နိုင်ငံအနှံ့ စစ်ဖြစ်နေပြီး ရေကြီးရေလျှံမှုတွေကြောင့် အိုးအိမ်တွေပျက်စီး၊ လူဦးရေ သိန်းနဲ့ချီရေဘေးသင့်နေချိန်မှာ စစ်ကောင်စီက ရွေးကောက်ပွဲအတွက် ရည်ရွယ်ပြီး သန်းခေါင်စာရင်းကောက်ယူရေးစီမံချက်ကို ဦးစားပေး ဆောင်ရွက်နေပါတယ်။ အောက်တိုဘာ ၁ရက်နေ့မှာ သန်းခေါင်စာရင်းကောက်မှာ ဖြစ်လို့ ရေဘေးကယ်ဆယ်ရေးစခန်းအသီးသီးကို ရောက်နေသူတွေကို နေရပ်အမြန်ပြန်ပို့ဖို့ အာဏာသိမ်းစစ်ခေါင်းဆောင် မင်းအောင်လှိုင်က ညွှန်ကြားထားပါတယ်။ ပြည်သူတွေ အတိဒုက္ခရောက်နေချိန်မှာ သန်းခေါင်းစာရင်းကောက်ယူဖို့ အသည်းအသန်လုပ်နေတဲ့ စစ်ကောင်စီမင်းအောင်လှိုင်ရဲ့ လုပ်ရပ်ဟာ အရင်အာဏာရှင်ဟောင်း ဦးသန်းရွှေရဲ့ လုပ်ရပ်နဲ့လည်း သွားတူနေပါတယ်။ လွန်ခဲ့တဲ့ ၁၆နှစ်ကျော်က လူသိန်းနဲ့ချီပြီး သေဆုံးခဲ့ရတဲ့ နာဂစ်ဆိုင်ကလုန်မုန်တိုင်း တိုက်ခတ်ပြီး ၈ရက်အကြာမှာ စစ်တပ်စိတ်ကြိုက်ရေးဆွဲထားတဲ့ ဖွဲ့စည်းပုံအခြေခံဥပဒေကို လူထုတစ်ရပ်လုံးက မဲပေးထောက်ခံပါတယ်ဆိုပြီး လိမ်ညာ အတည်ပြုခဲ့တာပါ။ အခုလည်း စစ်ခေါင်းဆောင် မင်းအောင်လှိုင်အနေနဲ့ ဟန်ပြရွေးကောက်ပွဲကနေ တစ်ဆင့် နိုင်ငံရေးထွက်ပေါက်ရှာဖို့လုပ်နေတာလို့ အကဲခတ်တွေက သုံးသပ်ကြပါတယ်။ သတင်း၊ တင်ဆက် – အောင်ဇေ၊ မြတ်ကြီး
