အာဏာသိမ်းစစ်တပ်၏ လေကြောင်းတိုက်ခိုက်မှုကြောင့် လူပေါင်း ၁၀၀ ကျော် သေဆုံးခဲ့ရသည့် စစ်ကိုင်းတိုင်း၊ ကန့်ဘလူမြို့နယ် ပဇီကြီးရွာ၌ ယနေ့ (ဧပြီ ၁၃) အထိ ရုပ်အလောင်းများ ကောက်ယူရှင်းလင်းနေဆဲဖြစ်သည်။ လွန်ခဲ့သည့်နှစ်ရက် (ဧပြီ ၁၁) က ရွာအပြင်ဘက် တစ်နေရာ၌ ရာနှင့်ချီသော ရွာခံများ စုဝေးနေစဉ် စစ်ကောင်စီက တိုက်လေယာဉ်ဖြင့် ဗုံးနှစ်လုံးကြဲပြီးနောက် ရဟတ်ယာဉ်ဖြင့် အနီးကပ်လိုက်လံပစ်ခတ်ခဲ့ခြင်းဖြစ်သည်။ ထို့ပြင် ညနေပိုင်းတွင် အလောင်းကောက်နေသူများကို တိုက်လေယာဉ်ဖြင့် နောက်တစ်ကြိမ် ဗုံးကြဲတိုက်ခိုက်ခဲ့သည်။ ပြင်းထန်သော တိုက်ခိုက်မှုကြောင့် ဟိုတစ်စသည်တစ်စ ပြန့်ကျဲနေသော ရုပ်အလောင်းများနှင့် ခန္ဓာကိုယ်အပိုင်းအစများကို သုံးရက်တိုင် လိုက်လံကောက်ယူခဲ့ရသည်။ လေကြောင်းတိုက်ခိုက်မှုကြောင့် လူ ၁၆၅ ဦး သေဆုံးပြီး ထိုအထဲတွင် အမျိုးသမီး ၂၇ ဦး ပါဝင်ကြောင်းနှင့် သေဆုံးသူဦးရေ ယခုထက် ပိုများနိုင်ကြောင်း အမျိုးသားညီညွတ်ရေးအစိုးရ NUG က ယနေ့မွန်းလွဲပိုင်းတွင် ထုတ်ပြန်ထားသည်။
