ရုရှား၏ ယူကရိန်းကျူးကျော်စစ်ကို စစ်ကောင်စီ ဘာကြောင့်ထောက်ခံ

အာဏာသိမ်းမြန်မာစစ်တပ်က ရုရှားနိုင်ငံ၏ ယူကရိန်းနိုင်ငံကို ​ကျူးကျော်တိုက်ခိုက်နေသည့် စစ်ပွဲကို ထောက်ခံကြောင်း ထပ်ပြောလိုက်သည့်ပြင် ယူကရိန်းခေါင်းဆောင်နှင့် ပြည်သူများကိုပါ ပြစ်တင်ပြောဆိုလိုက်သည်။

ရုရှား – ယူကရိန်းစစ်ပွဲသည် အချင်းချင်း ရန်သတ်ခိုင်းသည့် အမေရိကန်နှင့် မြောက်အတ္တလန်တိတ်စာချုပ် (NATO) မဟာမိတ်အဖွဲ့၏ အကြံအစည်ဖြစ်ကြောင်း စစ်ကောင်စီက နိုင်ငံပိုင် မြန်မာ့အလင်းသတင်းစာမှနေ၍ ဖေဖော်ဝါရီ ၂၇ တွင် စွပ်စွဲရေးသားသည်။

“မကျေညက်တဲ့ အတိတ်သမိုင်းနှင့်အတူ ယူကရိန်းက ပေးတဲ့ သင်ခန်းစာ” ခေါင်းစဉ်ဖြင့် စာမျက်နှာနှစ်မျက်နှာရှိ ဆောင်းပါးကို ‘မြင့်မြတ်’ ဆိုသော ကလောင်ဝှက်ဖြင့် ရေးသားဖော်ပြခြင်းဖြစ်သည်။​

ယူကရိန်းကို ဝင်ရောက်တိုက်ခိုက်သည့် ရုရှားသမ္မတပူတင်၏လုပ်ရပ်ကို ထောက်ခံကြောင်း စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက တရားဝင်ထုတ်ပြောကြားပြီးနောက် စစ်ကောင်စီထိန်းချုပ်ထားသည့် နိုင်ငံပိုင်သတင်းစာမှနေ၍ ယခုလို ထပ်မံရေးသားခြင်းလည်းဖြစ်သည်။

စစ်ကောင်စီ အာဘော်ဆောင်းပါးတွင် ယူကရိန်းသမ္မတ ဗိုလော့ဒီမာ ဇယ်လန်းစကီးကို အနောက်အုပ်စု၏ ရုပ်သေးရုပ်အဖြစ် ပုံဖော်ပြီး ရုရှားသမ္မတပူတင်ကိုမူ ကိုယ့်ခွန်အားနှင့် စစ်ရေး၊ စီးပွားရေးကို သိုသိုသိပ်သိပ် တည်ဆောက်သည့် အမြော်အမြင်ရှိ ခေါင်းဆောင်အဖြစ် ချီးမွမ်းထားသည်။

ယူကရိန်း – ရုရှားပြဿနာကို ဥပမာထိုးလျက် ခေါင်းဆောင်ညံ့ပြီး ဆင်ခြင်တုံတရား မရှိပါက ပြည်သူများ ခံရပြီး တိုင်းပြည်ပျက်ရကြောင်း ဆောင်းပါးရှင်က ဇောင်းပေးရေးသားထားသည်။ 

“ယူကရိန်းမှာ ဒီလိုဖြစ်ရတာ ပြည်သူများမှာလည်း တာဝန်ရှိတယ်လို့ပြောရင် မမှားပါဘူး။ ဘာကြောင့်လဲဆိုတော့ သူတို့ကိုယ်တိုင် သူတို့ရဲ့ ခေါင်းဆောင်ရွေးချယ်မှု မှားခဲ့လို့ပါပဲ” ဟု ဆောင်းပါးရှင်က ဆိုသည်။

