စစ်ကောင်စီက အောက်ဆီဂျင်ကို နိုင်ငံရေးလက်နက်တစ်ခုအဖြစ် အသုံးချနေပြီလား

မြန်မာနိုင်ငံတွင် စစ်အာဏာသိမ်းပြီးနောက် စစ်တပ်၏အကြမ်းဖက်မှုများကို ပြည်သူများရင်ဆိုင်နေရချိန်တွင် တစ်ကျော့ပြန်ဖြစ်ပွားလာသည့် ကိုဗစ်နိုင်တင်းရောဂါတတိယလှိုင်းကြောင့် ရောဂါကူးစက်ခံရမှုနှင့် သေဆုံးမှုများမြင့်တက်လာပြီး အများစုမှာ အောက်ဆီဂျင်ပြတ်လပ်မှုကြောင့် သေဆုံးခဲ့ရကြရသည်။

စစ်ကောင်စီသည် အောက်ဆီဂျင်မလုံလောက်သည့်ပြဿနာကို မဖြေရှင်းနိုင်ရုံမက ပြည်သူများ၏အောက်ဆီဂျင်လိုအပ်နေမှုကို ခုတုံးလုပ်ပြီး အုပ်ချုပ်ရေးစနစ်အသက်ဝင်အောင် ပြုလုပ်ကာ အောက်ဆီဂျင်ကို နိုင်ငံရေးလက်နက်တစ်ခုအဖြစ် အမြတ်ထုတ်ပြီး အသုံးချလာခဲ့သည်ကို တွေ့ရသည်။ အောက်ဆီဂျင် ထုတ်လုပ်ဖြန့်ဖြူးပေးနေသည့် စက်ရုံတချို့ကို ပုဂ္ဂလိကထံမရောင်းချရန် ကန့်သတ်ပိတ်ပင်ခဲ့ပြီး သက်ဆိုင်ရာ မြို့နယ်၊ ရပ်ကွက်အလိုက် ခွဲတမ်းဖြင့် အောက်ဆီဂျင်ပေးရန် လုပ်ဆောင်လာသလို သက်ဆိုင်ရာ ရပ်ကွက်အုပ်ချုပ်ရေးနမှူး၏ ထောက်ခံချက်၊ မှတ်ပုံတင်၊ သန်းခေါင်စာရင်းစသည့်အထောက်အထားများ ပါရှိမှ အောက်ဆီဂျင်ဖြည့်နိုင်သည်ဟု ကန့်သတ်မှုများလုပ်လာသည်။