သတင်း

Eleven တရားစွဲခံရမှုကြောင့် ပါတီပုံရိပ် ထိခိုက်မည်ကို NLD မှ ထင်ရှားသူတချို့ စိုးရိမ်

(ရန်ကုန်) — နိုင်ငံတော် အကြည်ညိုပျက်စေမှုဟု လူသိများသည့် ရာဇသတ်ကြီး ပုဒ်မ ၅ဝ၅ (ခ) ဖြင့် ရန်ကုန်တိုင်းဒေသကြီးအစိုးရက Eleven သတင်းဌာနကို တရားစွဲခဲ့ခြင်းကြောင့် ပါတီ ပုံရိပ် ထိခိုက်မည်ကို NLD ထိပ်ပိုင်းခေါင်းဆောင်တချို့နှင့် လူသိများသည့်လွှတ်တော်အမတ်တချို့က စိုးရိမ်နေကြသည်။

ပါတီ ပြောရေးဆိုခွင့်ရှိသူ ဗဟိုကော်မတီဝင် ဒေါက်တာမျိုးညွန့်က ဦးဖြိုးမင်းသိန်းနှင့် သူ့ဝန်ကြီးများ၏ ဆုံးဖြတ်ချက်သည် ပါတီ၏ သဘောထားနှင့် လုံးဝ မပတ်သက်ဟု Myanmar Now ကို ပြောသည်။

“ကျွန်တော်တို့က အရင်ကတည်းက ပြောပြီးသား၊ မီဒီယာနဲ့ ကျွန်တော်တို့က နှစ်ဖက်လုံး အကျိုးရှိတဲ့ ဆက်ဆံရေးမျိုးကို လိုလားပါတယ်။ အနီးစပ်ဆုံး ပြောရရင် ကျွန်တော့်အပေါ်မှာ တောင် မမှန်မကန် ရေးသားခဲ့ရင်တောင် ကျွန်တော်က လုံးဝ တုံ့ပြန်မှု မလုပ်ခဲ့ပါဘူး” ဟု NLD ပြောခွင့်ရပုဂ္ဂိုလ်က ဆိုသည်။

ရန်ကုန်တိုင်းအစိုးရက Eleven ဂျာနယ်တွင် ပါရှိသော ဆောင်းပါးတစ်ပုဒ်ကြောင့် အယ်ဒီတာချုပ် ကျော်ဇောလင်း၊ တာဝန်ခံအယ်ဒီတာ နရီမင်း၊ သတင်းထောက်ချုပ် ဖြိုးဝေတို့ကို တရားစွဲထားသည်။

တရားစွဲခြင်းနှင့် ပတ်သက်ပြီး Myanmar Now က NLD လွှတ်တော်အမတ် ၂ဝခန့်ကို ယနေ့ သဘောထားတောင်းခံရာ ၎င်းတို့ထဲမှထက်ဝက်က တရားစွဲဆိုမှုကို ကန့်ကွက်ခဲ့ပြီး ကျန်ထက်ဝက်က မှတ်ချက်ပေးရန် ငြင်းဆန်ခဲ့သည်။

NLD ထိပ်ပိုင်းပုဂ္ဂိုလ်တစ်ယောက်ဖြစ်သည့် ဗဟိုကော်မတီဝင် မုံရွာအောင်ရှင်က လတ်တလော ထိပ်တိုက် တွေ့ဆုံမှုကြောင့် စိတ်မသက်မသာဖြစ်ရသည်ဟု ဆိုသည်။ သတင်းဌာနများနှင့် NLD အစိုးရအကြား ဆက်ဆံရေးတွင် မကောင်းသည့် အလားအလာဖြစ်သည်ဟုလည်း သူက ယူဆသည်။

Eleven ရေးသားမှုများကို မကျေနပ်လျှင် စာနယ်ဇင်းကောင်စီမှတစ်ဆင့် ပြဿနာကို ဖြေရှင်းနိုင်သော်လည်း သတင်းထောက်များအား အာမခံ မရသည့် ပုဒ်မဖြင့် အင်းစိန်ထောင်တွင်း ဖမ်းထားခြင်းမှာ ယခင်အစိုးရများကဲ့သို့ လုပ်ဆောင်နေခြင်းဖြစ်သည်ဟု ပြည်သူများ ယူဆမည်ကို စိုးရိမ်ကြောင်း ၎င်းက ဆိုသည်။