အမျိုးသားဒီမိုကရေစီအဖွဲ့ချုပ် (NLD) ပါတီဥက္ကဋ္ဌ ဒေါ်အောင်ဆန်းစုကြည်ကို အနောက်နိုင်ငံကြီးများ၏ လက်ကိုင်တုတ်တစ်ခုသဖွယ် စွပ်စွဲကာ အစဉ်တစိုက်ပုံဖော်ရေးသားလေ့ရှိသည့် စစ်ကောင်စီက နိုင်ငံပိုင်သတင်းစာမှနေ၍ ယူကရိန်းနိုင်ငံအခြေအနေနှင့် မြန်မာကို ဆက်စပ်ရေးသားခြင်းဖြစ်သည်။ 

“လူ့အခွင့်အရေးနှင့် ဒီမိုကရေစီ စကားလုံးလောက် ပြောတတ်ရင်ကို နိုင်ငံရေးလို့ ထင်ပြီး အလုပ်ဖြစ်နေတဲ့ နိုင်ငံရေးသမားတွေနဲ့ ပြည်သူတွေအတွက်တော့ လူ့အခွင့်အရေး၊ ဒီမိုကရေစီအရေးထက် ကိုယ့်ပြည်သူတွေရဲ့ လုံခြုံရေးနဲ့ နိုင်ငံရဲ့ အင်အား ကိုယ့်ရဲ့အမျိုးသားအကျိုးစီးပွားကသာ ပိုအရေးကြီးပါလားဆိုတာ သဘောပေါက်လောက်ပါတယ်” ဟု ဆောင်းပါးတွင် ဖော်ပြသည်။

စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက ရုရှားသမ္မတပူတင်ကို ကာကွယ်ပြောဆိုပြီး နှစ်ရက်အကြာတွင် ထိုသို့ အကျယ်တဝင့်ရေးသားထားသည့် ဆောင်းပါးထည့်သွင်းဖော်ပြလာခြင်းဖြစ်သည်။

“နံပါတ် ၁ ကတော့ ဒီကိစ္စကတော့ ရုရှားနိုင်ငံအနေနဲ့ နိုင်ငံရဲ့အချုပ်အခြာအာဏာ တည်တံ့ခိုင်မြဲစေဖို့ လုပ်ဆောင်ခဲ့တဲ့ လုပ်သင့်တဲ့ လုပ်ဆောင်ချက်လို့ပဲ မြင်ပါတယ်” ဟု ဗိုလ်ချုပ်ဇော်မင်းထွန်းက VOA သတင်းဌာနကို ပြောဆိုခဲ့သည်။​

“နံပါတ် ၂ အနေနဲ့ကတော့ ရုရှားနိုင်ငံအနေနဲ့ ကမ္ဘာ့ငြိမ်းချမ်းရေးကို ထိန်းညှိထားတဲ့ ကမ္ဘာ့ချိန်ခွင်လျှာ ညီမျှရေးမှာ အင်အားကြီးနိုင်ငံတစ်ခုအဖြစ် ရပ်တည်လျက်ရှိကြောင်း ကမ္ဘာကို ပြသခြင်းမြင်ပါတယ်” 

ရုရှား၏ ကျူးကျော်တိုက်ခိုက်မှုနှင့် ပတ်သက်၍ အာဆီယအဖွဲ့ဝင်နိုင်ငံများအပါအဝင် ကမ္ဘာ့နိုင်ငံအများအပြားက ကျယ်ကျယ်ပြန့်ပြန့် ရှုတ်ချနေချိန်တွင် စစ်ကောင်စီက ရုရှားဘက်က ရပ်တည်ပြောဆိုခြင်းမှာ အံ့ဩဖွယ်ရာတော့ မဟုတ်ပေ။

အနောက်နိုင်ငံများက လက်နက်ရောင်းချမှု ကန့်သတ်ပိတ်ပင်ခြင်းကြောင့် မြန်မာစစ်တပ်အနေဖြင့် ရုရှား၏ စစ်လက်နက်ပစ္စည်းများကို အဓိကအားကိုးနေရသည်။ ရုရှားနိုင်ငံတွင် စစ်ဘက်အရာရှိ ၇,၀၀၀ ကျော် ပညာသင်ကြားနေသည်ဟုလည်း အာဏာသိမ်းခေါင်းဆောင်ကိုယ်တိုင် ထုတ်ဖော်ပြောဆိုဖူးသည်။ 

