အာဏာသိမ်းပြီး သုံးနှစ်နီးပါးရှိလာချိန်တွင် ယခင်က အချိန်မရွေးဝယ်ယူနိုင်သည့် ဆန်နှင့် စားအုန်းဆီ စသည့် အခြေခံကုန်စည်များကိုပင် ပြည်သူလူထုက တိုးဝှေ့ကာ စီတန်းဝယ်ယူနေရသည့် အဖြစ်သို့ ဆိုက်ရောက်နေသည်။ အရပ်သားအစိုးရကို ဖြုတ်ချကာ အာဏာသိမ်းပြီးနောက် ဆန္ဒပြလျှင်ပင် သေနတ်ဖြင့် ပစ်နေရာ ကမ္ဘာ့နိုင်ငံများက စီးပွားရေး၊ ဘဏ္ဍာရေးပိတ်ဆို့မှုများ ချမှတ်နေသဖြင့် အမေရိကန်ဒေါ်လာ လက်ဝယ်ပြတ်လပ်နေသည့် စစ်ကောင်စီက မြန်မာကျပ်ငွေတန်ဖိုး ကျဆင်းနေခြင်းကို မထိန်းချုပ်နိုင်ခြင်းနှင့်အတူ ကုန်ဈေးနှုန်းသည်လည်း ကျွဲကူးရေပါ တက်မြဲတက်နေဆဲဖြစ်သည်။ စစ်ကောင်စီက ပြည်ထောင်စုကုန်ဈေးနှုန်းတည်ငြိမ်ရေးကော်မတီကို ဇူလိုင်လ ၂၇ ရက်တွင် ဖွဲ့စည်းပြီးနောက် အခြေခံစားသောက်ကုန်ဈေးနှုန်းများကို ထိန်းချုပ်ရန် ကြိုးစားနေသည်ဆိုသော်လည်း အနာနှင့် ဆေး လွဲနေသည့် ဟန်ပြလုပ်ရပ်သာဖြစ်နေသည်။
