ချင်းပြည်နယ်မြောက်ပိုင်း တီးတိန်မြို့ရှိ ခိုင်ကမ်းနယ်မြေရဲစခန်းကို ယနေ့ (စက်တင်ဘာ ၁၇) နံနက်ပိုင်းတွင် ချင်းဒေသခံကာကွယ်ရေးအဖွဲ့ သုံးဖွဲ့ပေါင်းပြီး တိုက်ခိုက်ခဲ့ရာ ရဲငါးဦးသေဆုံးခဲ့သည်ဟု သိရသည်။
စစ်ကောင်စီတပ်ဖွဲ့ဝင်များကို အာဏာဖီဆန်ရေးလှုပ်ရှားမှု (CDM) တွင် ပါဝင်လာရန် သတိပေးသည့်အနေဖြင့် အင်အား ၂၀ နီးပါးရှိ ထိုရဲစခန်းကို ချင်းကာကွယ်ရေးအဖွဲ့များဖြစ်ကြသော PDF Zoland နှင့် တပ်ရင်း−၂ (CDM အဖွဲ့) တို့နှင့် ပူးပေါင်းတိုက်ခိုက်ခဲ့ခြင်းဖြစ်ကြောင်း ကလေး – ကဘော် – ဂန့်ဂေါ အခြေစိုက် ချင်းဒေသကာကွယ်ရေးအဖွဲ့ (CDF – KKG) က ယနေ့ နံနက်ပိုင်းတွင် ထုတ်ပြန်ထားသည်။
စစ်ဘက်ဆိုင်ရာ ပစ်မှတ်များဖြစ်သည့် စစ်တပ်နှင့် ရဲတပ်ဖွဲ့ဝင်တို့ကို ဆက်လက်တိုက်ခိုက်သွားမည်ဖြစ်ကြောင်း ချင်းဒေသကာကွယ်ရေးအဖွဲ့ (CDF) ပြောရေးဆိုခွင့်ရှိသူ ကိုဂျွန်က Myanmar Now ကို ပြောသည်။
“အဓိကတော့ NUG (အမျိုးသားညီညွတ်ရေးအစိုးရ) ကလည်း D-Day ကြေညာပြီ။ ကျွန်တော်တို့ဘက်ကလည်း ရှေ့ဆက်ပြီးတော့ စစ်ဘက်ဆိုင်ရာ ပစ်မှတ်လုပ်ထားတာတွေရှိတယ်။ စစ်တပ်တွေပါတယ်။ ရဲတွေပါတယ်။ သူတို့ကိုတော့ တွေ့တဲ့ နေရာတိုင်းမှာ ဖမ်းဖို့၊ ပစ်ဖို့ဆိုတာကတော့ ကျွန်တော်တို့ တိုင်ပင်ထားပြီးသား။ ဒီအတိုင်း ပဲသွားရမှာ” ဟု ၎င်းက ပြောသည်။
အမျိုးသားညီညွတ်ရေးအစိုးရ (NUG) က ပြည်သူ့တော်လှန်ရေးစတင်ကြောင်း စက်တင်ဘာ ၇ ရက်တွင် ကြေညာပြီးနောက်ပိုင်း ချင်းပြည်နယ်တွင် အာဏာဖီဆန်ရေးလှုပ်ရှားမှု (CDM) တွင် ပါဝင်လာသည့် ရဲတပ်ဖွဲ့ဝင် ၂၀ ကျော်နှင့် စစ်သား ၇ ဦးရှိသည်ဟု ကိုဂျွန်က ပြောသည်။
တီးတိန်မြို့ရှိ စစ်ကောင်စီ၏ ခိုင်ကမ်းနယ်မြေရဲစခန်းကို ချင်းဒေသကာကွယ်ရေးအဖွဲ့သုံးဖွဲ့ ပူးပေါင်းတိုက်ခိုက်ရာတွင် မိနစ် ၂၀ နီးပါးကြာမြင့်ခဲ့ပြီး စစ်ကောင်စီဘက်မှ ၅ ဦးသေဆုံးသည်ဟု ဆိုသော်လည်း သီးခြားအတည်ပြုနိုင်ခြင်း မရှိသေးပေ။
