ပြိုင်ဆိုင်မှုပြင်းထန်မည့် တိုက်ပွဲကြားက ရခိုင်ပြည်နယ်ရွေးကောက်ပွဲ 

တိုက်ပွဲများကြောင့် ပြည်နည်တစ်ခုလုံးအတိုင်းအတာဖြင့် ရွေးကောက်ပွဲကျင်းပရန် မသေချာသေးသော်လည်း ရွေးကောက်ပွဲမှာမူ ပြိုင်ဆိုင်မှုပြင်းထန်မည့်အလားအလာရှိသည်။ 

ပြီးခဲ့သည့် ၂၀၁၅ ရွေးကောက်ပွဲတွင် ရခိုင် အမျိုးသားပါတီတစ်ခုတည်းသာရှိခဲ့သော်လည်း ၂၀၂၀ တွင်မူ ရခိုင်တိုင်းရင်းသားပါတီ သုံးခုအထိရှိလာသည်။ အမျိုးသားဒီမိုကရေစီအဖွဲ့ချုပ်နှင့် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီများလည်း ဝင်ရောက်ယှဉ်ပြိုင် ကြမည်ဖြစ်ရာ ပြိုင်ဆိုင်မှုပြင်းထန်မည်ဖြစ်သည်။ 

အကွဲအပြဲဇာတ်လမ်းများနှင့် တစ်ခုထက်ပိုသော ရခိုင်ပါတီများ

လာမည့်ရွေးကောက်ပွဲတွင် ရခိုင်ပြည်နယ်တွင် ဝင်ရောက်ယှဉ်ပြိုင်မည့် ရခိုင်တိုင်းရင်းသားပါတီ သုံးခုအထိ ရှိနေသည်။ ၎င်းတို့မှာ ရခိုင်တစ်ပြည်လုံးကို ဝင်ရောက်ယှဉ်ပြိုင်မည့် ရခိုင်အမျိုးသားပါတီ (ANP)၊ ရခိုင်ပြည် နယ်တောင်ပိုင်းကို အဓိကထားယှဉ်ပြိုင်မည့် ရခိုင်ဒီမိုကရေစီအဖွဲ့ချုပ်ပါတီ (ALD) နှင့် ဒေါက်တာအေးမောင် ဦးဆောင်သည့် ရခိုင့်ဦးဆောင်ပါတီ (AFP) တို့ဖြစ်ကြသည်။ 

ရခိုင်အမျိုးသားပါတီသည် ရခိုင်ဒီမိုကရေစီအဖွဲ့ချုပ်ပါတီ (ALD) နှင့် ရခိုင်တိုင်းရင်းသားများတိုးတက်ရေးပါတီ (RNDP) တို့ ပူးပေါင်းတည်ထောင်ခဲ့သည့်ပါတီဖြစ်သည်။ ၁၉၉၀ ရွေးကောက်ပွဲနှင့် ၂၀၁၀ ရွေးကောက်ပွဲတွင် ရခိုင်ပြည်နယ်၌ အောင်ပွဲခံခဲ့ကြသည့်ပါတီများဖြစ်ပြီး ရခိုင်လူထုထောက်ခံမှုရရှိခဲ့သည့်ပါတီများလည်း ဖြစ်သည်။

ရခိုင်လူထု၏ဆန္ဒနှင့်အညီ ထိုပါတီနှစ်ခုပူးပေါင်းရေးအတွက် ၂၀၁၃ ခုနှစ် အကုန်ပိုင်းတွင် စတင်ညှိနှိုင်းခဲ့ကြပြီး ၂၀၁၄ တွင် ရခိုင်အမျိုးသားပါတီအဖြစ် ပူးပေါင်းနိုင်ခဲ့ကြသည်။ ပါတီဥက္ကဋ္ဌတာဝန်ကို ဒေါက်တာအေးမောင်က ထမ်းဆောင်ခဲ့သည်။ ၂၀၁၅ ရွေးကောက်ပွဲတွင် ၄၅ နေရာအထိ အနိုင်ရရှိခဲ့ပြီး ပြည်နယ်အစိုးရဖွဲ့ရန်ပင် တောင်း ဆိုခဲ့သည်။ 