စစ်ကောင်စီ၏ ရုရှားကို ထောက်ခံမှုမှာ အာဏာရှင်နှစ်ဦးကြား သဘာဝကျသည့် ဆက်နွှယ်မှုဖြစ်ကြောင်း မြန်မာနိုင်ငံဆိုင်ရာ ကုလအထူးကိုယ်စားလှယ် Tom Andrews က တွစ်တာလူမှုကွန်ရက်တွင် ရေးသားသည်။​

“အသွင်တူစရိုက်တူသူတွေ ပေါင်းဖက်တဲ့သဘောပဲ။ ကမ္ဘာကြီးအနေနဲ့ ယူကရိန်းပြည်သူတွေ၊ မြန်မာပြည်သူတွေနဲ့အတူ စကားလုံးအရရော လုပ်ဆောင်ချက်အရရော ရပ်တည်ကြောင်း ပြသရပါမယ်” ဟု Tom Andrews က ဆိုသည်။

ရွေးကော်ပွဲရလဒ်ကို လက်မခံဘဲ ဒေါ်အောင်ဆန်းစုကြည်ဦးဆောင်သည့် NLD အစိုးရကို ဖြတ်ချပြီး စစ်တပ်က အာဏာသိမ်းယူလိုက်သည့် ပြီးခဲ့သည့်နှစ်မှစ၍ စစ်ကောင်စီနှင့် ရုရှားကြား ဆက်သွယ်မှု ပိုမိုပြုလုပ်လာသည်။

စစ်အာဏာမသိမ်းမီတစ်ပတ်အလိုက နေပြည်တော်သို့ လာရောက်ခဲ့သည့် ရုရှားကာကွယ်ရေးဝန်ကြီး၏ ခရီးစဉ်အတွင်း ရုရှား၏ နာမည်ကျော် Pantsir-S1 လေကြောင်းကာကွယ်ရေးဒုံးလက်နက်၊ Orlan-10E စောင့်ကြည့်ရေးဒရုန်းများနှင့် ရေဒါလက်နက်များရောင်းချရန် သဘောတူခဲ့သည်။

အာဏာသိမ်းပြီး ဖေဖော်ဝါရီလအတွင်း မြန်မာစစ်တပ်က အမေရိကန်ဒေါ်လာ ၁၅ သန်းတန် ရုရှားနိုင်ငံထုတ်ရေဒါပစ္စည်းများ ဝယ်ယူတင်သွင်းခဲ့ကြောင်း The Moscow Times သတင်းစာက ပြီးခဲ့သည့်နှစ် ဧပြီလတွင် ရေးသားဖော်ပြသည်။​

မတ်လနှောင်းပိုင်းက ကျင်းပခဲ့သည့် တပ်မတော်နေ့အခမ်းအနားကို တပ်ရောက်ရန် ရုရှား ဒုတိယကာကွယ်ရေးဝန်ကြီး Alexander Vasilyevich Fomin နေပြည်တော်သို့ လာရောက်ခဲ့သည်။ 

၎င်းလာရောက်ချိန်တွင် ဗိုလ်ချုပ်မှူးကြီးမင်းအောင်လှိုင်က အာဏာသိမ်းဆန့်ကျင်သူပြည်သူများက မီးသတ်ဘူးများ၊ တုတ်၊ ဓားများနှင့် ၎င်း၏ ဩဇာခံစစ်တပ်ကို တန်ပြန်နေကြောင်း ထိုပစ္စည်းများကို ခင်းကျင်း၍ ခေါ်ယူပြသခဲ့သည်။ 

အာဏာသိမ်းစစ်ကောင်စီကို အိမ်နီးချင်း အာဏာရှင်နိုင်ငံဖြစ်သည့် တရုတ်နိုင်ငံက ပေါ်ပေါ်ထင်ထင် ထောက်ခံမှု မရှိသော်လည်း ရုရှားကမူ မင်းအောင်လှိုင်ကို ဖိတ်ကြား၍ ဆုတံဆိပ်ပင် ချီးမြှင့်ခဲ့သည်။ 

