ရှမ်းပြည်နယ်မြောက်ပိုင်း ကျောက်မဲ၊ နောင်ချိုနှင့် မန္တလေးတိုင်းအတွင်းမှ မိုးကုတ်၊ မတ္တရာတို့မှ စစ်ကောင်စီတပ်စခန်းများကို ယနေ့နံနက်မှ စတင်တိုက်ခိုက်နေသည့် တအာင်းတပ် TNLA ၏ထိုးစစ်တွင် အမျိုးသားညီညွတ်ရေးအစိုးရ၏ ပြည်သူ့ကာကွယ်ရေးတပ်မတော်-မန္တလေး (MDY-PDF) တပ်ဖွဲ့ဝင်များလည်း ပါဝင်တိုက်ခိုက်နေသည်။ ကျောက်မဲနှင့် နောင်ချိုမြို့ပေါ်တွင် TNLA နှင့် ပူးပေါင်းတပ်ဖွဲ့များက မြို့သိမ်းတိုက်ပွဲ ဆင်နွှဲနေပြီး၊ ထိုမြို့များရှိ ရဲစခန်းနှင့် ဌာနဆိုင်ရာများကို သိမ်းပိုက်ထားနိုင်ပြီဟု သိရသည်။ ၂၀၂၃ ခုနှစ် အောက်တိုဘာ ၂၇ ရက်နေ့တွင် မြောက်ပိုင်းညီနောင် ၃ ဖွဲ့က စစ်ကောင်စီ၏ တပ်စခန်းကြီးငယ်တို့ကို ထိုးစစ်ဆင်တိုက်ခိုက်ခဲ့သည့် ၁၀၂၇ စစ်ဆင်ရေးစတင်ခဲ့သည်။ မြို့များ၊ စစ်စခန်းအများအပြားကို လအနည်းငယ်တွင်း ထိုးစစ်ဆင်တိုက်ခိုက်သိမ်းပိုက်နိုင်ခဲ့ပြီး၊ ၂၀၂၄ ခုနှစ် နှစ်ဆန်းပိုင်းတွင် တရုတ်က ကြားဝင်စေ့စပ်ခဲ့သည့်အတွက် ဟိုင်ဂင်သဘောတူညီမှု ရရှိကာ စစ်ကောင်စီနှင့် ညီနောင် ၃ ဖွဲ့တို့အကြား ရှမ်းမြောက်ဒေသတွင် ယာယီအပစ်အခတ်ရပ်စဲထားကြခြင်းဖြစ်သည်။ TNLA က စစ်ကောင်စီသည် ဟိုင်ဂင်သဘောတူညီမှုကို ချိုးဖောက်နေခြင်းဖြစ်ကြောင်း ထုတ်ဖော်ပြောဆိုမှုများ လုပ်ဆောင်ခဲ့ပြီးနောက် ယနေ့တွင် တိုက်ပွဲများ တစ်ကျော့ပြန်ဖြစ်ပွားလာခြင်းဖြစ်သည်။
