Myanmar Now ရုပ်သံသတင်းထောက် မကေဇွန်နွေးကို ယနေ့ (ဇွန် ၁၇) ထောင်တွင်း အထူးတရားရုံးတွင် ရုံးထုတ်စစ်ဆေးခဲ့ပြီး တရားလိုပြသက်သေ ထက်ဝက်ခန့် စစ်ဆေးပြီးစီးနေပြီဖြစ်ကြောင်း ၎င်း၏ ရှေ့နေထံမှ သိရသည်။
ယနေ့ (ဇွန် ၁၇) ရုံးချိန်းတွင် ဒုရဲအုပ်တစ်ဦးနှင့် ရှာဖွေသက်သေတစ်ဦး လာရောက်ခဲ့ပြီး စုစုပေါင်း တရားလိုပြသက်သေ ၁၂ ဦးအနက် ၆ ဦးခန့် စစ်ဆေးပြီးစီးပြီဖြစ်ကြောင်း ရှေ့နေ ဒေါ်နီလာခိုင်က ပြောသည်။
ပြီးခဲ့သည့် ဖေဖော်ဝါရီ ၂၇ ၌ ရန်ကုန်၊ စမ်းချောင်းမြို့နယ်၊ မြေနီကုန်းတွင် မကေဇွန်နွေး သတင်းယူနေစဉ် ဖမ်းဆီးခံရပြီး ဆူပူအောင်လှုံ့ဆော်မှု ရာဇသတ်ကြီးပုဒ်မ ၅၀၅-က ဖြင့် အမှုဖွင့်ခံထားရသည်။
လာမည့် ရုံးချိန်းကို ဇူလိုင် ၁ တွင် ပြန်လည်ချိန်းဆိုထားပြီး မကေဇွန်နွေးအနေဖြင့် ကျန်းမာရေး ကောင်းမွန်လျက်ရှိသော်လည်း ကိုဗစ်နိုင်တင်းကူးစက်ရောဂါကို စိုးရိမ်မှုရှိနေကြောင်း ၎င်းရှေ့နေထံမှ သိရသည်။
အမှုကို ရက်ပေါင်း ၁၈၀ အတွင်း အပြီးစစ်မည်ဟု စစ်ကောင်စီက သတ်မှတ်ထားသော်လည်း အကြောင်းအမျိုးမျိုးကြောင့် ကြန့်ကြာနိုင်သည်ဟု ၎င်းရှေ့နေက ဆိုသည်။
“ပုံသေတွက်လို့မရဘူး။ တစ်ခါတလေ သက်သေက မလာတဲ့အခါ ရှိတယ်၊ ရဲသက်သေက မလာနိုင်တာ ရှိတယ်။ တရားသူကြီး အစည်းအဝေးရှိလို့ မလာနိုင်တာတို့။ အဲ့ဒါမျိုးဆိုရင်လည်း အတိုးအလျှော့ ရှိတယ်။ သက်သေတွေက တစ်ချိန်းမှာ ၂ ယောက်စစ်လိုက်လို့ ရက်ပေါင်း ၁၈၀ မတိုင်ခင် ပြီးသွားတာလည်း ဖြစ်နိုင်တယ် ” ဟု ဒေါ်နီလာခိုင်က ပြောသည်။
မကေဇွန်နွေးကို ဧပြီ ၂၈ ရက်မှစ၍ တစ်လကျော်ကြာ မှားယွင်းတိုက်ပိတ်ခံရပြီး လက်ရှိတွင် မူလအချုပ်ဆောင်၌ ချုပ်နှောင်ထားသည်။
ဖေဖော်ဝါရီ ၁ ရက် အာဏာသိမ်းပြီးချိန်မှစ၍ စစ်ကောင်စီက သတင်းထောက်အများအပြားကို ဖမ်းဆီးခဲ့ပြီး Myanmar Now အပါအဝင် သတင်းဌာန ၈ ခုကို သတင်းလုပ်ငန်းလုပ်ကိုင်ခွင့် ရုပ်သိမ်းခဲ့သည်။
နိုင်ငံတကာသတင်းဌာနများဖြစ်သည့် အေပီနှင့် ဘီဘီစီမှ သတင်းထောက်များ၊ Eleven မီဒီယာမှ သတင်းထောက်တစ်ဦး၊ The Hakha Times မှ သတင်းသမားတစ်ဦး၊ အမေရိကန်နိုင်ငံသားဖြစ်သူ ကမာရွတ်ဒီယာအယ်ဒီတာချုပ်တို့ကို ပြန်လွှတ်ပေးခဲ့သည်။
ယနေ့ ဇွန် ၁၇ တွင် Voice of Myanmar အယ်ဒီတာချုပ်နှင့် သတင်းထောက်တို့ကို ပြန်လွှတ်ပေးခဲ့သည်။
နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) ၏ ဇွန်လဆန်းအထိ အချက်အလက်များအရ သတင်းသမား ၅၀ ကျော် အဖမ်းခံထားရဆဲဖြစ်ကြောင်း သိရသည်။
