ယမန်နေ့ (ဩဂုတ် ၁၀) တွင် စစ်ကောင်စီလေတပ်က ရှမ်းပြည်နယ်မြောက်ပိုင်း လားရှိုးမြို့နယ်အတွင်း တအာင်းအမျိုးသားလွတ်မြောက်ရေးတပ်မတော် (TNLA) နှင့် ကိုးကန့်တပ်မတော် (MNDAA) အခြေစိုက်စခန်းများကို တိုက်ခိုက်ခဲ့ကြောင်း သိရသည်။
လားရှိုးမြို့မှ ၁၀ မိုင်ခန့်အကွာ မိုင်းယော်တိုက်နယ်၊ နမ့်လောင်းကျေးရွာအနီး တပ်စွဲထားသည့် TNLA တပ်စခန်းတစ်ခုကို ယမန်နေ့ မွန်းလွဲ ၂ နာရီခန့်တွင် MI-35 တိုက်ခိုက်ရေးရဟတ်ယာဉ်တစ်စီး ရောက်လာပြီး မိနစ် ၂၀ ခန့် ပစ်ခတ်တိုက်ခိုက်ခဲ့သည်။
ထို့နောက် အမှတ် (၁၆) ခြေမြန်တပ်ရင်း၊ အမှတ် (၆၈) ခြေလျင်တပ်ရင်း ပူးပေါင်းတပ်က အဆိုပါ စခန်းအနီး ထိုးစစ်ဆင်လာရာ ညနေ ၆ နာရီအထိ ၄ နာရီကြာ တိုက်ပွဲ အပြင်းအထန်ဖြစ်ခဲ့ကြောင်း TNLA ၏ သတင်းနှင့် ပြန်ကြားရေးဌာနက ထုတ်ပြန်ထားသည်။
တိုက်ပွဲတွင် စစ်ကောင်စီတပ်ဘက်က ထိခိုက်သေဆုံးမှုများရှိပြီး စစ်ကူအင်အား ထပ်ဖြည့်နေကြောင်း သိရသည်။
ဩဂုတ် ၉ ရက်နေ့ကလည်း မြို့နယ်အတွင်း နမ့်လောင်းကျေးရွာအနီး မွန်းလွဲ ၁ နာရီခွဲမှ ညနေ ၅ နာရီအထိ တိုက်ပွဲအပြင်းအထန်ဖြစ်ခဲ့သေးသည်။
နမ့်လောင်းကျေးရွာ ဒေသခံများသည် တိုက်ပွဲများကြောင့် ယမန်နှစ်ကတည်းက ရွာလုံးကျွတ် တိမ်းရှောင်နေကြရကာ ယနေ့အထိ ကျေးရွာအတွင်း ပြန်လည်ဝင်ရောက်နေထိုင်သူ မရှိပေ။
အလားတူ မိုင်းယော်တိုက်နယ်သည် စစ်ကောင်စီ၏ အရှေ့မြောက်တိုင်းစစ်ဌာနချုပ်ရှိသော လားရှိုးမြို့နှင့် နီးကပ်သော်လည်း အင်အားကောင်းသော မြောက်ပိုင်းမဟာမိတ်ညီနောင် ၃ ဖွဲ့ TNLA, MNDAA, AA (ရက္ခိုင့်တပ်တော်) တို့အပြင် မြောက်ပိုင်းရှမ်းလက်နက်ကိုင်တပ် (SSPP/SSA) တို့ အခြေချလှုပ်ရှားပြီး မကြာခဏ တိုက်ပွဲများဖြစ်ပွားလေ့ရှိသည့် ဒေသလည်းဖြစ်သည်။
လားရှိုးမြို့အထွက် တိုးဂိတ်အကျော် ဟိုပိတ်ကျေးရွာအနီး ရှိနေသော MNDAA တပ်ဖွဲ့တစ်ဖွဲ့ကို ယမန်နေ့ ည ၇ နာရီခန့်တွင် စစ်ကောင်စီတပ်က မြေပြင်စစ်ကြောင်းနှင့်အတူ ရဟတ်ယာဉ်ဖြင့်ပါ ပစ်ခတ်တိုက်ခိုက်ခဲ့သည်ဟု ဒေသခံများထံမှ သိရသည်။
“လေယာဉ်အစိမ်းရောင်နဲ့ အရင်လာတာ… ရွာထဲတော့ မဟုတ်ဘူး။ တောထဲမှာ လက်နက်ကြီးတွေ ခဏခဏ ကြားနေရတယ်။ တိုက်ပွဲက တော်တော်ကြာတယ်။ ရွာထဲမှာ ထိခိုက်တာတော့ မရှိပါဘူး“ ဟု အမည်မဖော်လိုသည့် ဟိုပိတ်ကျေးရွာခံတစ်ဦးက ပြောသည်။
