
ရခိုင်ပြည်နယ်အတွင်း အာရက္ခတပ်တော် (AA) က ထိုးစစ်ဆင်သိမ်းပိုက်ထားသည့် မြို့အရေအတွက် များပြားလာချိန်တွင် ပြည်နယ်မြို့တော် စစ်တွေတွင် နေထိုင်သူ အများစုမှာ မြို့ကို စွန့်ခွာသွားကြပြီဖြစ်သည်။
အိမ်ကို ထိန်းသိမ်း စောင့်ရှောက်ရန် ကျန်နေခဲ့သည့် မြို့ခံတစ်ဦးက ၎င်း၏ မိသားစုဝင်များကို ဧပြီလဆန်းပိုင်းကတည်းကပင် ရန်ကုန်မြို့သို့ ပို့ဆောင်ထားပြီး ဖြစ်သည်ဟု ပြောသည်။
“ကျွန်တော်တို့ အခုနေနေကြတာက အိမ်စောင့်ပဲ။ အိမ်တစ်အိမ်မှာ လူ ၁ ယောက်၊ ၂ ယောက် အဲ့ဒီလောက်ပဲ အလွန်ဆုံးရှိကြတာ။ လုံးဝ မသွားနိုင်တဲ့သူကတော့ ရှိနေကြတာပေါ့။ ထွက်သွားနိုင်တဲ့သူကတော့ လွတ်မြောက်နယ်မြေကို ရောက်တဲ့သူရောက်၊ ရန်ကုန်ကို ရောက်တဲ့သူ ရောက်ပေါ့” ဟု သူက ဆိုသည်။
အချိန်မရွေး ဖြစ်ပေါ်လာနိုင်သည့် မြို့သိမ်းတိုက်ပွဲ အစပြုမှသာ AA ထိန်းချုပ်နယ်မြေသို့ ပြောင်းရွှေ့ရန် ပြင်ဆင်ထားချိန်မှာပင် စစ်ကောင်စီ လာရောက်ဖမ်းဆီးမည်ကိုလည်း ကြောက်ရွံ့နေရသူဖြစ်သည်။
“ကျွန်တော်နဲ့ စကားပြောရင် သဘောပေါက်မှာပါ။ စိုးရိမ်စိတ်နဲ့ အချိန်ပြည့်နေနေရတာ။ ဘယ်အချိန် ကိုယ့်ကို လာခေါ်မလဲဆိုတာကို စောင့်နေရတာ။ စီးပွားရေးကလည်း မရှိဘူး။ အရာအားလုံးက ပိန်းပိတ်အောင် မှောင်နေတဲ့အချိန်ပါ။ အိမ်တံခါး လာခေါက်မှာကို ကြောက်နေရတဲ့ အနေအထားပါ” ဟု ၎င်းက ဆက်ပြောသည်။
ရခိုင်ပြည်နယ်တစ်ခုလုံးတွင် စစ်ရေး၊ နိုင်ငံရေး၊ စီးပွားရေး အဘက်ဘက်က ရှုံးနိမ့်နေသည့် စစ်ကောင်စီအတွက် ပြည်နယ်၏ မြို့တော် စစ်တွေမြို့သည် နောက်ဆုံးခံတပ်သဖွယ် ဖြစ်လာပြီး AA အတွက်မှာမူ စစ်တွေမြို့ကို သိမ်းပိုက်နိုင်ရေးမှာ စစ်ရေးနှင့် နိုင်ငံရေး ရည်မှန်းချက်တစ်ခု ဖြစ်လာသည်။
ပိတ်ဆို့မှု၊ ဖမ်းဆီးမှုများ
မြန်မာပြည်မြောက်ပိုင်းတွင် အစပြုခဲ့သည့် “၁၀၂၇” စစ်ဆင်ရေးနှင့်အတူ ၂၀၂၃ နိုဝင်ဘာ ၁၃ တွင် ပေါ်ပေါက်လာသည့် AA နှင့် အာဏာသိမ်းစစ်တပ်တို့အကြား တစ်ကျော့ပြန်စစ်ပွဲများ ဖြစ်ပွားနေသည်မှာ ၆ လကျော် ကြာလာပြီ ဖြစ်သည်။
