၂၀၀၈ အခြေခံဥပဒေပြင်ဆင်ရေး ဥပဒေကြမ်းများကို ဆွေးနွေးရန် လွှတ်တော်ကိုယ်စားလှယ် ၂၈၂ ဦးက အမည်စာရင်းတင်သွင်းထားကြောင်း ပြည်ထောင်စုလွှတ်တော်၌ အဆို တင်သွင်းခဲ့သည့် အမျိုးသား လွှတ်တော်အမတ် ဦးအောင်ကြည်ညွန့်က Myanmar Now ကို အတည်ပြုသည်။
“တပ်မတော်ဘက်ကတော့ အကုန်လုံးနီးပါးပဲ၊ နှစ်ယောက်ပဲ ချန်ထားတယ်လို့သိရတယ်”ဟု ၎င်းက ပြောသည်။
ပြည်ထောင်စုလွှတ်တော်ရုံးထံမှ ရရှိသောစာရင်းများအရ အမျိုးသားဒီမိုကရေစီအဖွဲ့ချုပ်ပါတီ (NLD)မှ ၆၉ဦး၊ တိုင်းရင်းသားနှင့် အခြားပါတီများ၊ တစ်သီးပုဂ္ဂလ ၄၉ဦး ၊ တပ်မတော်သား ၁၆၄ ဦးဆွေးနွေးရန် အမည် စာရင်းတင်သွင်းထားခြင်းဖြစ်သည်။
“ဒီလောက်လူတွေများတာ ဒီနှစ်မကုန်ခင်ပြီးပါ့မလား ဆိုတာကတော့ (ပြည်ထောင်စုလွှတ်တော်) နာယက က စီမံ ခန့်ခွဲပါလိမ့်မယ်။ အားလုံးကို ပေးဆွေးနွေးမှာလား၊ တူတာတွေစုလိုက်မှာလား၊ တစ်ယောက်ကို အချိန်ဘယ်လောက်ပေးပြီး ဆွေးနွေးမှာလဲ စသဖြင့်ပေါ့” ဟု ဦးအောင်ကြည်ညွန့်က ရှင်းပြသည်။
အခြေခံဥပဒေပြင်ဆင်ရေးလုပ်ငန်းများ ဆောင်ရွက်ရန် ဦးအောင်ကြည်ညွန့် တင်သွင်းသည့်အဆို အတည်ဖြစ်ပြီး တစ်နှစ်ခန့်အကြာတွင် ပြည်ထောင်စုလွှတ်တော်၌ အခြေခံဥပဒေပြင်ဆင်ရေး ဥပဒေမူကြမ်း ခုနစ်ခု အထိ လက်ခံရရှိပြီးလည်းဖြစ်သည်။
NLD ဦးဆောင်သည့် ၄၅ ဦးပူးပေါင်းကော်မတီက ဥပဒေကြမ်း နှစ်ခု၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီနှင့် တပ်မတော်တို့က ဥပဒေကြမ်း ငါးခု တင်သွင်းထားခြင်းဖြစ်သည်။
အဆိုပါ ဥပဒေကြမ်းများတွင် ပါဝင်သည့် ပြင်ဆင်ရန်အဆိုပြု ပုဒ်မ စုစုပေါင်း ၁၄၂ ချက်အထိရှိနေပြီး ပြည်ထောင်စုလွှတ်တော်အတွင်း ၇၅ ရာခိုင်နှုန်းကျော် ထောက်ခံရုံဖြင့် ပြင်နိုင်မည့် ပုဒ်မများ၊ လူထုဆန္ဒခံယူပွဲပါ ကျင်းပအတည်ပြုရန် လိုအပ်သည့်ပုဒ်မများကို သီးခြားစီ ခွဲထုတ်၍ ဥပဒေကြမ်းနှစ်ခုအဖြစ် တင်သွင်းဆွေးနွေး ဆုံးဖြတ်ရန် နာယက ဦးတီခွန်မြတ်ကစီစဉ်ထားသည်။
လက်ရှိအချိန်တွင် အခြေခံဥပဒေပြင်ဆင်ရေး မည်သည့်နေ့ရက်၌ စတင်ဆွေးနွေးမည်နှင့် မည်သူတို့ ဆွေးနွေးရန်ရှိသည်ကို မသိရသေးပါ။