အရပ်သားပြည်သူများအပေါ် စစ်တပ်၏ အကြမ်းဖက်မှုများ ရပ်တန့်ရန်နှင့် မြန်မာကို လက်နက်တင်ပို့မှု ဖြတ်တောက်ရန် ကုလသမဂ္ဂအထွေထွေညီလာခံက တောင်းဆိုသည့်ဆုံးဖြတ်ချက်ချပြီး ပြီးခဲ့သည့်နှစ် ဇွန် ၂၀ တွင်လည်း အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်သည် ရုရှားကို သီတင်းတစ်ပတ်ကြာ သွားရောက်ခဲ့သည်။​

အာဏာသိမ်းခေါင်းဆောင် ရုရှားသို့ ၇ ကြိမ်မြောက် သွားရောက်ခြင်းဖြစ်ကာ စစ်ကောင်စီအဖွဲ့ဝင် အခြားစစ်ဗိုလ်ချုပ်ကြီးများလည်း ရုရှားနိုင်ငံသို့ မကြာခဏသွားရောက်သည်။​

အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင်အနေဖြင့် ရုရှားနိုင်ငံသို့ အကြိမ်ကြိမ်သွားရောက်ခဲ့သော်လည်း ရုရှားသမ္မတပူတင်နှင့် တစ်ကြိမ်တစ်ခါမျှ တွေ့ဆုံခွင့် မရဖူးချေ။ 

အမျိုးသားညီညွတ်ရေးအစိုးရကမူ ယူကရိန်းအရေးတွင် အချုပ်အခြာအာဏာပိုင်နိုင်ငံတစ်ခုကို ကျူးကျော်တိုက်ခိုက်ခြင်းသည် ကုလသမဂ္ဂ၏ ပဋိညာဉ်ပါ ပြဋ္ဌာန်းချက်များကို ချိုးဖောက်နေပြီး ၂၁ ရာစုကမ္ဘာအတွက် နမူနာကောင်းတစ်ရပ်မဟုတ်ဟု ဖေဖော်ဝါရီ ၂၅ တွင် ထုတ်ပြန်သည်။

ယူကရိန်း၏ နယ်နိမိတ်တည်တံ့ခိုင်မြဲမှု၊ လွတ်လပ်မှုနှင့် အချုပ်အခြာအာဏာတို့ကို လေးစားရန် တောင်းဆိုကြောင်းလည်း ထိုထုတ်ပြန်ချက်တွင် ဖော်ပြထားသည်။ 

ယူကရိန်းသည် မြန်မာစစ်တပ်ကို လက်နက်ရောင်းချသည့် အထောက်အထားများရှိသော်လည်း စစ်အာဏာသိမ်းမှုဆန့်ကျင်သော မြန်မာပြည်သူတို့မှာ ယူကရိန်းပြည်သူများနှင့် စည်းလုံးညီညွတ်မှုကို အသိအမှတ်ပြုထုတ်ဖော်ခဲ့ကြသည်။

“ဒီမိုကရေစီကို ကာကွယ်ရာမှာ ယူကရိန်းစစ်ပွဲက ကျွန်တော်တို့ကို စိတ်အားထက်သန်စေပါတယ်” ဟု တနင်္သာရီတိုင်း ဒီမိုကရေစီအရေးလှုပ်ရှားမှုသပိတ်ကော်မတီအဖွဲ့ဝင် ရေမွန်က စနေနေ့က ပြုလုပ်သည့် ဆန္ဒပြဗီဒီယိုမှတ်တမ်းတစ်ခုတွင် ပြောဆိုထားသည်။ 

ယူကရိန်းပြည်သူများကဲ့သို့ မြန်မာအနေဖြင့် လွတ်လပ်မှုအတွက် စစ်ကောင်စီကို ဆက်အန်တုမည်ဖြစ်ကြောင်း၊ ယူကရိန်း၏ ဖက်စစ်စနစ်ကို ဆန့်ကျင်တိုက်ခိုက်မှုကို ကမ္ဘာက ထောက်ခံရန်လိုကြောင်း ၎င်းက ဆိုသည်။

“ယူကရိန်းစစ်ပွဲမှာ ပူတင်က အောင်နိုင်သွားရင် နေရာတိုင်းမှာရှိတဲ့ ဒီမိုကရေစီရဲ့ ရန်သူတွေနဲ့ အာဏာသိမ်းစစ်ကောင်စီကို အကူအညီပိုပေးသွားပါလိမ့်မယ်” ဟု ၎င်းက ဆိုသည်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်။)