ရခိုင်ပြည်နယ်အတွင်းရှိ မြောက်ဦး၊ ကျောက်တော်၊ မင်းပြား၊ ပုဏ္ဏားကျွန်း၊ ရသေ့တောင်၊ ပေါက်တော၊ မြေပုံ၊ ရမ်းဗြဲနှင့် ဘူးသီးတောင် မြို့ကြီး ၉ မြို့ကို AA က သိမ်းပိုက်ထားပြီး မောင်တော၊ သံတွဲနှင့် အမ်းမြို့တို့ကို ဆက်လက် ထိုးစစ်ဆင်နေသည်။
ရခိုင်တစ်ပြည်နယ်လုံးကို သိမ်းယူမည်ဟု ကြွေးကြော်ကာ ထိုးစစ်ဆင်နေသည့် AA သည် ရခိုင်ပြည်နယ်တွင် တည်ရှိသည့် စစ်ကောင်စီ၏ စစ်ဆင်ရေးကွပ်ကဲမှုဌာချုပ် (စကခ) ၃ ခုတွင် ၂ ခု ကို သိမ်းယူနိုင်ခဲ့သည်။
ပြည်နယ်မြောက်ပိုင်းတွင် တည်ရှိသည့် စကခ ၉ ကျောက်တော်ကို ဖေဖော်ဝါရီ ၁၁ တွင် သိမ်းပိုက်နိုင်ခဲ့ပြီး စကခ ၁၅ ဘူးသီးတောင်ကို မေ ၂ တွင် သိမ်းပိုက်နိုင်ခဲ့သည်။
စစ်ကောင်စီတပ်ကလည်း ဌာနချုပ် ၂ ခု သိမ်းပိုက်ခံခဲ့ရပြီးနောက် ပြည်နယ်၏ မြို့တော် စစ်တွေကို အပြင်းအထန် ခုခံကာကွယ်ရန် ပြင်ဆင်နေသည်။
စစ်တွေမြို့ကို ကုန်းလမ်း၊ ရေလမ်းဖြင့် ခရီးသွားလာခွင့်ကို ပိတ်ဆို့ထားပြီး မြို့ပတ်လည်တွင် မြေမြှုပ်မိုင်းများ ထောင်ထားသည်၊ မြို့ခံများကို လူသားတံတိုင်းအဖြစ် အသုံးပြုရန် ခရီးသွားလာခွင့် ပိတ်ဆို့ထားခြင်းဖြစ်သည် ဟူသည့် စွပ်စွဲချက်များလည်း ရှိနေသည်။
ထို့ပြင် အင်တာနက်နှင့် တယ်လီဖုန်း ဆက်သွယ်မှုလိုင်းများကို ရံဖန်ရံခါ ဖြတ်တောက်ထားသည်၊ မေလဆန်းပိုင်းက စတင်ပြီး စစ်တွေမြို့ခံ အများအပြားကို AA နှင့် ဆက်စပ်မှု သံသယဖြင့် နေ့စဉ် ဖမ်းဆီးလျက်ရှိကြောင်း သတင်းထွက်ပေါ်နေသည်။
၆ လအတွင်း စစ်ကောင်စီတပ်က ဒေသခံ ၄၂၅ ဦးကို မတရားဖမ်းဆီးခဲ့သည်ဟု ရက္ခိုင်အမျိုးသားအဖွဲ့ချုပ် (ULA/AA) ၏ လူသားချင်းစာနာထောက်ထားရေးနှင့် ဖွံ့ဖြိုးရေးဆိုင်ရာ ပူးပေါင်းဆောင်ရွက်ရေးရုံး (HDCO) က မေ ၂၈ ရက်နေ့တွင် ထုတ်ပြန်ထားသည်။ ၂၀၂၃ နိုဝင်ဘာ ၁၃ မှ ၂၀၂၄ မေ ၁၃ အတွင်း ဖမ်းဆီးခဲ့သည်အရေအတွက်ဖြစ်သည်၊ ထိုကာလအတွင်း လက်နက်ကြီးပစ်ခတ်မှု၊ လေကြောင်းတိုက်ခိုက်မှုကြောင့် အရပ်သား၂၆၈ ဦး သေဆုံးခဲ့သည်ဟု ထုတ်ပြန်ချက်တွင် ဖော်ပြထားသည်။
