သမ္မတကြီးကတော် ဒေါက်တာဘိုက်ဒန်
ဒေါ်ဒေါ် ဒုသမ္မတကြီး
အန်ကယ် အန်းဟော့ (ဒုသမ္မတ ကမ္မလာဒေဝီဟားရစ် (စ်)၏ခင်ပွန်း)
အမေရိကန်နိုင်ငံသားများနှင့် ကမ္ဘာကြီးရှင့်
“အဆုံးမဲ့အမှောင်ရိပ်မှာ အလင်းကို
ဘယ်မှာများတွေ့နိုင်ပါ့မလဲ” ဆိုတဲ့ အမေးပုစ္ဆာကို
တစ်နေ့မှာ ကျွန်မတို့ကိုယ်တိုင် ကျွန်မတို့
မေးရမယ့်အချိန်ရောက်လာပါမယ်။
ကျွန်မတို့ ထွေးပွေ့ထားရတဲ့ ဆုံးရှုံးမှုတွေ
ကျွန်မတို့ ဖြတ်ကူးရမယ့် ပင်လယ်ပြင်ကြီး
ဒုက္ခဆိုးကြီးကို ကျွန်မတို့ ရင်ဆိုင်ခဲ့တယ်။
ဆိတ်ငြိမ်နေခြင်းဟာ
အမြဲတစေငြိမ်းချမ်းမှု မဟုတ်ဘူးဆိုတာ
အစဥ်အလာမှတ်ယူ စွဲမှတ်မှုတွေက
အမြဲတရားမျှတမှု ဖြစ်မနေနိုင်တာ
ဒါတွေကို ကျွန်မတို့ သင်ခန်းစာရခဲ့တယ်။
ဒါပေမယ့်လည်း အရုဏ်ဦးဆိုတာကိုတော့
ကျွန်မတို့အားလုံး မုချမသွေ တွေ့ရပါမယ်။
အခက်အခဲတွေကို
တစ်နည်းနည်းနဲ့ကို ကျွန်မတို့ကျော်ဖြတ်နိုင်ပါတယ်
တစ်နည်းနည်းနဲ့ကို ကျွန်မတို့ တွေ့ကြုံခဲ့ကြတယ်၊
တစ်နည်းနည်းနဲ့ကို ကြံ့ကြံ့ခံ ရင်ဆိုင်ခဲ့ကြတာပဲ
မပြိုကွဲတဲ့နိုင်ငံတော်၊ မပြီးဆုံးသေးတဲ့နိုင်ငံတော်
ကျွန်တွေဆီက ဆင်းသက်လာ၊
အဖေမဲ့ အမေတစ်ဦးတည်းရဲ့ပျိုးထောင်မှုနဲ့
ကြီးပြင်းလာတဲ့
ခပ်ပိန်ပိန်လူမဲမလေးတစ်ဦး
ဤတိုင်းပြည်ရဲ့ကျွန်မတို့လိုမျိုးဆက်တွေ
ဤနိုင်ငံကြီးမှာ သမ္မတဖြစ်ခွင့်၊
အိပ်မက်မက်ခွင့်ရနိုင်ကြပါပြီ။
ဟုတ်ပါ့။ ကျွန်မတို့ ပြီးပြည့်စုံတဲ့အခြေကို
မရောက်သေး
မွန်မြတ်ဖြူစင်တဲ့ အခြေကိုလည်းရောက်ဖို့ရာ
ဝေးပါသေးတယ်။
ဪ ဒါပေမယ့်လည်း ကျွန်မတို့က
အရာရာအားလုံးပြီးပြည့်စုံတဲ့
ပြည်ထောင်စုနိုင်ငံတော်ကြီး ထူထောင်ဖို့
မကြိုးစားနေတာမျိုးတော့ မဟုတ်ရပါ။
ရည်မှန်းချက်ကောင်းကောင်းနဲ့
ပြည်ထောင်စုကြီးဖြစ်ထွန်းလာရေး
ကျွန်မတို့တွေ ကြိုးပမ်းနေကြပါတယ်။
ယဥ်ကျေးမှုပေါင်းစုံ၊ အရောင်အသွေးမျိုးစုံ၊
အခြေအနေအမျိုးမျိုးတည်ရှိနေတဲ့
လူသားတွေအားလုံးအတွက် ရည်ရွယ်တဲ့
နိုင်ငံတော်မျိုး တည်ထောင်ဖို့ပါ။
ဒီလိုလုပ်မှပဲ ကျွန်မတို့အချင်းချင်းကြားက
ကွဲပြားမှုတွေကိုလွန်ပြီး
ကျွန်မတို့အားလုံးရဲ့ ရှေ့ကိုမျှော်ကြည့်နိုင်မယ်
အားလုံးရဲ့အနာဂတ်ကို ရှေးရှုလို့
မတူညီမှုတွေကို ရုပ်သိမ်းစို့။
ကွဲပြားမှုတွေကို စေ့စပ်ကြစို့။
ကျွန်မတို့ လက်နက်တွေချပြီး
