ဘင်္ဂလားဒေ့ရှ်မှ ပြန်လာမည့်သူများအား ရခိုင်ဒေသတစ်ခုတည်းတွင် စုပြုံမထားရန် ရခိုင်လက်နက်ကိုင်အဖွဲ့ တိုက်တွန်း

“(ပြန်လာတဲ့သူတွေကို) မောင်တောဒေသ တစ်နေရာတည်းမှာ စုပြုံပြီး ချထားမယ်ဆိုရင်တော့ အချိန်မရွေး ပြဿနာဖြစ်နိုင်တယ်” ဟု ၁၉၆၇ ကတည်ထောင်ခဲ့သည့် မြန်မာ – အိန္ဒိယ နယ်စပ်အခြေစိုက် ရခိုင်လက်နက်ကိုင်အဖွဲ့ ALA ၏ နိုင်ငံရေးပါတီ ဖြစ်သည့် ALP ၏ ပြန်ကြားရေးဌာန ရုံးအဖွဲ့မှူး ဦးခိုင်မြင့်ခိုင်က ပြောသည်။

ပြီးခဲ့သည့်နှစ်က ရခိုင်ပြည်နယ်မြောက်ပိုင်း မငြိမ်မသက်မှုများကြောင့် နေရပ်စွန့်ခွာသွားခဲ့ရသူများအား မြန်မာနိုင်ငံမှ နိုဝင်ဘာလလယ်တွင် ပြန်လည်လက်ခံမည့် အစီအစဉ်ကို ယမန်နေ့က မြန်မာအစိုးရအရာရှိများက ထုတ်ဖော်ပြောပြီးနောက် ALP က ယင်းကဲ့သို့ တိုက်တွန်းခဲ့ခြင်းဖြစ်သည်။

နို်ဝင်ဘာ ၁၅ ရက်နေ့တွင် ပြန်လည်လက်ခံရေးအစီအစဉ်၏ ပထမခြေလှမ်းအဖြစ် လူ ၂၂၅၁ ကို တစ်ရက်လျှင် ၁၅၀ နှုန်းဖြင့် ရက်သတ္တပတ် ၂ ပတ်ကျော်ခန့်ကြာအောင် လက်ခံသွားရန် မြန်မာအစိုးရက စီစဉ်နေသည်။

ဒုတိယအသုတ်အဖြစ် လူ ၂၀၀၀ ကျော်ကို တောင်ပြိုလက်ဝဲကုန်းလမ်းကြောင်းမှ ခေါ်ယူသွားမည်ဖြစ်သည်။

အတိတ်က ဖြစ်ပွားခဲ့သည့် လူမျိုးရေးပဋိပက္ခများကို ထပ်မံမဖြစ်ပွားစေရန် ဒုက္ခသည်များနေရာချထားရေးတွင် အစိုးရအနေဖြင့် စနစ်တကျ တာဝန်ယူဆောင်ရွက်သင့်ကြောင်း ALP ပြောခွင့်ရအရာရှိက ဆိုသည်။

ဒုက္ခသည်အရေးတွင် ရခိုင်ပြည်လွတ်မြောက်ရေးပါတီ (ALP) အပါအဝင် အခြားရခိုင်နိုင်ငံရေးပါတီခေါင်းဆောင်များ၊ ရခိုင်အထင်ကရပုဂ္ဂိုလ်များနှင့် ဆွေးနွေးတိုင်ပင်ရန် ALP က အလိုရှိနေသည်။

နေရပ်စွန့်ခွာသူများကို ပြန်လည်လက်ခံရေးဆောင်ရွက်ရာတွင် ဗုဒ္ဓဘာသာဝင် ရခိုင်တိုင်းရင်းသားများ၏ စိုးရိမ်မှုကို နားလည်ကြောင်းနှင့် အစီအစဉ်မစခင်မှာပင် သက်ဆိုင်ရာ ပါတီခေါင်းဆောင်များ၊ ရခိုင်၊ မြို၊ သက်၊ ခမီ စသည့် အဖွဲ့ခေါင်းဆောင်များ၊ နိုင်ငံရေးအင်အားစုများ ဗုဒ္ဓဘာသာဘုန်းတော်ကြီးများကိုလည်း အလွတ်သဘောတွေ့ဆုံပြီး ရှင်းလင်းပြောကြားခဲ့ကြောင်း မြန်မာအစိုးရ ပြောရေးဆိုခွင့်ရှိသူ ဦးဇော်ဌေးက ယမန်နေ့က ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

ပြီးခဲ့သည့်နှစ် သြဂုတ်လတွင် မြန်မာလုံခြုံရေးတပ်များ၏ ကင်းစခန်းများကို အာရကန်ရိုဟင်ဂျာ ကယ်တင်ရေးတပ်မတော် (ARSA) ၏တိုက်ခိုက်မှုကို မြန်မာတပ်ဖွဲ့များက လက်တုံ့ပြန်ပြီးနောက် ဘင်္ဂလားဒေ့ရှ်နိုင်ငံဘက်သို့ လူသန်းဝက်ကျော် ထွက်ခွာသွားခဲ့ရသည်ဟု နိုင်ငံတကာအဖွဲ့အစည်းများက ခန့်မှန်းထားသည်။