ထိုထုတ်ပြန်ချက်နှင့် ပတ်သက်ပြီး စစ်ကောင်စီထံမှ တုံ့ပြန်ချက်ရရန် ဆက်သွယ်မေးမြန်းနိုင်ခြင်း မရှိသေးသလို စစ်ကောင်စီကလည်း ဖမ်းဆီးမှု၊ သေဆုံးမှုများအကြောင်း သတင်းအမှောင်ချထားတတ်သည်။

ဘုန်းကြီးကျောင်းများ ပစ်မှတ်ဖြစ်လာ
စစ်ရေး၊ နိုင်ငံရေး၊ စီးပွားရေး အဘက်ဘက်မှ ရှုံးနိမ့်နေသည့် စစ်ကောင်စီက နှစ်ပတ်အတွင်း စစ်တွေမြို့ရှိ ဘုန်းကြီးကျောင်း ၁၃ ကျောင်းကို ဧည့်စာရင်းအကြောင်းပြကာ ဝင်ရောက်စီးနင်းခဲ့ပြီး သံဃာများ အပါအဝင် ၁၃၀ ခန့်ကို ဖမ်းဆီးထားသည်ဟု မြို့ခံများက ပြောသည်။
တည်းခိုခန်းများ ပိတ်ထားချိန် ဘုန်းကြီးကျောင်းတွင် တည်းခိုနေထိုင်ကြသည့် စစ်ဘေးရှောင်အများစု ဖမ်းဆီးခံရသည်၊ သာသနာ့မှတ်ပုံတင်ကတ် မရှိသည့် အကြောင်းပြချက်ဖြင့် ဖမ်းဆီးခံရသူများထဲတွင် အသက်မပြည့်သေးသည့် ကိုရင်များလည်း ပါဝင်သည်ဟု စစ်ဘေးဒုက္ခသည်များကို အကူအညီပေးနေသူ စစ်တွေမြို့ခံတစ်ဦးက ပြောသည်။
“တချို့ကျောင်းတွေက ကျောင်းထိုင်ဆရာတော်တွေလည်း ပါတယ်လို့ သိရတယ်။ စာသင်သား ကိုရင်လေးတွေလည်း ပါသွားတယ်။ ကိုရင်တွေဆိုတာက (သာသနာ့ဘောင်မှာ) ၃ နှစ်ပြည့်မှ သာသနာ့မှတ်ပုံတင် လုပ်ရတယ်။ အဲဒီစာသင်သား ကိုရင်လေးတွေက ၃ နှစ်မပြည့်သေးတော့ သာသနာ့မှတ်ပုံတင် လုပ်လို့ မရဘူး။ အဲ့ဒါကြောင့် ဖမ်းတဲ့အထဲ ပါသွားတာ” ဟု ၎င်းက ပြောသည်။
ဝင်ရောက်စီးနင်းခံရသည့် ဘုန်းကြီးကျောင်းများတွင် ရခိုင်ပြည်နယ်သံဃမဟာနာယက ဥက္ကဋ္ဌ၏ ကျောင်းအပါအဝင် စစ်တပ်နှင့် ရင်းနှီးသည့် ဘုန်းကြီးကျောင်းအများစုပါဝင်သည်ဟု ၎င်းက ဆက်ပြောသည်။
“စစ်တွေနယ်ခံ မဟုတ်ရင် အကုန်ဖမ်းတယ်။ ဖမ်းပြီးတော့ ပြန်လွှတ်တဲ့သူတွေလည်း ပြန်လွှတ်တယ်၊ မသင်္ကာဘူးဆိုရင်တော့ အဆင့်ဆင့်စစ်တာပေါ့” ဟု ၎င်းက ပြောသည်။