အမျိုးသားညီညွတ်ရေးအစိုးရ၏ ပြည်သူ့တော်လှန်ရေးစတင်ကြေညာချက်တွင် စစ်ကောင်စီဒေါက်တိုင်များကို ပစ်မှတ်ထားတိုက်ခိုက်ရန်လည်း ပါဝင်ခဲ့သည်။ ထိုစက်တင်ဘာ ၇ ရက်နေ့မှစ၍ တိုင်းရင်းသားလက်နက်ကိုင်အဖွဲ့အစည်းများ ရှိရာ ဒေသများအပါအဝင် ဒေသအသီးသီးတွင် တိုက်ပွဲများ ပိုမိုဖြစ်ပွားခဲ့သည်။
ချင်းပြည်နယ် ထန်တလန်မြို့နယ်အတွင်း အိန္ဒိယ − မြန်မာနယ်စပ် လုံလဲရ်ရွာရှိ စစ်ကောင်စီစခန်းကို ချင်းအမျိုးသားတပ်မတော် (CNA) နှင့် CDM အဖွဲ့တို့ ပူးပေါင်း၍ စက်တင်ဘာ ၁၁ ရက်တွင် တိုက်ခိုက်သိမ်းပိုက်ပြီး မီးရှို့ဖျက်ဆီးခဲ့သည်။
ချင်းပြည်နယ်တောင်ပိုင်း ကန်ပက်လက်မြို့နယ်အပါအဝင် နယ်မြေချင်းထိစပ်နေသည့် ယောဒေသဖြစ်သော မကွေးတိုင်း ဆောနှင့် ဂန့်ဂေါမြို့နယ်များတွင်လည်း ဒေသခံ PDF အဖွဲ့များနှင့် စစ်ကောင်စီတပ်ကြား တိုက်ပွဲများ ဖြစ်ပွားလျက်ရှိသည်။
အာဏာသိမ်းမှုဖြစ်ပွားသည့် ဖေဖော်ဝါရီလမှ လက်ရှိအချိန်ထိ ချင်းပြည်နယ်ရှိ စစ်ကောင်စီ၏ ရဲစခန်း ၅ ခုနှင့် စစ်တပ်စခန်း ၂ ခုကို တိုက်ခိုက်ခဲ့ကြောင်း ချင်းဒေသကာကွယ်ရေးအဖွဲ့များ စုပေါင်းထားသည့် CDF အဖွဲ့ထံမှ သိရသည်။
စစ်ကောင်စီတပ်ဖွဲ့ဝင်များ CDM တွင် အမြန်ဆုံးပါဝင်လာရန် CDF က တိုက်တွန်းထားသည်။
“CDM ဝင်လာတဲ့သူတွေဆိုရင် မြို့ပေါ်ကနေ နယ်ဘက် ပို့ပေးပါဆိုရင်လည်း ဆိုင်ကယ်တွေ သေချာလေး လုပ်ပေးတယ်။ လုံခြုံရေးယူပြီး ပို့ပေးတယ်။ သူတို့သွားချင်တဲ့ နေရာဒေသကိုလည်း စီစဉ်ပေးတယ်။ ထောက်ပံ့ပေးတာတွေလည်း လုပ်ပေးတယ်။ လက်နက်နဲ့ ထွက်လာတဲ့သူတွေဆိုရင်တော့ သိန်း ၅၀ သီးသန့်ဆုချီးမြှင့်ပေးပါတယ်” ဟု CDF ပြောရေးဆိုခွင့်ရှိသူ ကိုဂျွန်က ပြောသည်။
(လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့အကူအညီကို လိုအပ်နေပါတယ်။ ဒီနေရာကိုနှိပ်၍ လှူဒါန်းနိုင်ပါတယ်။)
Donate here > https://www.userroll.com/site/register/m1f6p