“အားလုံးက သဘောထားကြီးရမယ်။ တချို့ကိစ္စတွေကို နားလည်ပေးရမယ်။ သည်းခံပေးရမယ်။ အခုက အဲ့ဒီထက် ကျော်လွန်သွားတော့ ဝမ်းနည်းစရာကောင်းတာပေါ့” ဟု သူက ဆိုသည်။

တိုင်းအစိုးရ သတင်းထုတ်ပြန်ချက်

မြို့သစ်စီမံကိန်းအတွက် ရန်ကုန်တိုင်းဒေသကြီး အစိုးရ တည်ထောင်ထားသည့် အများပိုင်ကုမ္ပဏီတွင် တိုင်းစီမံ/ဘဏ္ဍာဝန်ကြီးက ဝန်ကြီးရာထူးဖြင့် မဟုတ်ဘဲ လူပုဂ္ဂိုလ်အနေဖြင့် ရှယ်ယာ သိန်းနှင့်ချီ ပိုင်ဆိုင်ထားကြောင်း ရေးသားခဲ့သောကြောင့် Eleven ကို တရားစွဲရသည်ဟု ရန်ကုန်တိုင်းအစိုးရက သတင်းထုတ်ပြန်ခဲ့သည်။

အဆိုပါအကြောင်းအရာကို Eleven က ပထမဆုံး ပြောကြားခြင်း မဟုတ်ဘဲ ဂျာနယ်တွင် မရေးသားခင် ရက်အနည်းငယ် အကြာကတည်းက အဆိုပါအကြောင်းကို ရန်ကုန်အမတ်များက လွှတ်တော်ထဲတွင် အပြင်းအထန် ဝေဖန်ခဲ့ကြသည်။

“ဆောင်းပါးကြောင့် ပြောလို့ Eleven က ရေးတဲ့ဆောင်းပါးကို ဖတ်ကြည့်ပြီးသွားပြီ။ ဆောင်းပါးထဲက အချက်အလက် တော်တော် များများက ကိုယ်စားလှယ်တွေ ပြန်ဆွေးနွေးတဲ့အပေါ်မှာ မူတည်ပြီးတော့ ရေးထားတာဖြစ်တယ်။ ဒီဆောင်းပါးကြောင့် ဆိုရင်တော့ မဖြစ်သင့်ဘူး” ဟု ရန်ကုန်လွှတ်တော်အမတ် ဦးနေမျိုးကျော်က ဆိုသည်။

သတင်းဆောင်းပါးအတွက် မကျေလည်ပါက နာမည်ဆိုးဖြင့် ကျော်ကြားသည့် နိုင်ငံတော်အကြည်ညိုပျက်စေမှု ပုဒ်မဖြင့် တရားစွဲခြင်းထက် အခြားနည်းလမ်းသုံးသင့်သည်ဟု ၎င်းက ဆိုသည်။ အဆိုပါပြဿနာကြောင့် ပါတီပုံရိပ် ထိခိုက်လာမည်ကိုလည်း သူက စိုးရိမ်နေသည်။

“ကိုယ် တစ်ခုခုလုပ်မယ်ဆိုရင် ပါတီကို ထိခိုက်နိုင်လား၊ စနစ်ကို ထိခိုက်နိုင်လား စဉ်းစားဖို့လိုတယ်။ အဲလိုမဟုတ်ဘဲ လုပ်ချင်စိတ်တစ်ခုတည်းနဲ့ လုပ်လိုက်ရင်တော့ ဒီမိုကရေစီကို ထိခိုက်တာတွေ၊ ပါတီပုံရိပ်ကို ထိခိုက်တာတွေ အများကြီး ဖြစ်လာနိုင်တယ်” ဟု ဘလော်ဂါနေဘုန်းလတ်အဖြစ်လည်း ထင်ရှားသည့် ဦးနေမျိုးကျော်က ပြောသည်။