သို့သော် တစ်နိုင်ငံလုံးအတိုင်းအတာဖြင့် အနိုင်ရရှိသည့် အမျိုးသားဒီမိုကရေစီအဖွဲ့ချုပ်ပါတီ(NLD)သည် ထိုလိုး လာချက်ကို လက်မခံဘဲ ၎င်းတို့ပါတီဝင်တစ်ဦးကို ဝန်ကြီးချုပ်ခန့်အပ်ခဲ့သည်။ ဖွဲ့စည်းပုံအခြေခံဥပဒေအရ တိုင်းဒေသကြီးနှင့် ပြည်နယ်ဝန်ကြီးချုပ်များကို သမ္မတက တိုက်ရိုက်ခန့်အပ်ရသည်ဖြစ်ရာ NLD ပါတီဝင် ပြည်နယ်လွှတ်တော်ကိုယ်စားလှယ် ဦးညီပုကို ရခိုင်ပြည်နယ်ဝန်ကြီးချုပ်အဖြစ် ခန့်အပ်ခဲ့သည်။ 

ဖွဲ့စည်းပုံအရ ဝန်ကြီးချုပ်ကို သမ္မတက ခန့်အပ်ရသည်ကို လက်ခံသော်လည်း မည်သည့် လွှတ်တော်ကိုယ်စားလှယ်ကိုမဆို ဝန်ကြီးချုပ်အဖြစ် ခန့်အပ်နိုင်သည်ကိုထောက်ပြပြီး ရခိုင်အမျိုးသားပါတီက တောင်းဆိုခဲ့ခြင်းဖြစ် သည်။ ပြည်နယ်အစိုးရကို ဦးဆောင်ဖွဲ့စည်းခွင့်မရလျှင် အစိုးရအဖွဲ့ဝင် ပါဝင်ခြင်းမရှိဘဲ အတိုက်အခံအဖြစ် ရပ်တည်မည်ဟုလည်း ရခိုင်အမျိုးသားပါတီက ကြေညာခဲ့သည်။ 

ထိုကြေညာချက်နှင့်ပတ်သက်၍ ပါတီတွင်းရှိ ရခိုင်ဒီမိုကရေစီအဖွဲ့ချုပ်ပါတီအခြမ်းက သဘောမတူကြပေ။ သဘောမတူသူများကို ရခိုင်အမျိုးသားပါတီမှ ထုတ်ပယ်ခဲ့ရာမှစ၍ ပါတီတွင်းအကွဲအပြဲများ ဆက်တိုက်ဖြစ်ပွားခဲ့ပြီး နုတ်ထွက်သူများ၊ ထုတ်ပယ်ခံရသူ များပြားခဲ့သည်။ ထိုထုတ်ပယ်ခံရသူများက ရခိုင်ဒီမိုကရေစီအဖွဲ့ချုပ်ပါတီကို ပြန်လည်ထူထောင်ခဲ့ကြသည်။

ပါတီဥက္ကဋ္ဌ ဒေါက်တာ‌အေးမောင်သည်လည်း ပါတီမှနုတ်ထွက်ခဲ့ပြီး ၂၀၁၇ ခုနှစ်တွင် ရခိုင့်ဦးဆောင်ပါတီ တည်ထောင်ခဲ့သည်။ ဒေါက်တာအေးမောင်၏ ရခိုင့်ဦးဆောင်ပါတီသည် ၂၀၁၈ ကြားဖြတ်ရွေး ကောက်ပွဲတွင် ရခိုင်အမျိုးသားပါတီကို အပြတ်အသတ်အနိုင်ရရှိခဲ့သည်။ 