“မှားသည်ဖြစ်စေ၊ မှန်သည်ဖြစ်စေ၊ အထဲကို ရောက်သွားရင်တော့ ရက်ပေါင်း ၂၀ မကျော်ဘဲနဲ့ ငွေကြေးအမြောက်အမြား မကုန်ဘဲနဲ့ ပြန်လွတ်လာတဲ့သူတွေကတော့ မရှိသလောက်ပဲ”
စစ်တပ်က ဝင်ရောက်စစ်ဆေးခဲ့သည့် ဘုန်းကြီးကျောင်း ၁၃ ကျောင်းခန့် ရှိပြီး ထိုအထဲတွင် ကျားရုံးကျောင်းတိုက်၊ ရွှေစေတီကျောင်းတိုက်၊ ရက်တစ်ရာကျောင်းတိုက်၊ သံဃရာဇာကျောင်းတိုက်၊ ပြည်တောင်ပြန်ကျောင်းတိုက်၊ ဓာတ်ဦးကျောင်းတိုက်၊ တောင်ခြေရွာကျောင်းတိုက်၊ ဗုဒ္ဓမော်ကျောင်းတိုက်၊ ဗုဒ္ဓတက္ကသိုလ်တို့ ပါဝင်သည်ဟု စစ်တွေမြို့ခံများထံမှ သိရသည်။
စစ်တွေမြို့ခံ နောက်တစ်ဦးကလည်း ဘုန်းကြီးကျောင်းများကို ဧည့်စာရင်းအကြောင်းပြကာ ဝင်ရောက်စီးနင်းပြီးနောက် မြို့ခံများ၊ မြို့ခံမဟုတ်သူများကို အုပ်စု ၂ စု ခွဲခြားထားပြီး စစ်တွေမြို့မရဲစခန်းသို့ ခေါ်ဆောင်သွားသည်ဟု ပြောသည်။

“ဟိုရောက်မှ ဖုန်းတွေ ဘာတွေ စစ်တယ်။ စစ်တာက ဌာနက အစုံက စစ်တယ်။ စစ်တပ်ကလဲ စစ်တယ်။ စ.ရ.ဖ ကလည်း စစ်တယ်။ ရဲကလည်း စစ်တယ်။ အဲဒီလို အဆင့်ဆင့် စစ်ကြတယ်။ အဲဒီတော့ အချိန်က အများကြီး ကြာသွားတာပေါ့။ သူတို့က မသင်္ကာဘူးဆိုရင် ရဲစခန်းကနေတစ်ဆင့် စစ်တပ်ထဲကို ခေါ်သွားတယ်” ဟု အသက် ၅၀ အရွယ် အမျိုးသားတစ်ဦးက ပြောသည်။
“စစ်တပ်ထဲမှာ စစ်ပြီးတော့ အဆင်ပြေမှ ရဲစခန်းကို ပြန်ပို့တယ်။ ရဲစခန်းမှာ တစ်ခါ အမိန့်မရမချင်း စောင့်နေရတယ်။ သူတို့က တရားစွဲတာလည်း မဟုတ်ဘူး။ ဒီလိုပဲ ချုပ်ထားပြီး ရက် ၂၀၊ အနည်းဆုံး ၁၀ ရက်လောက် နေခိုင်းပြီးတော့ ငွေပေးပြီးတော့မှ ပြန်လွှတ်ပေးတယ်”
ပြန်လွတ်လာသူ အရေအတွက် ၂၀ ခန့် ရှိသည်ဟု ၎င်းက ဆက်ပြောသည်။
ဘုန်းကြီးကျောင်းများနှင့်နီးစပ်သူ စစ်တွေမြို့ခံ အမျိုးသားနောက်တစ်ဦးက ရွှေစေတီကျောင်းတွင် လာရောက် ဖမ်းဆီးရာတွင် အရေအတွက်အတိအကျ မသိရသော်လည်း အမျိုးသမီး၊ ကလေးများ ပါဝင်ပြီး အမျိုးသားအများစုဖြစ်သည်ဟု ကြားရကြောင်း ပြောသည်။
