ကျောက်ကြီးမြို့နယ်၊ ပိုးလိုးနိုဖိုးရွာမှ နော်အေးကြန်ကို စစ်တပ်က ဖမ်းသွားကြောင်း၊ ၎င်း၏ သားသမီး၊ အစ်မနှင့် တူ / တူမ များက စစ်တပ်၏ ရန်ကို စိုးရိမ်သဖြင့် ယမန်နေ့ (မေ ၂၆) နံနက်ပိုင်းတွင် နေအိမ်များမှ ထွက်ပြေးတိမ်းရှောင်ခဲ့ရကြောင်း သိရသည်။
အသက် ၃၈ နှစ်အရွယ် နော်အေးကြန်ကို ပြီးခဲ့သည့် မေ ၂၄ နံနက် ၄ နာရီခွဲတွင် ခလရ ၆၀ မှ စစ်သားများက ဖမ်းဆီးခေါ်ဆောင်သွားခြင်း ဖြစ်သည်။
ထိုဖမ်းဆီးမှုကို အပြင်းအထန်ရှုတ်ချပြီး အမြန်ဆုံးပြန်လွှတ်ပေးရန် ကျောက်ကြီးမြို့နယ် ဒေသခံကရင်လူမှုအဖွဲ့က တောင်းဆိုထားသည်။
ပြန်လွှတ်မပေးပါက လူထုနှင့် တွဲပြီး ပြင်းထန်သော တုံ့ပြန်မှုများကို လုပ်ဆောင်သွားမည်ဟု မေ ၂၄ ၌ ထုတ်ပြန်သော ကြေညာချက်၌ ဖော်ပြထားသည်။
နော်အေးကြန်ကို မည်သည့်နေရာတွင် ထိန်းသိမ်းထားမှန်း မသိရသေးပေ။
” လိုက်စုံစမ်းကြည့်တာတော့ ကျောက်ကြီးမှာလိုလို၊ တောင်ငူမှာလိုလို ကြားရတာပါပဲ” ဟု ညောင်လေးပင်ခရိုင်၊ မုန်းမြို့နယ်၊ ဒေခံကရင်လူမှုအဖွဲ့မှ ပြောရေးဆိုခွင့်ရှိသူတစ်ဦးက ပြောသည်။
၎င်းအဖွဲ့သည်လည်း နော်အေးကြန်ကို အမြန်ဆုံးပြန်လွှတ်ပေးရန် တောင်းဆိုထားသည်။
ဖမ်းဆီးရသည့် အကြောင်းရင်းကို မသိရှိရသေးဘဲ နော်အေးကြန်လွတ်မြောက်ရေး ဒေသခံကရင်လူမှုအဖွဲ့များ ယနေ့ (မေ ၂၇) ၌ တိုင်ပင်ဆွေးနွေးနေသည်ဟု ဆိုသည်။
ထိုဖမ်းဆီးမှုနှင့် ပတ်သက်ပြီး စစ်တပ်၏ ပြန်ကြားရေးအရာရှိကို ဆက်သွယ်မေးမြန်း၍ မရသေးပေ။
ကျောက်ကြီးမြို့နယ်သည် ကရင်အမျိုးသားအစည်းအရုံး (KNU) ၏ တပ်များလှုပ်ရှားသည့် နယ်မြေတစ်ခုဖြစ်သည်။
ယင်းမြို့နယ်အတွင်း ခလရ ၆၀ က လမ်းမများတွင် ဂိတ်ချစစ်ဆေးနေခြင်းကို KNU က မေ ၁၂ တွင် ကန့်ကွက်ထားခဲ့ပြီး အခြေအနေတင်းမာနေသည်။
၂၀၂၁ ဇန်နဝါရီလဆန်းမှစ၍ မြို့နယ်အတွင်း နှစ်ဖက်တိုက်ပွဲများဖြစ်ခဲ့ပြီး ဒေသခံအများအပြား စစ်ရှောင်ခဲ့ရသည်။
မေ ၂၅ ညနေ ၃ နာရီခန့်က ကျောက်ကြီးမြို့နယ်၊ ကျောက်ကြီး – မူသယ် ကားလမ်းမပေါ်တွင် ဖြစ်ပွားသည့် တိုက်ပွဲအတွင်း လက်နက်ကြီးကျည်ပေါက်ကွဲမှုကြောင့် အမျိုးသမီးတစ်ဦး ဒဏ်ရာရခဲ့သေးသည်။
KNU ထိန်းချုပ်နယ်မြေများတွင် ဒေသခံများသည် စစ်အာဏာရှင်ဆန့်ကျင်သော ဆန္ဒပြပွဲများ ပြုလုပ်ခဲ့ကြပြီး စစ်တပ်မှ ဖမ်းဆီးမှုများရှိနေ၍ KNU တပ်မဟာများမှ တပ်ဖွဲ့များက လုံခြုံရေးယူပေးခဲ့သည်။