နိုင်ငံရေးပါတီများ၏ ရခိုင်ရွေးကောက်ပွဲဝင်ပြိုင်မည့်အနေအထား 

ရခိုင်ပြည်နယ်ရှိ မြို့နယ် ၁၇ မြို့နယ်ရှိ မဲဆန္ဒနယ်အားလုံးတွင် ရွေးကောက်ပွဲကျင်းပနိုင်ရန် အဆင်သင့်ပြုလုပ် ထားပြီး တိုက်ပွဲဖြစ်ပွားနေသည့် ကျောက်တော်၊ မြောက်ဦး၊ မင်းပြား၊ ရသေ့တောင်၊ ပုဏ္ဏားကျွန်း၊ မြေပုံ စသည့် မြို့နယ်များတွင်မူ ရွေးကောက်ပွဲ ဖြစ်မဖြစ် မသိရသေးဟု ပြည်နယ်ရွေးကောက်ပွဲကော်မရှင်ခွဲရုံး တာဝန်ရှိသူများ က ပြောသည်။ 

ရခိုင်ပြည်နယ်တွင် မဲဆန္ဒနယ်စုစုပေါင်း ၆၃ ခုရှိပြီး ပြည်သူ့လွှတ်တော်နေရာ ၁၇ ခု၊ အမျိုးသားလွှတ်တော်နေရာ ၁၂ နှင့် ပြည်နယ်လွှတ်တော် ၃၄ နေရာရှိသည်။ 

အမျိုးသားဒီမိုကရေစီအဖွဲ့ချုပ်ပါတီက ရွေးကောက်ပွဲကိုယ်စားလှယ်လောင်းစာရင်းကို ဇူလိုင် ၂၃ ရက်က ထုတ်ပြန်ခဲ့ရာတွင် ရခိုင်ပြည်နယ်အတွင်း အမျိုးသားလွှတ်တော် ၅ နေရာ၊ ပြည်သူ့လွှတ်တော် ၂ နေရာနှင့် ပြည်နယ်လွှတ်တော် ၅ နေရာ ချန်လှပ်ထားသည်ကို တွေ့ရသည်။ 

အာဏာရပါတီက ချန်လှပ်ထားသည့် မဲဆန္ဒ နယ်မြေများမှာ ပုဏ္ဏားကျွန်း၊ ရသေ့တောင်၊ ကျောက်တော်၊ မင်းပြား၊ မြေပုံနှင့် မြောက်ဦးမြို့နယ်များဖြစ်ပြီး လတ်တလော တိုက်ပွဲဖြစ်ပွားနေသည့် နေရာများလည်း ဖြစ်သည်။ ကိုယ်စားပြုကိုယ်စားလှယ်လောင်း မရှိသည့်အတွက် အဆိုပါနေရာများတွင် လစ်လပ်နေခြင်း ဖြစ်ကြောင်း ပါတီတာဝန်ရှိသူများက ပြောကြားခဲ့သည်။ 

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီသည် ကိုယ်စားလှယ်လောင်းစာရင်း အတိအကျထုတ်ပြန်ခြင်း မရှိ သေးသော်လည်း ရခိုင်ပြည်နယ်ရှိ မဲဆန္ဒနယ်အားလုံးတွင် ဝင်ရောက်ယှဉ်ပြိုင် သွားမည်ဖြစ်ပြီး စုစုပေါင်း ၇ နေရာခန့် အနိုင်ရရှိလိမ့်မည်ဟု ပြည်နယ်ပါတီဥက္ကဋ္ဌ ဒေါက်တာစန်းရွှေက ပြောသည်။ 

“ပြိုင်ဆိုင်မှုက များလာမယ်။ များလာဖို့ဆိုတာက ANP ရှိတယ်။ ALD လည်းရှိတယ်။ ရခိုင်ပါတီ သုံးပါတီ လောက်ရှိတယ်။ NLD ကလည်း ဝင်ပြိုင်မယ်။ ရခိုင်ပါတီတွေအနေနဲ့ မဲကွဲနိုင်စရာရှိတယ်။ ကျွန်တော်တို့ ပြည်ခိုင်ဖြိုးပါတီအပေါ်မှာလည်း ပြည်သူလူထုရဲ့သဘောထားက မူတည်တယ်ပေါ့လေ” ဟု ၎င်းက ပြောသည်။ 