တစ်မြို့လုံးရှိ ဘုန်းကြီးကျောင်းများကို ဝင်ရောက်စစ်ဆေးနေခြင်းဖြစ်ပြီး AA နှင့် ဆက်စပ်သည်ဟု ဆိုကာ ရှာဖွေ ဖမ်းဆီးကြသည်ဟု ၎င်းက ဆိုသည်။
“အဖမ်းခံရတဲ့သူအများစုက စစ်ရှောင်တွေ၊ နယ်မှာ တိုက်ပွဲဖြစ်လို့ ဒီဘက်ကို ပြေးလာတာ။ သူတို့က (ဖမ်းခံရသူတွေက) ဧည့်စာရင်းတိုင်မထားမိကြဘူး။ အရင်က ဘုန်းကြီးကျောင်းတွေကို ဝင်စစ်လေ့မရှိဘူး။ အဖမ်းခံရတဲ့သူတွေ အကုန် စစ်တပ်ထဲ ခေါ်စစ်နေတယ် ပြောတယ်။ အခုအချိန်အထိ မိသားစုဝင်တွေနဲ့ အဆက်အသွယ်မရကြဘူး” ဟု ထိုလူက ပြောသည်။
“သူတို့ဟာက ဧည့်စာရင်းသာ အကြောင်းပြတာ၊ ကျောင်းမှာ တွေ့တဲ့ပစ္စည်းတွေပါ မကြ (ယူကြ) သေးတယ်တဲ့။ မြို့ထဲက ကျောင်းတစ်ကျောင်းကဆိုရင် ဘုန်းကြီးဆီက ကွန်ပျူတာတစ်လုံးနဲ့ ငွေတွေပါ ယူသွားကြတယ်တဲ့”
စစ်တွေမြို့တွင် ဖြစ်ပွားနေသည့် ဧည့်စာရင်းအကြောင်းပြ ဖမ်းဆီးစစ်ဆေးမှုများ၊ ငွေကြေးတောင်းခံမှုများနှင့် ပတ်သက်ပြီး စစ်ကောင်စီက တရားဝင်သတင်းထုတ်ပြန်ခြင်း မရှိသေးသလို Myanmar Now က ရခိုင်ပြည်နယ်၏ စစ်ကောင်စီပြောရေးဆိုခွင့်ရှိသူကို ဆက်သွယ်မေးမြန်းရာတွင်လည်း ပြန်လည် ဖြေကြားခြင်း မရှိသေးပေ။

စစ်တွေမြို့ကို စွန့်ခွာခြင်း
၂၀၂၄ ဖေဖော်ဝါရီ ၂၉ နံနက် ၈ နာရီဝန်းကျင်ခန့်က ဖြစ်သည်။ စစ်ကောင်စီရေတပ်က ပစ်လိုက်သည့် လက်နက်ကြီးကျည်သည် စစ်တွေမြို့ ကိုရီးယားဆိပ်ကမ်းစျေးသို့ ကျရောက် ပေါက်ကွဲခဲ့ရာ ကလေးငယ်များ အပါအဝင် ၁၂ ဦး သေဆုံးခဲ့ပြီး အများအပြား ဒဏ်ရာရရှိခဲ့သည်။
စစ်တွေမြို့ ပတ်လည်တွင် တိုက်ပွဲများ ဖြစ်ပွားနေသော်လည်း ထိုပစ်ခတ်မှုဖြစ်ပွားပြီးနောက် စစ်ပွဲ၏ အနိဋ္ဌာရုံနှင့် သေကျေပျက်စီးမှုများကို တိုက်ရိုက် မြင်တွေ့လိုက်ရသည့် စစ်တွေမြို့ခံများသည် မြို့ကို စွန့်ခွာလာခဲ့ကြသည်။