ယမန်နေ့ ည ၉ နာရီအထိ တိုက်ပွဲဖြစ်ပွားခဲ့ရာ နှစ်ဖက် ထိခိုက်သေဆုံးမှုအခြေအနေနှင့် ပတ်သက်ပြီး MNDAA ဘက်က တစ်စုံတစ်ရာ ထုတ်ပြန်ထားခြင်း မရှိသေးသလို ထိုအဖွဲ့၏ ပြောရေးဆိုခွင့်ရှိသူနှင့် အဆက်အသွယ် မရသေးပေ။
ယခုနှစ် နှစ်ဆန်းမှစတင်၍ ဟိုပိတ်ကျေးရွာအနီး MNDAA က လှုပ်ရှားမှုများရှိလာပြီးနောက် မကြာခဏဆိုသလို စစ်ကောင်စီက လေကြောင်းမှ တိုက်ခိုက်နေသည်ဟု ဒေသခံများက ဆိုသည်။
ဇူလိုင် ၁၈ တွင်လည်း လားရှိုးမြို့နယ် မန်ဂန်ရွာအနီး စစ်ကြောင်းထိုးလာသည့် စစ်ကောင်စီတပ်ကို MNDAA ၏ တိုင်းရင်းသားတပ်မဟာ (၆၁၁) က စောင့်ကြိုတိုက်ခိုက်ခဲ့၍ စစ်ကောင်စီဘက်မှ ၅ ဦး သေဆုံးခဲ့ကြောင်း MNDAA က ထုတ်ပြန်ခဲ့သည်။
၂၀၂၃ ခုနှစ် ဇွန်လမှစပြီး စစ်ကောင်စီက TNLA, MNDAA နှင့် ကချင်လွတ်လပ်ရေးတပ်မတော် (KIA) တပ်ဖွဲ့တို့ လှုပ်ရှားရာ ရှမ်းမြောက်ဒေသနေရာများကို ထိုးစစ်ဆင်မှုများ တိုးမြင့်လုပ်ဆောင်ခဲ့ရာ ဇူလိုင် နောက်ဆုံးပတ်မှ သြဂုတ် ပထမပတ်အထိ စစ်ကောင်စီ၏ လေကြောင်းနှင့် လက်နက်ကြီးပစ်ခတ်မှုများ၊ အုပ်စုဖွဲ့ အဓမ္မကျင့်မှုများကြောင့် ဒေသခံပြည်သူ ၅ ဦး သေဆုံးခဲ့ကာ ၉ ဦး ဒဏ်ရာရရှိခဲ့ကြောင်း ရှမ်းလူ့အခွင့်အရေးမဏ္ဍိုင်က ထုတ်ပြန်ထားသည်။
စစ်ကောင်စီ ထိုးစစ်ဆင်မှုများ ပြုလုပ်လာပါက တိုက်ပွဲများ ပြင်းထန်လာနိုင်ကြောင်း TNLA ၏ ပြောရေးဆိုခွင့်ရှိသူ ဒုဗိုလ်မှူးကြီးတားအိုက်ကျော်က Myanmar Now ကို ဩဂုတ် ၆ ရက်နေ့က ပြောထားသည်။
ဇူလိုင်၂၃ မှ ယမန်နေ့ သြဂုတ် ၁၀ အထိ စစ်တပ်နှင့် တိုက်ပွဲ ၁၁ ကြိမ် ဖြစ်ပွားခဲ့ပြီး စစ်ကောင်စီတပ်ဘက်မှ ၂၅ ဦး သေဆုံးကာ ၂၇ ဦး ထိခိုက်ဒဏ်ရာရှိခဲ့ကြောင်း TNLA က ထုတ်ပြန်ထားသည်။
တစ်နိုင်ငံလုံးအနှံ့ စစ်မျက်နှာပြင်ဖွင့်ထားသည့် စစ်ကောင်စီသည် တိုင်းရင်းသားလက်နက်ကိုင်အဖွဲ့များနှင့် ဆွေးနွေးရန် ကြိုးပမ်းခဲ့သည်။ သို့သော်လည်း KIA, ကရင်အမျိုးသားအစည်းအရုံး (KNU)၊ ကရင်နီတိုးတက်ရေးပါတီ (KNPP)၊ ချင်းအမျိုးသားတပ်ဦး (CNF) အပါအဝင် စစ်ကောင်စီနှင့် တိုက်ပွဲဖြစ်နေသူများက ဆွေးနွေးရန် ငြင်းဆန်ခဲ့ကြသည်။
မေလကုန်ခန့်က တရုတ်ဖိအားကြောင့် မြောက်ပိုင်း ၃ ဖွဲ့နှင့် စစ်ကောင်စီတို့ မိုင်းလားမြို့တွင် တွေ့ဆုံခဲ့ကြသော်လည်း သတ်မှတ်ရက်မတိုင်မီ ဆွေးနွေးပွဲ အဆုံးသတ်သွားသည်။
ထို့နောက် TNLA, MNDAA တို့နှင့် ရှမ်းမြောက်တွင် တိုက်ပွဲများပြင်းထန်လာသလို ယာယီအပစ်ရပ်ထားသည့် AA နှင့်လည်း စစ်ရေးတင်းမာနေသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