ပြီးခဲ့သည့်ရွေးကောက်ပွဲတွင် တစ်ပြည်နယ်လုံးအတိုင်းအတာဖြင့် အများဆုံးအနိုင်ရရှိထားသည့် ရခိုင်အမျိုးသား ပါတီ (ANP) သည် မဲဆန္ဒနယ်အားလုံးတွင် ဝင်ရောက်ယှဉ်ပြိုင်မည်ဖြစ်ပြီး ရခိုင်ဒီမိုကရေစီအဖွဲ့ချုပ်ပါတီ (ALD) က ရခိုင်ပြည်နယ်တောင်ပိုင်းကို အဓိကထားယှဉ်ပြိုင်မည်ဖြစ်သည်။ 

၂၀၂၀ ရွေးကောက်ပွဲတွင် ရခိုင်အမျိုးသားပါတီက ရခိုင်ပြည်နယ်ရှိ မဲဆန္ဒယ်နယ် ၆၃ ခုလုံးအတွင်း ဝင်ရောက် ယှဉ်ပြိုင်မည်ဖြစ်သည်။ လက်ရှိလွှတ်တော်ကိုယ်စားလှယ်အများစု ဝင်ရောက်ယှဉ်ပြိုင်တော့မည် မဟုတ်ဘဲ လူငယ်များကို ပွဲထုတ်လာသည်။ 

ရခိုင်အမျိုးသားပါတီ၏ လွှတ်တော်ကိုယ်စားလှယ်လောင်းစာရင်းအရ လူငယ် ၂၈ ဦးနှင့် အမျိုးသမီး ခုနစ်ဦး ပါဝင်သည်။ လက်ရှိ လွှတ်တော်ကိုယ်စားလှယ် ၂၅ ရာခိုင်နှုန်းသာပါဝင်ပြီး လူသစ် ၇၅ ရာခိုင်နှုန်းအထိပါဝင် နေသည့်အတွက် လူစိတ်ဝင်စားမှုလည်း မြင့်တက်နေသည်။ 

ရခိုင်အမျိုးသားပါတီသည် ပြည်နယ်မြောက်ပိုင်းနှင့် အလယ်ပိုင်းတွင် လူထုထောက်ခံမှုအားကောင်းသော်လည်း တောင်ပိုင်းတွင်မူ ထောက်ခံမှုနည်းပါးသည်။ ၂၀၁၅ ရွေးကောက်ပွဲတွင် ရှုံးနိမ့်ခဲ့သည့် ပြည်နည်တောင်ပိုင်းတွင် အနိုင်ရရှိရန် မျှော်မှန်းထားသည်ဟု ANP ပါတီဥက္ကဋ္ဌက ဆိုသည်။ 

“၂၀၁၅ ထက် ရခိုင်ပြည်နယ်မှာ ပိုပြီးနိုင်လာမယ်လို့ ယုံကြည်တယ်။ (ရခိုင်ပြည်နယ်တောင်ပိုင်းမှာ) ဒီချုပ်ပါတီ က ၂၀၁၅ မှာပဲ အနိုင်ရရှိခဲ့တာ။ ၂၀၂၀ မှာ အဲဒီမဲဆန္ဒနယ်တွေမှာ အဲဒီရလဒ်အတိုင်း ထွက်လာဖို့လို့ ကျွန်တော် မယူဆ။ ဒါကြောင့် ကျွန်တော်တို့ နိုင်နိုင်ခြေပိုများတယ်လို့ ပြောတာ”ဟု ပါတီဥက္ကဋ္ဌ ဦးသာထွန်းလှက ပြောသည်။

ရခိုင်ဒီမိုကရေစီအဖွဲ့ချုပ်ပါတီ (ALD) သည် ရခိုင်ပါတီများအနက် အမတ်နေရာအနည်းဆုံးယှဉ်ပြိုင်မည့် ပါတီဖြစ်သည်။ အင်အားအနည်းဆုံးဆိုသော်လည်း ထုတ်ပြန်ခဲ့သည့် ကိုယ်စားလှယ်လောင်းစာရင်းကြောင့် လူထု အာရုံစိုက်မှု ရရှိနေသည့်ပါတီလည်းဖြစ်သည်။ ဒေါ်အောင်ဆန်းစုကြည်၏ ကိုယ်ရေးအရာရှိဟောင်း ‌ဒေါက်တာ တင်မာအောင်သည် ALD ပါတီကိုယ်စားပြုကာ ပြည်နယ်လွှတ်တော်နေရာအတွက် တောင်ကုတ်မြို့နယ်မှ ဝင်ရောက်ယှဉ်ပြိုင်မည်ဖြစ်သည်။  