ကျွန်မတို့အချင်းချင်း လက်တွေကမ်းလင့်ကြစို့။
အမုန်းတွေမရှိ
အားလုံးအတွက် ချစ်ခင်ခြင်းသာလျှင်ရှိ။
ဤကမ္ဘာကြီးဟာ ဒါတွေအမှန်လို့
ဆိုနိုင်ဖွယ်ရာသာရှိပါတယ်
ဘာတွေလဲဆိုတော့
ပူဆွေးပေမယ့်လည်း တို့တွေရှေ့ကို ချီခဲ့ကြတယ်
နာကျင်ပေမယ့်လည်း
တို့တွေမျှော်လင့်ချက်တွေရှိခဲ့ကြတယ်
မောဟိုက်နေပေမယ့်လည်း
တို့တွေကြိုးစားခဲ့ကြတယ်
အောင်မြင်မှုနဲ့အတူ
တို့တွေထာဝရစည်းလုံးကြမယ်။
ဒါဟာ အရှုံးကို တစ်ဖန်မကြုံနိုင်တော့တာ မဟုတ်
သင်းကွဲစေတဲ့ မျိုးစေ့တွေကို
တို့တွေ နောက်တစ်ဖန် မစိုက်တော့လို့ပဲဖြစ်တယ်။
ကျမ်းစာထဲမှာတော့ လူတိုင်းတစ်နေ့
ကိုယ်စိုက်တဲ့ စပျစ်ပင်နဲ့ သဖန်းပင်အောက်မှာ
ထိုင်ကြရလိမ့်မယ်
အဘယ်သူကမှ ကိုယ့်အား ကြောက်ရွံ့စေခြင်းငှာ
မပြုနိုင်လို့ ဆိုပါတယ်။
ကိုယ့်ခေတ်ရဲ့ဝန်ကို ကိုယ်ကျေအောင်ထမ်းကြရင်
အောင်မြင်မှုတွေက ဝန်ထုပ်ကို
ပေါ့သွားစေမယ်လို့ မဆိုလို
ဒါပေမယ့် ကူးဖြတ်မယ့်တံတားတွေမှာတော့
တောင်ထိပ်ကိုတက်လှမ်းရာမှာတော့
မျှောင်လင့်ချက်ရောင်ခြည်ဖြစ်စေလိမ့်မယ်။
တို့တွေ ရဲရင့်ရအောင်
အကြောင်းကတော့ အမေရိကန်ဖြစ်ရခြင်းဟာ
တို့ဆက်ခံတဲ့ဂုဏ်ယူဖွယ်
အခြေအနေထက်ပိုလို့ပါပဲ။
ငါတို့ခြေလှမ်းတွေက အတိတ်ကိုသွားလှမ်းမိတယ်
ငါတို့အတိတ်ကို ငါတို့ ပြုပြင်ရမှာပဲ
အချင်းချင်းဝေမျှခြင်းကို အားမပေး
တို့နိုင်ငံကြီးကို တစ်စစီဖျက်ဆီးမယ့်
ဒီမိုကရေစီကို နောက်ပြန်ဆွဲပြီး
တို့နိုင်ငံကြီးကိုဖျက်မယ့်
အင်အားစုတစ်စုကို ငါတို့မြင်ခဲ့ရပြီ
သူတို့တွေ အောင်မြင်လုနီးပါးရောက်ခဲ့ကြတယ်။
ဒါပေမယ့် ဒီမိုကရေစီဆိုတာ
တဒင်္ဂနောက်ဆုတ်လိုက်လို့ရပေမယ့်
ထာဝရတော့ ဘယ်တော့မှ
ချေဖျက်လိုက်လို့ရတာမျိုး မဟုတ်ဘူး။
ဒီအမှန်တရားအပေါ်၊ ဒီကိုးကွယ်မှုအပေါ်
ငါတို့ယုံကြည်မှုတွေရှိကြတယ်။
အကြောင်းကတော့ အနာဂတ်ကို
တို့ကြည့်နေချိန်မှာ
ရာဇဝင်သမိုင်းကတို့ကို
မျက်စိဒေါက်ထောက်ကြည့်နေလို့ပဲ
ယနေ့ဟာ ခေတ်စနစ်တွေပြောင်းလဲဖို့ အချိန်ပဲ
ဒါပေမယ့် ဒီအခြေအနေဟာ ကနဦးမို့
တို့စိုးရိမ်နေရတယ်။
ကြောက်မက်ဖွယ်အချိန်နာရီတွေကို လက်ဆင့်ကမ်းရယူဖို့
တို့အသင့်မဖြစ်သေးဘူးလို့ ခံစားခဲ့ရတယ်။
ဒါပေမယ့် ဒီဆိုးဝါးတဲ့ အချိန်နာရီမှာပဲ
စာမျက်နှာသစ်တစ်ခုရေးထိုးဖို့
