လှေစီးဒုက္ခသည် ၁၀၆ ဦး စစ်တွေသို့ ပို့ဆောင်

ရန်ကုန်တိုင်းဒေသကြီး ကျောက်တန်းမြို့နယ် ရွှေမှော်ဝန်းခန်းမမှာ နှစ်ရက်ကြာ ထိန်းသိမ်းထားခဲ့တဲ့ လှေစီး ဒုက္ခသည် ၁၀၆ ဦးကို ဒီနေ့ မွန်းလွဲပိုင်းမှာ သာကေတမြို့နယ် ရှုခင်းသာရေတပ်စခန်းကနေ စစ်တွေကို ရေတပ် စစ်ရေယာဉ် နဲ့ ဒီနေ့မွန်းလွဲ ၂ နာရီခန့်က ပို့ဆောင်လိုက်ပြီလို့ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှ အဆင့်မြင့် အရာရှိကြီးတစ်ဦးက ပြောပါတယ်။

အဲ့ဒီ လှေစီးဒုက္ခသည်တွေက စစ်တွေမြို့ရှိ မွတ်စလင်ဒုက္ခသည်စခန်းတစ်ခုမှဖြစ်ပြီး မလေးရှားနိုင်ငံတွင် အလုပ်လုပ်ရမည်ဟုဆိုကာ ပွဲစားတစ်ဦးရဲ့စီစဉ်မှုနဲ့ ပြီးခဲ့တဲ့ လကုန်ပိုင်းက စက်လှေနဲ့ ထွက်ခွာ လာခဲ့တာဖြစ်ပြီး သွားတဲ့လမ်းကြောင်းမှားကာ ယခုလ ၁၆ ရက်နေ့မှာ ကျောက်တန်းမြို့နယ် သံတဲကျေးရွာအနီးသို့ရောက်ရှိလာတာဖြစ်ပါတယ်။

“ကျွန်တော်တို့ကတော့ ထောက်ပံ့ရေးတွေလုပ်ပေးလိုက်တယ်။ တပ်ကတော့ စီစဉ်ပေးတာပေါ့” ဟု လူကယ်ပြန် ဝန်ကြီးဌာန ဘေးအန္တရာယ် လျှော့ချရေးစီမံခန့်ခွဲမှု ဦးစီးဌာန ညွှန်ကြားရေးမှူးချုပ် ဒေါက်တာကိုကိုနိုင်က ဒီနေ့ နေ့လယ်ပိုင်းက Myanmar Now ကို ဖုန်းနဲ့ပြောပါတယ်။

ဒုက္ခသည်တွေကတော့ အမျိုးသား ၅၀၊ အမျိုးသမီး ၃၁ ဦး၊ ကလေးငယ် ၂၅ ဦး ပါဝင်ပြီး လမ်းခရီးတွင် တစ်ဦး သေဆုံးခဲ့ပါတယ်။

ရက်အနည်းငယ်ကြာ သွားရမယ့် စစ်တွေခရီးစဉ်အတွက် အစားအသောက်၊ အဝတ်အထည်နှင့် အသုံးအဆောင်များ ထောက်ပံ့ပေးလိုက်ပြီး ဒုက္ခသည်များကို စစ်တွေရှိ မည်သည့်နေရာတွင်ပြန်လည် နေရာချထားမည်ကို မသိသေးကြောင်း ဒေါက်တာကိုကိုနိုင်က ပြောပါတယ်။

ရိုက်ကူး/တည်းဖြတ် – ကေဇွန်နွေး (Myanmar Now)