ဒေါက်တာတင်မာအောင်သည် လက်ရှိတွင် ဒေါက်တာ စောမြအောင်ဖောင်ဒေးရှင်း၏ အတွင်းရေးမှူးတာဝန်ကို ထမ်းဆောင်၍ ပညာရေး၊ဖွံ့ဖြိုးရေးလုပ်ငန်းများကို လုပ်ဆောင်နေသောကြောင့် ပြည်နယ်အတွင်း လူသိများသူ တစ်ယောက်လည်းဖြစ်သည်။ “ဝန်ကြီးချုပ်လောင်း” ဟုပင် ထင်ကြေးပေးမှုများလည်း ရှိနေသည်။ 

ALD ပါတီသည် ရခိုင်တောင်ပိုင်းမြို့နယ်များတွင် ထောက်ခံမှုပိုမိုရရှိမည်ဟု ယုံကြည်နေပြီး မာန်အောင်၊ ရမ်းဗြဲ နှင့် တောင်ကုတ်မြို့နယ်များတွင် လုံးဝအနိုင်ရရှိလိမ့်မည်ဟု မျှော်လင့်ထားသည်ဟု ပါတီပြောရေးဆိုခွင့်ရှိသူ ဦးလှမြင့်က ပြောသည်။

ဒေါက်တာအေးမောင်ဦးဆောင်သည့် ရခိုင့်ဦးဆောင်ပါတီ (AFP) သည် တောင်ကုတ်၊ ဂွနှင့် ကျောက်တော် သုံးမြို့နယ်မှလွဲ၍ ကျန် ၁၄ မြို့နယ်တွင် ကိုယ်စားလှယ်လောင်း ၄၂ ဦးဖြင့် ပါဝင်ယှဉ်ပြိုင်သွားမည်ဖြစ်ကြောင်း ယမန်နေ့ (ဩဂုတ် ၇) တွင် ထုတ်ပြန်ထားသည်။ 

အဆိုပါမြို့နယ်များရှိ မဲဆန္ဒနယ်များတွင် ပြည်နယ်လွှတ်တော် ၂၅ နေရာ၊ ပြည်သူ့လွှတ်တော် ၁၁ နေရာနှင့် အမျိုးသားလွှတ်တော် ၆ နေရာအတွက် ဝင်ရောက်ယှဉ်ပြိုင်မည်ဖြစ်ကြောင်း AFP ပါတီ၏ ထုတ်ပြန်ချက်က ဆိုသည်။

ရခိုင်ပြည်နယ်မြောက်ပိုင်းရှိ တိုက်ပွဲများ ပြင်းထန်းနေဆဲ မြို့နယ်များတွင် ရွေးကောက်ပွဲမပြုလုပ်နိုင်မည်ကို နိုင်ငံရေးပါတီများက စိုးရိမ်လျက်ရှိကြသည်။ 

ရွေးကောက်ပွဲကျင်းပမည်ဆိုလျှင် မိမိတို့နှင့်ညှိနှိုင်းရမည်ဟု ယခင်က ပြောကြားထားသော်လည်း လက်ရှိတွင် ထိုဆုံးဖြတ်ချက်ကို ပစ်ပယ်လိုက်ပြီဖြစ်ကာ ညှိနှိုင်းမှုမရှိပါကလည်း ရွေးကောက်ပွဲဖြစ် မြောက်ရေး ထိရောက် သည့် အပစ်အခတ်ရပ်စဲမှု လုပ်ပေးမည်ဟု AA စစ်ဦးစီးချုပ်ဗိုလ်ချုပ်ထွန်းမြတ်နိုင်က ဇူလိုင် ၁၂ က ပြုလုပ်ခဲ့ သည့် Chin Cabal Network Channel နှင့် အွန်လိုင်းတွေ့ဆုံမေးမြန်းခန်းတွင် ထည့်သွင်း ပြောကြားထား သည်။ 