သို့သော်လည်း စစ်ရေးအရ ရှုံးပွဲဆက်နေသည့် စစ်ကောင်စီတပ်က မြို့ကို စွန့်ခွာမည့် စစ်တွေမြို့ခံများကိုလည်း အလွယ်တကူ စွန့်ခွာခွင့် မပေးခဲ့ပေ။ စစ်တွေမြို့၏ ပတ်ပတ်လည်တွင် စစ်ကောင်စီတပ်၏ မြေမြှုပ်မိုင်းများရှိနေသည်၊ လက်မရွံ့စစ်သားများ၏ ပစ်ခတ်မှုနှင့်လည်း အချိန်မရွေး ရင်ဆိုင်သွားရနိုင်သည်။
ဧပြီ ၂၀ ညပိုင်းက စစ်တွေမြို့ကို စွန်ခွာကာ လွတ်မြောက်နယ်မြေသို့ ထွက်ပြေးခိုလှုံရန် ကြိုးစားခဲ့သည့် စစ်တွေမြို့ခံ ၁၂၀ ကို စစ်ကောင်စီတပ်က ပစ်ခတ်ဖမ်းဆီးခဲ့သည်၊ လွတ်အောင်ထွက်ပြေးခဲ့သည့် ဒေသခံများသည် စစ်ကောင်စီ ထောင်ထားသည့် မြေမြှုပ်မိုင်းများ နင်းမိပြီး ၄ ဦးသေဆုံးကာ ကလေးငယ်များ အပါအဝင် ဒေသခံ ၄၀ ဖမ်းဆီးခံခဲ့ရသည်ဟု သိရသည်။
စက်သုံးဆီ ပြတ်လပ်မှုကြောင့် စက်သုံးဆီဆိုင်များ ပိတ်ထားရပြီး ဓာတ်ဆီတစ်လီတာလျှင် ငွေကျပ် ၂၀၀၀၀ ဝန်းကျင်ခန့်ဖြင့် လမ်းဘေးဆိုင်များမှ ဝယ်ယူနေကြရသည်။
လက်ရှိတွင် စစ်တွေမြို့တွင်း ဆိုင်ခန်းအများစု ပိတ်ထားပြီဖြစ်ပြီး ကုန်စျေးနှုန်းများမှာလည်း အဆမတန် မြင့်တက်လျက်ရှိနေသည်။
စစ်ကောင်စီက စစ်တွေမြို့တွင်း စားနပ်ရိက္ခာဖူလုံရေးအတွက်ဟုဆိုကာ ရန်ကုန်မှ ကုန်သင်္ဘောများဖြင့် ကုန်စည်များ သယ်ယူပေးနေချိန်မှာပင် ပေါ်ဆန်းမွှေးဆန် တစ်အိတ်လျှင် ကျပ် သုံးသိန်းနီးပါးအထိ ပေါက်ဈေးရှိသည်။
ရန်ကုန်နှင့် နေပြည်တော်တွင် ပေါ်ဆန်းမွှေး ဆန်တစ်အိတ်မှာ ကျပ် တစ်သိန်းရှစ်သောင်းခန့်ရှိရာ ထက်ဝက်ကျော် ကွာဟနေသည်။

မြို့သိမ်းတိုက်ပွဲ
စစ်တွေနှင့် ကျောက်ဖြူမြို့တို့တွင် မြို့သိမ်းတိုက်ပွဲများ အချိန်မရွေး ဖြစ်ပေါ်လာနိုင်၍ အရပ်သားများ နေရပ်စွန့်ခွာပြီး ၎င်းတို့ ထိန်းချုပ်နယ်မြေသို့ လာရောက်နေထိုင်ကြရန် AA က ဧပြီ ၁၀ ရက်နေ့တွင် သတိပေးထားသည်။
စစ်တွေမြို့ အသိမ်းမခံရရေး စစ်ကောင်စီတပ်က အစွမ်းကုန် ကြိုးပမ်းနေပြီး AA ကလည်း စစ်ရေး၊ နိုင်ငံရေးအရ အရေးပါသည့် စစ်တွေမြို့ကို မရမက သိမ်းယူလိမ့်မည်ဟု ဝါရင့် ရခိုင်နိုင်ငံရေးသမား ဦးဖေသန်းက သုံးသပ်သည်။
