ရှမ်းပြည်နယ်မြောက်ပိုင်း လားရှိုးမြို့ကို စစ်ကောင်စီတပ်က လေကြောင်းမှ နေ့စဉ်နီးပါး ဗုံးကြဲတိုက် ခိုက်နိုင်ရန် သတင်းပေးခဲ့သော လူ ၂၀ ကျော်ကို ကိုးကန့်တပ် (MNDAA) ၏ ကွပ်ကဲမှုအောက်ရှိ လားရှိုးမြို့ အုပ်ချုပ်ရေးအဖွဲ့က ဖမ်းဆီးစစ်ဆေးနေသည်ဟု သိရသည်။
အရှေ့မြောက်တိုင်းစစ်ဌာနချုပ် (ရမခ) တည်ရှိခဲ့ရာ လာရှိုးမြို့ကို MNDAA က သြဂုတ်လဆန်းပိုင်းတွင် အပြီးသတ်သိမ်းပိုက်ပြီးနောက် ဩဂုတ် ၃၀ ရက်မှ စတင်ကာ လေကြောင်းမှ ဗုံးကြဲတိုက်ခိုက်မှုများ ဆက်တိုက်ပြုလုပ်ခဲ့သည်။
ထိုသို့ ဗုံးကြဲတိုက်ခိုက်နိုင်ရန် စစ်တပ်ထံ သတင်းပေးသူများရှိနေခြင်းကြောင့်ဟု ယူဆရသူ လူ ၂၀ ကျော် ကို ဖမ်းဆီးစစ်ဆေးနေခြင်းဖြစ်သည်ဟု လားရှိုးမြို့ပြန်လည်ထူ ထောင်ရေးအဖွဲ့၏ ဖေ့ဘွတ်ခ် လူမှုကွန်ယက်စာမျက်နှာတွင် ယနေ့(အောက်တိုဘာ ၁၀) နံနက်က ထုတ်ပြန်ဖော်ပြထားသည်။
“စစ်ကောင်စီရဲ့ လေကြောင်းတိုက်ခိုက်မှုစတင်ပြီးနောက်ပိုင်းမှ ဖမ်းဆီးခဲ့တာဖြစ်ပါတယ်”ဟု လားရှိုးမြို့အုပ်ချုပ်ရေးအဖွဲ့ တာဝန်ရှိသူတစ်ဦး၏ ပြောဆိုချက်ကို ကိုးကား၍ လားရှိုးမြို့ပြန်လည်ထူ ထောင်ရေးအဖွဲ့ ဖေ့ဘွတ်ခ် စာမျက်နှာတွင် ဖော်ပြခြင်းဖြစ်သည်။
ပြည်သူ၏ သတင်းပေးချက်အရ ဖမ်းဆီးစစ်ဆေးနေခြင်းဖြစ်ပြီး အပြစ်မရှိပါက ပြန်လွှတ်ပေးသွားမည် ဖြစ်ကြောင်း၊ အပြစ်ရှိမှသာ ဆက်လက်ဖမ်းဆီးထားမည်ဟု ဆိုသည်။
“လတ်တလောတော့ သေဒဏ်ပေးတဲ့အထိ ပြစ်ဒဏ်ချတာမျိုး မရှိသေးပါဘူး။ ယာယီဖမ်းဆီးထိန်း သိမ်းထားတာမျိုးပဲ ရှိပါသေးတယ်”ဟုMNDAA အရာရှိတစ်ဦးက ပြောဆိုနေသည်ကို အဆိုပါရုပ်သံဖိုင်တွင် တွေ့ရသည်။
စစ်တပ်သတင်းပေးဟု သံသယရှိသူများအား ရပ်ကွက် အုပ်ချုပ်ရေးရုံးများသို့ လာရောက်သတင်းပို့ကြ ရန် လားရှိုးမြို့အုပ်ချုပ်ရေးအဖွဲ့က တိုက်တွန်းထားသည်။
စစ်တပ်သတင်းပေးများနှင့်ပတ်သတ်၍ ကိုးကန့်အုပ်ချုပ်ရေးအဖွဲ့ထံ အသေးစိတ် မေးမြန်းသော်လည်း ဖြေဆိုခြင်းမရှိသေးပေ။
MNDAA ထိန်းချုပ်ထားသည့် သိန္နီမြို့နယ်အတွင်း ယနေ့(အောက်တိုဘာ ၁၀) နံနက်အစော ၂ နာရီဝန်းကျင် က လေကြောင်းမှ ဗုံးကြဲတိုက်ခိုက်ခံရပြီး ဒေသခံ ၅ ဦး ထိခိုက်ဒဏ်ရာရရှိခဲ့ကြောင်း လားရှိုးမြို့ပြန်လည် ထူထောင်ရေးအဖွဲ့က ဖော်ပြသည်။
သိန္နီမြို့အရှေ့ဘက် ၂ မိုင်အကွာရှိ မန်ချက်ကျေးရွာကို ဗုံးကြဲခဲ့ခြင်းဖြစ်ပြီး နေအိမ်အများအပြား ထိခိုက် ပျက်စီးကြောင်း၊ သေဆုံးသူ မရှိကြောင်း သိရသည်။
လက်ရှိတွင် သိန္နီမြို့တဝိုက်မှာ ဖုန်းလိုင်း၊ အင်တာနက်လိုင်းများပြတ်တောက်နေသဖြင့် အသေးစိတ် အခြေအနေ မေးမြန်းနိုင်ခြင်းမရှိသေးပေ။
စစ်တပ်သည် ၎င်းတို့ လက်လွှတ်လိုက်ရသည့် လားရှိုးမြို့ကို စက်တင်ဘာလဆန်းပိုင်းမှ အောက်တိုဘာ ၆ ရက်ဝန်းကျင်အထိလေယာဉ်ဖြင့် မကြာခဏ လာရောက်ဗုံး ကြဲတိုက်ခိုက်မှုများ ပြုလုပ်ခဲ့သည်ဟု MNDAA လက်အောက်ခံ လားရှိုးမြို့ပြန်လည်ထူထောင်ရေးအဖွဲ့က ထုတ်ပြန်ထားသည်။
လေကြောင်းတိုက်ခိုက်မှုကြောင့် လားရှိုးဒေသခံ ၉ ဦးသေဆုံးကာ လူ ၄၀ ကျော် ထိခိုက်ဒဏ်ရာရရှိထား ကြောင်း အထက်ပါအဖွဲ့၏ စာရင်းတွင် ဖော်ပြထားသည်။
