ရှမ်းမြောက်မှာ ကြုံနေရတဲ့ စစ်ပွဲတွေအပါအဝင် စစ်ကောင်စီတပ်တွေ ရင်ဆိုင်နေရတဲ့ ရှုံးနိမ့်မှုတွေဟာ တော်လှန်ရေးတပ်တွေကို ပြည်ပနိုင်ငံတွေက ပေးတဲ့ လက်နက်၊ နည်းပညာနဲ့ ရိက္ခာတွေကြောင့်ဖြစ်တယ်လို့ အာဏာသိမ်းစစ်ခေါင်းဆောင် မင်းအောင်လှိုင် က ဒီကနေ့ ဩဂုတ်လ ၅ ရက်မှာ ရုပ်မြင်သံကြားမိန့်ခွန်းကနေ စွပ်စွဲပြောဆိုလိုက်ပါတယ်။ ဘယ်နိုင်ငံဆိုတာကို တိတိကျကျပြောဆိုတာ မရှိပေမဲ့ အိမ်နီးချင်း တရုတ်နဲ့ ထိုင်းနယ်စပ်တွေက ရတဲ့ လက်နက်တွေကြောင့် သူရဲ့တပ်တွေ အထိနာနေတယ်လို့ ဝန်ခံခဲ့ပါတယ်။ ရှမ်းပြည်နယ်မြောက်ပိုင်းက ကိုးကန့်ဒေသနဲ့ လားရှိုးမြို့တို့ကို သိမ်းပိုက်ထားတဲ့ ကိုးကန့်တပ် MNDAA အသုံးပြုခဲ့တဲ့ ဒရုန်းတွေ၊ ရှော့တိုက်ဒုံးတွေဟာ ပြည်ပပညာရှင်တွေရဲ့အကူအညီနဲ့ အဆင့်မြှင့်ထားတဲ့ လက်နက်တွေဖြစ်တယ်လို့ စစ်ခေါင်းဆောင်မင်းအောင်လှိုင်က ဆိုပါတယ်။ MNDAA ရဲ့ တိုက်ခိုက်ရေးဒရုန်းတွေကို “ပြင်ပကြေးစားနည်းပညာရှင်” တွေက အကူအညီပေးကာ အဆင့်မြှင့်ထားတာလို့ သူက စွပ်စွဲထားပါတယ်။ ဒါ့အပြင် ကရင်အမျိုးသားအစည်းအရုံး KNU က စစ်တောင်းမြစ်ဝှမ်းမှာ စစ်ပွဲအသစ်စဖို့ ပြင်ဆင်နေကြောင်း ၊ KNU တပ်မဟာ ၁၊ ၃၊ နဲ့ ၅ တို့ပါဝင်တိုက်ခိုက်မယ်လို့ သတင်းရကြောင်းသူက ညည်းတွားခဲ့ပြီး ထိုင်းနယ်စပ်က ရလာတဲ့ လက်နက်တွေကို အသုံးပြုနေတယ်လို့ သူက ဆိုပါတယ်။