“ဒါကတော့ မြန်နိုင်ငံဒီမိုကရေစီ ဖြစ်စဥ်ကို ယုံကြည်လွန်းအားကြီးလို့ ရွေးကောက်ပွဲကို အရမ်းမျှော်လင့်ထားလို့ မဟုတ်ဘူး။ ကိုယ့်အမြင်နဲ့ကိုယ် ဒီရွေးကောက်ပွဲကို  ဖြစ်မြောက်အောင်ရပ်တည်ပေးမယ်ဆိုတဲ့သဘောထားက ရွေးကောက်ပွဲမရှိရင် ပြည်သူတွေအတွက် ကိုယ်စားပြုပြီး စကားပြောဆိုပေးဖို့အတွက် ကိုယ်စားလှယ်တွေ မရှိဘဲ ဖြစ်မယ်။ ဒါဆိုရင် ပြည်သူတွေအတွက် ပိုပြီး အခြေအနေဆိုးသွားမယ်”ဟု ဗိုလ်ချုပ်ထွန်းမြတ်နိုင်က ပြောခဲ့သည်။ 

ရွေးကောက်ပွဲကာလတွင် ရခိုင်ပြည်နယ်အတွင်း တိုက်ပွဲရပ်တန့်ရန် အစီအစဥ်ရှိသလားဟု တပ်မတော်သ တင်းမှန်ပြန်ကြားရေးအဖွဲ့မှ ဗိုလ်ချုပ်ထွန်းထွန်းညီကို မေးမြန်းရာတွင် လိုအပ်သည့်နေရာက လွဲပြီး တခြားနေရာများတွင် အပစ်အခတ် ရပ်စဲထားသည်ဟု ၎င်းက ဇူလိုင် ၁၃ တွင် Myanmar Now ကို ပြောသည်။

“အပစ်အခတ်ရပ်စဲပေးထားတယ်။ လိုအပ်တဲ့နေရာတွေကလွဲပြီး အပစ်အခတ်ရပ်စဲပေးထားတယ်လေဗျ။ ရခိုင်ပြည်နယ်မှာ AA က ဘာလုပ်နေတုန်း၊ ငြိမ်ငြိမ်နေလို့လား” ဟုလည်း ဗိုလ်ချုပ်ထွန်းထွန်းညီက မေးခွန်း ထုတ်သည်။ 

ထိုသို့ တိုက်ပွဲဖြစ်ပွားနေလျှင် စိတ်ပိုင်းဆိုင်ရာ၊ ကိုယ်ပိုင်းဆိုင်ရာ မလုံခြုံသောကြောင့် မဲဆန္ဒရှင်ပြည်သူများအနေ ဖြင့် မဲစာရင်းသွားရောက်ကြည့်ရှုရန်ပင် အခက်အခဲရှိနိုင်ပြီး ရွေးကောက်ပွဲအပေါ် စိတ်မဝင်စားသည့် အခြေအ နေကို ဦးတည်သွားနိုင်သည်ဟု အမျိုးသားလွှတ်တော်ကိုယ်စားလှယ် ဒေါ်ထုမေက ပြောသည်။

“အဓိက ပြည်သူဘဝလုံခြုံရမယ်။ ရခိုင်ပြည်မှာရှိတဲ့ ပြည်သူတွေဟာ ခန္ဓာကိုယ်လုံခြုံမှု၊ စိတ်ပိုင်းဆိုင်ရာလုံခြုံမှု ရှိရမယ်။ လုံခြုံမှုမရှိရင် လွတ်လပ်ပြီးတရားမျှတတဲ့ ရွေးကောက်ပွဲ ကျင်းပဖို့ ခက်ခဲပါတယ်”ဟု ၎င်းက ဆိုသည်။