နောက်ထပ်လူသိများသည့် ရန်ကုန်လွှတ်တော်အမတ် ဒေါ်စန္ဒာမင်းကလည်း တိုင်းအစိုးရထံမှ ရလာသည့် အစီရင်ခံစာကို အခြေခံပြီး လွှတ်တော်တွင် ဆွေးနွေးသည့်အချိန်တွင် တိုင်းအစိုးရက ပြန်ဖြေရှင်းရန် အခွင့်အရေးရှိခဲ့သော်လည်း မဖြေရှင်းခဲ့ဟု ဆိုသည်။

“(လွှတ်တော်တွင်း) ဆွေးနွေးချက်အပေါ်မှာ မူတည်ပြီးတော့ ပြင်ပမီဒီယာတွေက ဆွေးနွေးခြင်း၊ ထောက်ပြခြင်းတွေ လုပ်ကြတာပါ။ ဒါကြောင့် အချက်အလက်တွေဟာလည်း မှားယွင်းမှု မရှိဘူးလို့ ကျွန်မက ပြောတာပါ။ မှားယွင်းမှုတွေ မရှိပါဘူး” ဟု သူက ဆိုသည်။

ပါတီပုံရိပ်

ယခု တရားစွဲဆိုမှုသည် ပါတီခေါင်းဆောင်လည်းဖြစ်၊ အစိုးရအဖွဲ့ ထိပ်တန်း တာဝန်ရှိသူလည်းဖြစ်သော ဒေါ်အောင်ဆန်းစုကြည် ပြည်ပထွက်ပြီး မြန်မာပြည်တွင်းရေး အခြေအနေ ရှင်းလင်း တင်ပြနေချိန်နှင့်လည်း တိုက်ဆိုင်နေသည်။

လူသိများသည့် ဟစ်ဟော့အဆိုတော်ဘဝမှ ပြည်သူ့လွှတ်တော်အမတ်ဖြစ်လာသည့် ဦးဖြိုးဇေယျာသော်က တရားစွဲဆိုရေးလမ်းကြောင်းကို နောက်ဆုံးအဆင့်မှ ရွေးချယ်သင့်သည်ဟု ဆိုသည်။ Eleven ကို ဤရေးသားမှုအတွက် တရားစွဲမှုကြောင့် သတင်းမီဒီယာနှင့် NLD ဆက်ဆံရေး ပျက်စီးမည်မဟုတ်ဟုလည်း သူက မျှော်လင့်နေသည်။

“ကျွန်တော်တို့တွေနဲ့ သတင်းမီဒီယာတွေအနေနဲ့က ကောင်းမွန်တဲ့ဆက်ဆံရေးရှိတယ်လို့ ယူဆတဲ့အတွက် ဒီကိစ္စကြောင့်တော့ အဖုအထစ်အငေါ့ ဖြစ်လာလိမ့်မယ်လို့ မယူဆပါဘူး” လို့သူကပြောသည်။

လတ်တလော ထိပ်တိုက်တွေ့မှုကြောင့် ပါတီပုံရိပ်ကို ထိခိုက်ကြောင်း ဝေဖန်သူ နောက်တစ်ဦးမှာ ကချင်ပြည်နယ်မှ ဒီချုပ် အမျိုးသားလွှတ်တော်အမတ်တစ်ဦးဖြစ်သည့် ဦးခင်မောင်မြင့် ခေါ် ဦးချို ဖြစ်သည်။

“သူတို့လုပ်ရပ်က ပါတီ image (ပုံရိပ်) တော့ ကျတာပေါ့။ ရေးချင်တာရေးလေ ကိုယ်က မှန်နေရင်ပြီးတာပဲ။ မှားတာလည်း ရေးမှာပဲ၊ မှန်တာလည်း ရေးမှာပဲ။ အဲ့ဒီမှာ တို့က ခံနိုင်ရည်ရှိဖို့ လိုတယ်” ဟု ၎င်းက ဆိုသည်။

အစိုးရကသတင်းဌာနကို တရားစွဲသည့်လုပ်ရပ်ကို မနှစ်သက်သကဲ့သို့ သတင်းဌာနများအနေဖြင့်လည်း ဒီမိုကရေစီ လမ်းကြောင်းကို တိုက်ခိုက်လိုသည့် အရေးအသားများကို ဆင်ခြင်ရန်လိုကြောင်း သူက ထောက်ပြသည်။

Show More

Related Articles

Back to top button