ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီရုံးချုပ် အခြေစိုက်ရာ နေပြည်တော် ဒက္ခိဏသီရိမြို့နယ် ပြည်သူ့လွှတ်တော်နေရာတွင် လယ်ယာစိုက်ပျိုးရေးနှင့် ဆည်မြောင်းဝန်ကြီးဟောင်း ဦးမြင့်လှိုင်ကို အမျိုးသားဒီမိုကရေစီအဖွဲ့ချုပ် (NLD) ပါတီ ကိုယ်စားလှယ်လောင်း ဦးသန့်ဇင်ထွန်းက ထပ်မံအနိုင်ရခဲ့သည်။
ပြီးခဲ့သည့်ရွေးကောက်ပွဲတွင် အဆိုပါမဲဆန္ဒနယ်၌ မဲ ၂၀၀၀ ကျော် အသာရဖူးသည့် ဦးသန့်ဇင်ထွန်းသည် ယခု ၂၀၂၀ ရွေးကောက်ပွဲတွင်မူ ဦးမြင့်လှိုင်ကို မဲအရေအတွက် ၆,၀၀၀ နီးပါးအသာဖြင့်သာ အနိုင်ရခဲ့သည်။
ဦးသန့်ဇင်ထွန်းက ၁၄,၅၄၀ မဲ၊ ဒုတိယဗိုလ်ချုပ်ကြီးဟောင်း ဦးမြင့်လှိုင်က ၈,၅၇၂ မဲ ရရှိခဲ့ကြောင်း ဒက္ခိဏသီရိမြို့နယ် NLD ရုံး စာရင်းများအရ သိရသည်။
မဲပေးပိုင်ခွင့်ရှိသူ ၃၀,၀၀၀ ကျော်နှင့် မဲရုံ ၂၀ရုံ ရှိသည့် ဒက္ခိဏသီရိမြို့နယ် ပြည်သူ့လွှတ်တော်နေရာတွင် ပြည်ထောင်စုကောင်းကျိုးဆောင်ပါတီ၊ ပြည်သူ့ရှေ့ဆောင်ပါတီ၊ အမျိုးသားညီညွတ်သောဒီမိုကရက်တစ်ပါတီ၊ တိုင်းရင်းသားစည်းလုံးညီညွတ်ရေးပါတီတို့မှ ကိုယ်စားလှယ်လောင်းများလည်း ယှဉ်ပြိုင်ခဲ့ကြသည်။
(မှတ်ချက်- ရွေးကောက်ပွဲနောက်ဆုံးရလဒ်များ မထွက်ရှိသေးပါ။ မဲရလဒ်များနှင့် ပတ်သက်၍ ပြည်ထောင်စုရွေးကောက်ပွဲကော်မရှင်၏ အဆုံးအဖြတ်သာ အတည်ဖြစ်သည်။ www.uec.gov.mm)
