စစ်ကိုင်းတိုင်း၊ ဒီပဲယင်းမြို့နယ်၊ အိုးထိန်းတွင်းရွာ စာသင်ကျောင်းကို ယမန်နေ့(မေ ၁၂) လေကြောင်းတိုက်ခိုက်မှုကြောင့် သေဆုံးသူအရေအတွက်မှာ ၂၂ ဦးအထိရှိလာပြီး ကျောင်းသား၊ ကျောင်းသူ ၂၀ ဦးနှင့် ဆရာမ ၂ ဦးပါဝင်သည်။
ဒဏ်ရာပြင်းထန်သူများထဲမှ သေဆုံးမှုများရှိသည့်အတွက် သေဆုံးသူအရေအတွက် မြင့်တက်လာခြင်းဖြစ်သည်။
စာသင်ကျောင်းကို ဦးတည်ပစ်ခတ်ခဲ့သည့် လေကြောင်းတိုက်ခိုက်မှုအတွင်း သေဆုံးခဲ့သည့် ကျောင်းသား ၂၀ အနက် Grade 2 (ဒုတိယတန်း) မှ ၆ ဦး၊ Grade 3 (တတိယတန်း) မှ ၃ ဦး၊ Grade 4 မှ ၄ ဦး၊ Grade 5 မှ ၁ ဦး၊ Grade 7 ၃ ဦး၊ Grade ၉၊ ၁၀၊ ၁၁ တို့မှ ၁ ဦးစီ သေဆုံးခဲ့ကြောင်း မြို့နယ်ပကဖ နှင့် ကူညီပေးသူများထံက သိရသည်။
လေကြောင်းတိုက်ခိုက်မှုကြောင့် သေဆုံးသွားသည့် ဆရာမနှစ်ဦးမှာ ဒေါ်ပန်းမို့မို့ဝေနှင့် ဒေါ်ဇင်မာသူတို့ ဖြစ်သည်။
“ဗုံးကကျောင်းပေါ်တည့်တည့်မှာကျတာ။ ကျောင်းက တစ်ထပ်ဆောင်။ အမိုးတွေပွင့်ပြီး အတွင်းနံရံ တွေက ဒိုးချင်းတွေပေါက်တာ။ အတွင်းခန်းတွေက ဟိုဘက်ဒီဘက်ပေါက်ထွက်သွားတာ။ အပြင်ဘက် ထွက်ပြေးတဲ့တချို့ကလေးတွေကတော့ လွတ်တယ်”ဟု မြေပြင်ကူညီကယ်ဆယ်ရေးသမားတစ်ဦးက ပြောသည်။
ရုပ်သံ – ဒေါ်ရတီအုန်း
