(ရန်ကုန်) – မကြာသေးမီကထုတ်ပြန်ခဲ့သော ရွှေတိဂုံစေတီတော်မှ ရွှေပြားများ၏ အရည်အသွေး စစ်ဆေးမှုရလဒ်ကို သာသနာရေးနှင့် ယဉ်ကျေးမှုဝန်ကြီးဌာနက သံသယရှိကြောင်း ယနေ့ ထုတ်ဖော်ပြောကြားလိုက်ပြီး တိကျသည့်ရလဒ် ထွက်ပေါ်စေရေး စစ်ဆေးနိုင်သည့် ပညာရှင်များ ပူးပေါင်းရန် ဖိတ်ခေါ်လိုက်သည်။
ရွှေစင်ပြား ၄၀၀၀ နီးပါးရှိသည့် စေတီတော်၏ ကြာမှောက်ကြာလန် ဧရိယာမှ ၉ ချပ်ကို စစ်ဆေးသည့်ရလဒ်သည် မူလကပ်လှူစဉ်က ဖော်ပြထားသည့် ရွှေရာခိုင်နှုန်းထက် ပိုမိုနေသည်ဟု အဖြေထွက်ပေါ်ခဲ့ခြင်းကို ဝန်ကြီးဌာနဘက်က ယနေ့တွင် ကြေညာချက်ထုတ်ကာ ထောက်ပြလိုက်သည်။
၂၀၀၉ခုနှစ်က ကပ်လှူခဲ့သည့် အဆိုပါရွှေစင်ပြားများတွင် ရွှေပါဝင်မှု ၉၈ ရာခိုင်နှုန်းဟု ၎င်းတို့ သိရှိခဲ့သော်လည်း ပြီးခဲ့သည့် လပိုင်းက စစ်ဆေးခဲ့သည့် ရလဒ်တွင် ၉၈ ဒသမ ၉၁ ရာခိုင်နှုန်းဟု တွေ့ရှိခြင်းကို ဝန်ကြီးဌာနက ထောက်ပြခဲ့သည်။
“ ၎င်းရွှေစင်ပြားများသည် သဘာဝအရ ရေ၊လေ၊နေ၊မိုး ဒဏ်များ ၉ နှစ်ကြာ ထိတွေ့ခံစားပြီးမှ မူလအရည်အသွေးထက် သာလွန်ကောင်းမွန်နေသည့် ရလဒ်မှာ သတိပြုစဉ်းစားရမည့် အချက်တစ်ချက်ဖြစ်ကြောင်း” ယနေ့တွင် လူမှုကွန်ရက်မှတဆင့် ထုတ်ပြန်သည့် ဝန်ကြီးဌာန၏ကြေညာချက်တွင် ရေးသားထားသည်။
ရွှေပြားများ၏ အရည်အသွေးကို တိကျသည့် ရလဒ်ထွက်လာရန် တတိယအဖွဲ့အစည်း (Third Party) ဖြင့် စစ်ဆေးရန် လိုအပ်ကြောင်းလည်း ထုတ်ပြန်လိုက်ပြီး အစိုးရနှင့် အရပ်ဘက်မှ ပညာရှင်များကိုလည်း ပါဝင်ကူညီရန် ဖိတ်ကြားလိုက်သည်။
စေတီတော်၏ ကြာမှောက်ကြာလန်ဧရိယာသည် ညိုမည်းလာပြီးနောက် အဆိုပါနေရာတွင် ကပ်လှူထားသည့် ရွှေပြားများ၏ အရည်အသွေးနှင့် ပတ်သက်ပြီး ဝေဖန်မှုများခံခဲ့ရသည်။
အဆိုပါရွှေပြားများသည် အရည်အသွေးမပြည့်ခြင်းကြောင့် မည်းညစ်သွားခြင်းဖြစ်ကြောင်း အွန်လိုင်းလူမှုကွန်ရက်တွင် ထင်မြင်ချက်အများအပြား ပေါ်ပေါက်နေရာ ဂေါပကအဖွဲ့က ရွှေပြားတို့၏ အရည်အသွေးသည် ၁၆ ပဲရည် ရှိကြောင်း စက်တင်ဘာလအတွင်းက တုံ့ပြန်ထားသည်။