အမျိုးသမီးငယ် လေးဦးအား အဓမ္မပြုကျင့်မှုဖြင့် ရဲကအလိုရှိနေသည့် ပုသိမ်မြို့ရေသိုးကျေးရွာရှိ စိတ္တသုခဘုန်းကြီးကျောင်းထိုင်ဆရာတော်အား အထူးအဖွဲ့ဖြင့် ရဲက ရှာဖွေနေသည်။
လွန်ခဲ့သည့် ၅လကျော် ဧပြီလအတွင်းက အသက်၅၆နှစ်အရွယ် ဦးနန္ဒသီရိသည် သူ၏ကျောင်းတွင် ကျောင်းအိပ်ကျောင်းစား ပညာသင်ကြားနေသည့် အသက် ၁၀နှစ်မှ ၁၄နှစ်အရွယ် ကျောင်းသူလေးဦးအား အဓမ္မပြုကျင့်သည်ဟု စွပ်စွဲခံရပြီးကတည်းက လူမြင်ကွင်းမှ ပျောက်ကွယ်နေခြင်းဖြစ်သည်။
“စီမံချက်တွေချပြီး ဆောင်ရွက်နေတာမို့ မကြာခင် ဖမ်းဆီးနိုင်ပါလိမ့်မယ်” ဟု ဧရာဝတီတိုင်း ဒေသကြီးရဲတပ်ဖွဲ့မှူးရုံးမှ ဒုရဲမှူးကြီးထွန်းရွှေက Myanmar Nowကို ပြောသည်။
အဆိုပါမိန်းကလေးငယ်များသည် ဘုန်းတော်ကြီးကျောင်းနှင့် တစ်မိုင်ခန့်အကွာရှိ ရွာငယ်လေးများတွင် နေထိုင်ကြသူများဖြစ်သည်။
စာသင်ကျောင်းတည်ရှိရာ ရေသိုးကျေးရွာသို့ နေ့စဉ်လာရောက်ရန်အတွက် ဆိုင်ကယ်ကယ်ရီခ မတတ်နိုင်သည့်အတွက် ဦးနန္ဒသီရိ၏ကမ်းလှမ်းမှုဖြင့် စိတ္တသုခဘုန်းကြီးကျောင်းတွင် ကျောင်းအိပ်ကျောင်းစားဖြင့် ထားရှိခဲ့ခြင်းဖြစ်ပြီး ၂၀၁၇ စာသင်နှစ်တစ်နှစ်လုံး ပြုကျင့်ခံခဲ့ရသည်ဟု ကလေးငယ်များက ထွက်ဆိုထားသည်။
ကလေး လေးယောက်၏ မိဘများက ဧပြီလ ၂၆ ရက်နေ့တွင် စတင်အမှုဖွင့်ခဲ့ခြင်းဖြစ်ပြီး ၅ လ ကျော်ကြာမြင့်သည့်တိုင် ထူးခြားမှုမရှိသည့်အတွက် အမှုဖွင့်ထားသည့် သလပ်ခွာနယ်မြေ ရဲစခန်းတွင် အမှုတွဲ ပြန်တောင်းခဲ့သော်လည်း ရဲစခန်းမှ ပေးအပ်ခဲ့ခြင်းမရှိဟု တရားလိုတစ်ဦးဖြစ်သူ မသင်းသင်းကပြောသည်။
“သူတို့လုပ်နေတာတွေ လုံးဝအားမရဘူး၊ မေးလိုက်တိုင်း မိတော့မယ်ပြောနေတာပဲ တကယ်ခံလိုက်ရတာက ကျွန်မတို့လေ ” ဟု မသင်းသင်းကပြောသည်။
စွပ်စွဲခံရသူအား ဦးနန္ဒသီရိ(ခ)ဦးလူလေး(ခ)ဦးခင်မောင်ဦးကို မုဒိမ်းမှု ပုဒ်မ ၃၇၆ ဖြင့် အမှုဖွင့်ထားပြီး တရားခံပြေးအဖြစ် ကြေညာထားကာ ပုသိမ်မြို့နယ်အပါအဝင် မြို့နယ် ၅ ခုခန့်တွင် စုံစမ်းနေသည်ဟု ရဲတပ်ဖွဲ့ကထုတ်သည်။
အမှုကိုလိုက်ပါကူညီဆောင်ရွက်ပေးခဲ့သည့် ရေသိုးကျေးရွာမှ ကျေးရွာလူကြီး ဦးရွှေအေးက ရဲစခန်းသို့ အကြိမ်ကြိမ်သွားရောက်ခဲ့သော်လည်း ထူးခြားမှုမရှိသေးသည့်အကြောင်းသာ ကြားခဲ့ရကြောင်းပြောသည်။
“အစကတည်းက ကူညီနိုင်သလောက် ကူညီပေးတာပဲ မမိသေးဘူးဆိုတော့ ဘာဆက်လုပ်ရမှန်းကို မသိတော့ဘူး ” ဟု ဦးရွှေအေး ကပြောသည်။
ဆက်စပ်ဖတ်ရှုရန် –
မူလတန်းကျောင်းသူ ၄ ဦးကို လိင်မတရားကျင့်မှုဖြင့် ရဲကအလိုရှိနေသည့်ဘုန်းကြီးကိုမမိသေး
