မန္တလေးတိုင်း ပုသိမ်ကြီးမြို့နယ်ရှိ ဘိလပ်မြေစက်ရုံစီမံကိန်းကို ကန့်ကွက်ခဲ့သည့် အိမ်ထောင်ဦးစီးများ ထောင်ကျနေခြင်းကြောင့် စားဝတ်နေရေးခက်ခဲသည်ဟုဆိုကာ မိသားစုဝင်များက မန္တလေးမြို့တွင်း လှည့်လည်တောင်းရမ်းခြင်းဖြင့် ၄င်းတို့၏ မကျေနပ်ချက်ကို ထုတ်ဖော်လိုက်သည်။
ဘိလပ်မြေစက်ရုံအနီးရှိ အောင်သပြေကျေးရွာမှ ရွာသား ၅ဦး သည် ဘိလပ်မြေစက်ရုံသွားရာလမ်းသည် ရွာသားများပိုင်ဆိုင်သည့် မြေနေရာကို သိမ်းယူပြီး ဖောက်လုပ်ထားခြင်းဖြစ်ကြောင်း ကန့်ကွက်ခဲ့ပြီးနောက် နိုဝင်ဘာ ၂၈ မှစ၍ မတရားတားဆီးကန့်ကွက်မှုဖြင့် အလုပ်မဲ့ထောင်ဒဏ် တစ်လ ကျခံနေရသည်။
“ကျွန်မမှာ ကလေးသုံးယောက်နဲ့ လုပ်ကိုင်စားသောက်လို့ အဆင်မပြေတော့လို့ တောင်းတာပါ။ ကျွန်မမေးချင်ပါတယ်။ ဥပဒေက ကျွန်မတို့ဘက်မှာ ရှိသေးရဲ့လားလို့။ အစိုးရကရော ကျွန်မတို့ဘက်မှာ ရှိသေးရဲ့လားလို့” ဟု ထောင်ကျနေသည့် ရွာသားငါးဦးထဲမှ တစ်ဦးဖြစ်သည့် ကိုထွန်းနိုင်၏ ဇနီး မသင်းသင်းခိုင်က ပြောသည်။
မသင်းသင်းခိုင်အပါအဝင် ထောင်ကျခံနေရသည့် ရွာသားများ၏ မိသားစုဝင်လေးဦးသည် မန္တလေးစျေးချိုတစ်ဝိုက်တွင် မနက်၁ဝနာရီခန့်မှစ၍ လိုက်လံတောင်းရမ်းခြင်းဖြင့် ၄င်းတို့၏ မကျေနပ်ချက်ကို ထုတ်ဖော်ခဲ့ကြခြင်း ဖြစ်သည်။
အဆိုပါစီမံကိန်းသည် ဦးသိန်းစိန်လက်ထက်ကတည်းက ရန်ကုန်အခြေစိုက် “မြင့်ရင်းနှီးမြှုပ်နှံမှုအုပ်စု ကုမ္ပဏီလီမိတက်” ကို လုပ်ပိုင်ခွင့်ပြုခဲ့သည့် အဆိုပါစီမံကိန်းကို ကန့်ကွက်နေကြခြင်း ဖြစ်သည်။
ရွာသားတို့၏ စွပ်စွဲချက်များကို တိုင်းအစိုးရ သယံဇာတနှင့်သဘာဝပတ်ဝန်းကျင် ထိန်းသိမ်းရေးဝန်ကြီးက ငြင်းဆန်ထားပြီး အစိုးရသည် လုပ်ထုံးလုပ်နည်းအတိုင်းသာ လုပ်ခဲ့သည်ဟု Myanmar Now ကို အောက်တိုဘာလအတွင်းက ပြောကြားခဲ့သည်။
