ကချင်ပြည်နယ်၊ ချီဖွေမြို့နယ် ပန်ဝါမြို့အနီးမှ မြေရှားသတ္တုတွင်းတစ်ခု ပြီးခဲ့သည့်အင်္ဂါနေ့ (ဇွန် ၄) က ပြိုကျခဲ့ရာ တရုတ်နိုင်ငံသား နှစ်ဦးအပါအဝင် လေးဦးသေဆုံးခဲ့ပြီး ၂၀ ကျော် ပျောက်ဆုံးနေကြောင်း ဒေသခံများထံမှ သိရသည်။ ပန်ဝါမြို့ မြောက်ဘက် ၅ မိုင်အကွာ၊ တရုတ်-မြန်မာ နယ်ခြားမှတ်တိုင် ၃ အနီးရှိ တောင်တန်းပေါ်တွင် သတ္တုတူးနေစဉ် တောင်တစ်ခြမ်းလုံးနီးပါး ပြိုကျသွားပြီးနောက် အလုပ်သမားများနှင့် တောင်ခြေမှ စျေးဆိုင်ခန်းတချို့ မြေအောက်သို့ ရောက်ခဲ့ကြောင်း ဒေသခံတို့က ဆိုသည်။ မြေပြိုကျသည့် လုပ်ငန်းခွင်မှာ စစ်တပ် လက်အောက်ခံ ပန်ဝါပြည်သူ့စစ်အဖွဲ့နှင့် ရန်ကုန်တိုင်း တာမွေမြို့နယ် အခြေစိုက် Myanmar Myo Ko Ko သတ္တုတူးဖော်ရေးကုမ္ပဏီတို့ အကျိုးတူလုပ်နေသည့် လုပ်ကွက်ဟု သိရသည်။ သတင်း၊ တင်ဆက် – မောင်ရွှေဝါ၊ ဟန်သစ်
