ဧရာဝတီတိုင်းဒေသကြီး၊ လပွတ္တာမြို့နယ်က မုန်တိုင်းရှောင်ပြည်သူတွေကတော့ ဒီကနေ့ မေလ ၁၅ ရက်နေ့ မနက်ပိုင်းမှာ နေရပ်ကို အသီးသီး ပြန်နေကြပါပြီ။ မိုခါမုန်တိုင်းမတိုက်ခင် တစ်ပတ်ခန့် အလိုကတည်းက ပင်လယ်နဲ့ နီးတဲ့ ဒေသခံ ၈၀၀၀ ခန့်ဟာ လပွတ္တာမြို့ပေါ်က ဘုန်းကြီးကျောင်းတွေမှာ လာရောက်တိမ်းရှောင်ကြနေကြတာ ဖြစ်ပါတယ်။ မုန်တိုင်းအရှိန်နဲ့ မိုးကြီးလေကြီးမှုကြောင့် မြစ်ချောင်းဘေးရွာတချို့မှာ နေအိမ်ပျက်စီးမှု ရှိခဲ့ပေမဲ့ လပွတ္တာမြို့နယ်ထဲမှာ ကြီးကြီးမားမားထိခိုက်ခဲ့တာ မရှိဘူးလို့ မြို့ခံလူမှုကူညီရေးအသင်းကနေ သိရပါတယ်။ ၂၀၀၈ ခုနှစ်က တိုက်ခတ်ခဲ့တဲ့ နာဂစ်ဆိုင်ကလုန်းမုန်တိုင်းဒဏ်ကို အပြင်းထန်ဆုံး ခံခဲ့ရဖူးတဲ့ လပွတ္တာဒေသဟာ မိုခါမုန်တိုင်းရဲ့ ဗဟိုချက်မဟုတ်ပေမဲ့ ဒေသခံတွေဟာ ဒီတစ်ကြိမ်မုန်တိုင်းမှာတော့ ကြိုတင်ရှောင်ရှားနိုင်ခဲ့ကြပါတယ်။
