင် ၂၈ တွင် အတည်ပြုပြောကြားသည်။
သို့သော်လည်း အရေးကြီးလူနာတို့ကို ပိုမို အလေးထား စောင့်ရှောက်နေသည်ဟု ဆိုသည်။
“ဒီနေ့မှာ ဆေးစစ်ချက်အဖြေရပါပြီ။ H1N1 မဟုတ်ပါဘူး။ ဒါပေမယ့် ထုံးစံအတိုင်း သူ့ကို ကနေ့ အချိန်အထိတော့ သီးသန့်ခန်းထဲပဲ ဆက်ကုသပေးနေဆဲပါ” ဟု ၎င်းက ဆိုသည်။
စစ်ဆေးတွေ့ရှိချက်မတိုင်ခင်အထိ H1N1 သံသယလူနာအဖြစ် သတ်မှတ်ခံခဲ့ရသည့် ၂၉ နှစ်အရွယ် ကိုယ်ဝန်ဆောင်မိခင်မှာ သင်္ဃန်းကျွန်းမြို့နယ်၊ ရန်အောင်ရပ်ကွက်မှဖြစ်သည်။ ယခုနှစ်ဆန်းပိုင်းက ရန်ကုန်သို့ ပြောင်းရွှေ့လာသူဖြစ်သည်ဟု အိမ်နီးချင်းတို့ထံမှ သိရသည်။
၆ ဦးသေဆုံး
ပြီးခဲ့သည့် ရက်ပိုင်းအတွင်း သင်္ဃန်းကျွန်းစံပြဆေးရုံတွင် ကုသမှုခံယူနေသော ၃၄ နှစ်အရွယ် အမျိုးသားတစ်ဦး၊ ၅ နှစ်အရွယ် မိန်းကလေးတစ်ဦးတို့ ရာသီတုပ်ကွေးကြောင့် သေဆုံးခဲ့ရသည်။
ဇူလိုင် ၁၉ ရက်နေ့မှ ဇူလိုင် ၂၇ ရက်နေ့အထိ H1N1 တစ်နိုင်ငံလုံးအတိုင်းအတာဖြင့် ပြင်းထန်အသက်ရှူလမ်းကြောင်းပိုးဝင် ရောဂါဖြင့် လူနာ ၅ဝ ကို ကုသပေးခဲ့ရာ ထိုအထဲမှ H1N1 ရှိသူ ၃ဝ တွေ့ရှိကြောင်း၊ ကုသမှုခံယူနေသူ ၆ ဦး သေဆုံးခဲ့ကြောင်း ကျန်းမာရေးဌာနက ဇူလိုင် ၂၇ တွင် သတင်းထုတ်ပြန်သည်။
WHO ကို အကူအညီတောင်း
အသက်ရှူလမ်းကြောင်းမှ ကူးစက်တတ်သော ဤရောဂါကို အမျိုးအစား နှစ်မျိုး ခွဲခြားထားသည်ဟု ပြည်သူ့ကျန်းမာရေး ဦးစီးဌာန ဒုတိယ ညွှန်ကြားရေးမှူးချုပ် ဒေါက်တာသန်းထွန်းအောင်က ပြောဆိုကြောင်း ဇူလိုင် ၂၇ ရက်နေ့ထုတ် ကြေးမုံသတင်းစာတွင် ဖော်ပြထားသည်။
“ရိုးရိုးဖျားတယ်၊ နာတယ်၊ ကိုက်ခဲတယ်။ ဒါက အမျိုးအစား မပြင်းထန်တဲ့ဟာ။ ရင်ကျပ်တယ်၊ အသက်ရှူခက်တယ်၊ အဖျားကြီးတယ်၊ ဂနာမငြိမ်ဖြစ်တယ် ဆိုတာက ပြင်းထန်တဲ့အမျိုးအစားပါ” ဟု ဒေါက်တာသန်းထွန်းအောင်က ပြောသည်။
ဆောလျင်စွာ တွေ့ရှိ ကုသပါက ရောဂါပြင်းထန်မှု၊ အသက်သေဆုံးမှုတို့ မဖြစ်ရန် ကာကွယ်နိုင်သည်ဟု သူက ဆက်ပြောသည်။
နိုင်ငံတွင်း ရာသီတုပ်ကွေး ဖြစ်ပွားမှု အခြေအနေကို WHO ခေါ် ကမ္ဘာ့ကျန်းမာရေးအဖွဲ့သို့ ဇူလိုင် ၂၆ ရက်နေ့တွင် အစီရင်ခံစာ ပေးပို့ထားကြောင်း၊ လိုအပ်သည့်အကူအညီပေးရန်လည်း တောင်းခံထားကြောင်း သူက ပြောသည်။