မျှော်လင့်ချက်တွေဆွဲယူဖို့
ရယ်မောစရာတွေဖန်တီးဖို့
စွမ်းအားတွေ တွေ့ခဲ့ရပြီ။
ကပ်ဘေးကြီးကို တို့တွေ ဘယ်လိုများ
အနိုင်ယူရမလဲလို့တစ်ခါက
မေးခွန်းထုတ်ခဲ့ကြတယ်
အခုများတော့ ကပ်ဘေးကြီးက
တို့ကိုဘယ်လိုများ အနိုင်ယူနိုင်မလဲလို့
တို့တွေ တွက်ဆနေကြပြီကော။
တို့နိုင်ငံရဲ့အတိတ်ကို တို့ပြန်မသွားဘူး
ပွန်းပဲ့ဒဏ်ရာတွေရှိပေမယ့်
တစ်စုတစ်စည်းတည်း ဖြစ်ဆဲ
ရဲတင်းပေမယ့်၊ ကြမ်းတမ်းပေမယ့်၊
လွတ်လပ်ပေမယ့်
ချစ်ခင်ဖွယ်ရာဖြစ်ဆဲ
အနာဂတ်နိုင်ငံကို တို့လှမ်းရအောင်။
ခြိမ်းခြောက်လို့
တို့လှည့်ပြန်မှာမဟုတ်၊ တို့ရပ်ဆိုင်းမှာမဟုတ်
အကြောင်းက ငါတို့ရဲ့ ရွေ့မှု၊မရွေ့မှုအားလုံးကို
နောင်မျိုးဆက်တွေ အမွေဆက်ခံရမှာမို့ပဲ
ငါတို့ရဲ့မှားယွင်းမှုတွေဟာ
ငါတို့မျိုးဆက်တွေရဲ့ ဒုက္ခတွေဖြစ်လိမ့်မယ်
သေချာတာ တစ်ခုတော့ရှိတယ်
ခွန်အားကို ကရုဏာနဲ့ပေါင်းစပ်ရင်
ခွန်အားကို သစ္စာတရားနဲ့ ပေါင်းစပ်ရင်
ချစ်ခြင်းတရားဟာ ငါတို့ပေးခဲ့မယ့်
အမွေဖြစ်လိမ့်မယ်။
ချစ်ခြင်းတရားဟာ အနာဂတ်ကလေးတွေအတွက်
မွေးရာပါအခွင့်အရေးဖြစ်လိမ့်မယ်
ငါတို့ရခဲ့တဲ့နိုင်ငံထက် ပိုကောင်းတဲ့နိုင်ငံကို
ငါတို့ဖန်တီးပြီး ထားရစ်ခဲ့ရအောင်
ကြေးဝါရောင်တောက်နေတဲ့ ငါ့ရင်ခွင်ထဲက
ရှိရှိသမျှ ကိုယ်အငွေ့အသက်တွေနဲ့
ဒဏ်ရာရထားတဲ့ တို့ကမ္ဘာကို
အံ့ဖွယ်ကမ္ဘာအဖြစ်ပြောင်းလဲရအောင်
ဟိုးအနောက်ဘက် ရွှေဝါရောင်တောင်တန်းတွေက
တို့နိုးထကြမယ်
တို့ဘိုးဘွားတွေ တော်လှန်ရေးဆင်နွှဲခဲ့တဲ့
လေထန်ထန်အနောက်မြောက်အရပ်ကနေ
တို့နိုးထကြမယ်
အင်းအိုင်တွေပေါတဲ့
အနောက်ဘက်အလယ်ပိုင်း ပြည်နယ်တွေကနေ
တို့နိုးထကြမယ်
နေရောင်လွှမ်းတဲ့ တောင်ပိုင်းကနေ
တို့နိုးထကြမယ်
တို့ပြန်တည်ဆောက်မယ်၊ တို့ပြန်ပေါင်းစည်းမယ်၊
တို့ပြန်ထူထောင်မယ်
တို့နိုင်ငံအနှံ့တခွင်မှာ တို့ပြည်သူတွေ
ပဒေသာစုံလင်ကွဲပြားပေမဲ့ လှပနေကြတယ်
တို့တွေနွမ်းနယ်နေပေမယ့် လှပနေကြတယ်
အမှောင်ထဲကနေ မကြောက်မရွံ့
တောက်တောက်ထိန်ထိန်
တို့ထွက်လာနိုင်တဲ့နေ့ ရောက်လာခဲ့ရင်
အရုဏ်သစ်ဟာ တို့လက်ထဲကနေ
ပွင့်ဖူးတော့မယ်။
အလင်းဆိုတာကလည်း
အလင်းကိုကြည့်ရဲတဲ့ သတ္တိရှိသူအတွက်ပဲရှိတယ်
တို့တွေအားလုံး အလင်းဖြစ်အောင်
သတ္တိကောင်းကောင်းမွေးကြပါစို့။
(ဆွေဝင်း ဘာသာပြန်ဆိုသည်။)
