စစ်ကောင်စီတပ်နဲ့ ကိုးကန့် (MNDAA) တပ်တွေ ပြီးခဲ့တဲ့ ဇွန်လထဲမှာ သုံးကြိမ်လောက် တွေ့ဆုံခဲ့ပြီး ဆွေးနွေးမှုရလဒ်တွေကို မသိရတာကြောင့် လားရှိုးမြို့ခံတွေကြားမှာ စိုးရိမ်မှုတွေ တိုးလာတယ်လို့ ဒေသခံတွေဆီကနေ သိရပါတယ်။
ဇွန် ၂၀ ရက်နေ့မှာ လားရှိုးကို စစ်ကောင်စီက အင်အား တစ်ထောင်ကျော်နဲ့ လက်နက်ကြီးတွေ ဖြည့်ခဲ့ပြီး ကိုးကန့်တပ်နဲ့ တစ်ကြိမ်တွေ့ခဲ့ပါတယ်။ အဲ့ဒီနောက် ဇွန်လ ၃၀ရက်မှာ လားရှိုးမြို့ပေါ်က ဆင်နှစ်ကောင်ဟိုတယ်နဲ့ ဟိုပိတ်ရွာတို့မှာ နှစ်ကြိမ် ထပ်မံတွေ့ဆုံဆွေးနွေးခဲ့ကြပေမယ့် နှစ်ဖက်လုံးက ဆွေးနွေးမှု အခြေအနေကို လျှို့ဝှက်ထားပါတယ်။
နှစ်ဖက် ဆွေးနွေးပွဲတွေ အဆင်မပြေကြောင်းနဲ့ နှစ်ဖက်တပ်တွေ အင်အားကိုယ်စီ ဖြည့်နေကြတယ်ဆိုတဲ့ ကောလာဟလတွေ ပျံ့နှံ့လာတာကြောင့် လားရှိုးမြို့ခံတွေကြား စိုးရိမ်မှုတွေ တိုးလာပါတယ်။
ကျော်ဇင်ဝင်း၊ မြတ်ကြီး/ Myanmar Now