ဆက်လက်ဖြစ်ပွားနေသည့် တိုက်ပွဲများကြောင့် အရပ်သားသေဆုံးမှုနှင့် ဒဏ်ရာရရှိမှု နေ့စဉ်တိုးလာနေသည့် အပြင် ပြီးခဲ့သည့်ရွေးကောက်ပွဲများကြောင့် ပြည်နယ်အတွင်း သိသာသောအပြောင်းအလဲများ မပေါ်ထွက်ခဲ့ သည့်အတွက်လည်း ရွေးကောက်ပွဲအ‌ပေါ်  စိတ်ဝင်စားမှုလျော့နည်းလျက်ရှိသည်။ 

“ကျွန်တော်တော့ မဲမပေးဘူး ဆုံးဖြတ်ထားတယ်။ ဘာလို့လဲဆိုတော့ မဲပေးလိုက်ရင်လည်း သိပ်အကျိုးမရှိဘူး ထင်တယ်။ လွှတ်တော်အမတ်တွေ တက်လာတယ်။ သူတို့အဆိုတွေတင်ပေမယ့် ထိရောက်မှု မရှိဘူးလေ။ အထက်က ပယ်ချလိုက်တာနဲ့ ဘာမှအကျိုးမရှိဘူးလို့ မြင်တယ်” ဟု ပုဏ္ဏားကျွန်းမြို့မှ ကိုစိုးမိုးကျော်က ပြောသည်။

အခြေခံမဲဆန္ဒရှင်စာရင်းကို ဇူလိုင် ၂၅ တွင် စတင်ကြေညာခဲ့သော်လည်း ရခိုင်ပြည်နယ်တစ်ခုလုံးအတိုင်းအတာဖြင့် လာရောက်ကြည့်ရှုသူအရေအတွက် နည်းပါးသည်ဟု ပြည်နယ်ရွေးကောက်ပွဲကော်မရှင်က တာဝန်ရှိသူက ပြောသည်။ 

ရခိုင်ပြည်နယ်တွင် မဲပေးခွင့်ရှိသူ တစ်သန်းနှင့်ခြောက်သိန်းကျော်ရှိပြီး မဲရုံပေါင်း ၂၅၉၆ ရုံတွင် တပ်မဲရုံ ၆၀ ကျော်ရှိသည်ဟု ပြည်နယ်ရွေးကောက်ပွဲကော်မရှင်ခွဲ အတွင်းရေးမှူး ဦးသူရိန်ထွန်းက ပြောသည်။

တိုက်ပွဲကြောင့် နေရပ်စွန့်ခွာတိမ်းရှောင်နေရသည့် စစ်ဘေးရှောင်ဦးရေ နှစ်သိန်းကျော်ရှိနေပြီး လူနေထိုင်ခြင်း မရှိသည့် ကျေးရွာများတွင် မဲစာရင်းကပ်နိုင်ခြင်း မရှိပေ။ အစိုးရအသိအမှတ်ပြု စစ်ရှောင်စခန်းများတွင် မဲစာရင်းကပ်ထားသော်လည်း အခြားသော စခန်းများတွင် မဲစာရင်းကပ်ထားခြင်း မရှိပေ။ 

“အစိုးရအသိအမှတ်ပြုထားတဲ့ စခန်းတွေမှာကျတော့ အုပ်ချုပ်မှူးအဖွဲ့အစည်းနဲ့ စခန်းတာဝန်ခံနဲ့ ပြီးတော့ ဒီရွာက ဘယ်နှယောက်၊ ဟိုရွာက ဘယ်နှယောက် အတိအကျစာရင်းရှိတယ်ဆိုတော့ ကပ်ပေးလို့ အဆင်ပြေတာပေါ့။ တချို့စခန်းတွေ မှာကျတော့ အဲလိုမျိုးမရှိဘူးလေ။ လူဦးရေမသိ၊ တာဝန်ခံလည်းမသိတော့ သွားကပ်လို့မရဘူး။ ကပ်ရင် မဲစာရင်းတွေ ဖျက်ဆီးခံရမှာပေါ့ ”ဟု ဦးသူရိန်ထွန်းက ပြောသည်။