“ရခိုင်ပြည်မြောက်ပိုင်းမှာ ဖြစ်နေတဲ့အတွက် ဘူးသီးတောင်၊ မောင်တော ကျပြီးရင်တော့ စစ်တွေကို သူတို့အနေနဲ့ကတော့ တိုက်ကို တိုက်လိမ့်မယ်လို့ ကျွန်တော်ထင်တယ်။ ဒီမြို့ကို အခြေခံပြီးတော့ သူတို့မှာလည်း စစ်ရေး၊ စီးပွားရေး၊ နိုင်ငံရေး လုပ်ကိုင်စရာတွေလည်း အများကြီးရှိမယ်” ဟု ၎င်းက ပြောသည်။
စစ်တွေမြို့ အနီးတစ်ဝိုက်ရှိ ရသေ့တောင်၊ ပုဏ္ဏားကျွန်း၊ ဘူးသီးတောင်၊ မင်းပြား စသည့် မြို့များကို AA က သိမ်းပိုက်ထားပြီး ဖြစ်သော်လည်း စစ်တွေကို မည်သည့်အချိန်တွင် စီးနင်း သိမ်းပိုက်မည်ကို ခန့်မှန်းရ ခက်နေသည်ဟု ၎င်းက ဆက်ပြောသည်။
“သူတို့ မြို့ကို သိမ်းတယ်ဆိုရင် လူထု ထိခိုက်မှုအနည်းဆုံးလမ်းကို ရွေးမယ်ဆိုတော့ စစ်တွေမြို့ကို ကြာရှည်များ ပိတ်ဆို့ထားမလား။ ဒါမှ မဟုတ်ရင် ဝင်တိုက်မလားပေါ့။ ဒါကတော့ ကျွန်တော်တို့က မပြောတတ်ဘူးပေါ့” ဟု ၎င်းက ပြောသည်။
စစ်တွေတွင် မြို့လူဦးရေ၏ ၃ ပုံ ၁ ပုံခန့်သာ ကျန်ရှိတော့ပြီး မြို့ခံအများစုမှာ AA ထိန်းချုပ်နယ်မြေဖြစ်သည့် ရသေ့တောင်၊ ပုဏ္ဏားကျွန်း၊ ပေါက်တော၊ မင်းပြားမြို့များသို့ ပြောင်းရွှေ့နေကြရာ စစ်ကောင်စီတပ်က ပစ်ခတ် ဖမ်းဆီးနေသည်ဟု ဦးဖေသန်းက ပြောသည်။
“အထွက်လည်း မပေးဘူး၊ အဝင်လည်း မပေးဘူးပေါ့။ ပြည်သူလူထု နေအိမ်တွေမှာ၊ အထပ်မြင့်အဆောက်အအုံတွေမှာ နေရာယူထားတယ်လို့လဲ သိရတယ်။ မြို့ အဝင်အထွက်တွေမှာ မိုင်းထောင်တာတွေ ကင်းစောင့်တာတွေ လုပ်ထားတယ်”
မြို့တော် စစ်တွေ မကျရှုံးစေရေးအတွက် စစ်ကောင်စီတပ်က နည်းအမျိုးမျိုး အသုံးပြုနေပြီး စစ်တွေမြို့ခံ အရပ်သားများကို လူသားဒိုင်းအဖြစ် အသုံးပြုလို၍ စစ်တွေမြို့မှ ပေးမထွက်ခြင်း ဖြစ်သည်ဟု ၎င်းက ဆက်ပြောသည်။
“ရက္ခိုင့်တပ်တော်က ပစ်ရင် ရခိုင်တွေကို ထိမယ်ပေါ့၊ စစ်တိုက်ရတာက စစ်တိုက်လို့ မရဘူးပေါ့။ ကိုယ့်လူကိုယ် ပြန်ညှာနေရတယ်။ ပြည်သူတွေကို ငဲ့ညှာနေရတဲ့ သဘောမျိုးပါ” ဟု ရခိုင် ဝါရင့်နိုင်ငံရေးသမား ဦးဖေသန်းက ပြောလိုက်သည်။
