ရခိုင်ပြည်နယ်နှင့် ချင်းပြည်နယ် နယ်စပ်၊ ပလက်ဝမြို့နယ်တွင် နိုဝင်ဘာ ၉ ရက်မှစ၍ ညမထွက်ရအမိန့် ပုဒ်မ ၁၄၄ ကို ပလက်ဝမြို့နယ် အထွေထွေအုပ်ချုပ်ရေးဦးစီးဌာနက ထုတ်ပြန်လိုက်သည်။
နှစ်လအထိ ကြာရှည်မည့် အဆိုပါအမိန့်ကြောင့် ပလက်ဝတွင် ည ၆ နာရီမှ မနက် ၆ နာရီအတွင်း ခွင့်ပြုချက်မရှိဘဲ အပြင်ထွက်ခွင့်ရမည်မဟုတ်တော့ပါ။
“အကြမ်းဖက်သောင်းကျန်းသူများက မိုင်းထောင်ဖောက်ခွဲခြင်း၊ ချောင်းမြောင်းတိုက်ခိုက်ခြင်းနှင့် အပြစ်မဲ့ ပြည်သူများအား တိုက်ခိုက်ခြင်းနှင့် ခေါ်ဆောင်ခြင်းများပြုလုပ်နေသောကြောင့်” ယခုကဲ့သို့ ညမထွက်ရအမိန့် ထုတ်ပြန်ရခြင်း ဖြစ်သည်ဟု ပလက်ဝမြို့နယ် အုပ်ချုပ်ရေးမှူး ကိုးအောင် ဆိုသူက လက်မှတ်ရေးထိုးထားသည့် ယင်းထုတ်ပြန်ချက်တွင်အကြောင်းပြထားသည်။
ယခင်က မြောက်ဦး၊ မင်းပြား၊ ကျောက်တော် နှင့် ပုဏ္ဏားကျွန်းမြို့များတွင်သာ ညမထွက်ရအမိန့် ထုတ်ပြန် ထားခဲ့ခြင်း ဖြစ်ပြီး ချင်းပြည်နယ် ပလက်ဝမြို့ မပါဝင်ခဲ့ဘဲ ယခုမှ စတင်ထုတ်ပြန်ခြင်း ဖြစ်သည်။
ပလက်ဝနှင့် ကျောက်တော်အကြား ဒေသများသည် ရက္ခိုင့်တပ်တော် AA လှုပ်ရှားနေသည့် နေရာများလည်း ဖြစ်သည်။ ၂၀၁၉ ခုနှစ် ဇန်နဝါရီလ ၃၁ မှ စက်တင်ဘာ ၁၄ အထိ ပလက်ဝမြို့နယ် မှ လူ ၈၂ ဦးကို AA က ဖမ်းသွားခဲ့ပြီး ပြန်မလွှတ်သေးဟု အောက်တိုဘာ ၃၁ တွင် သမ္မတရုံးက သတင်းထုတ်ပြန်သည်။
ဖမ်းဆီးခေါ်ဆောင်ခံရသူများ ပြန်လည်လွတ်မြောက်လာစေရေးအတွက် ချင်းပြည်နယ်အစိုးရအဖွဲ့က အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာနနှင့် သက်ဆိုင်ရာ ဝန်ကြီးဌာနများသို့ လိုအပ်သလို ကူညီဆောင်ရွက်ပေးနိုင်ရန် တင်ပြထားရှိကြောင်း တပ်မတော်ကာကွယ်ရေး ဦးစီးချုပ်ရုံးကို ကိုးကားပြီး အဆိုပါသတင်းတွင် ရေးသားထားသည်။
ပြီးခဲ့သည့် နိုဝင်ဘာ ၃ တွင်လည်းပလက်ဝမှပြန်လာသည့် NLD အမတ်နှင့် အိန္ဒိယနိုင်ငံသား ငါးဦးအပါအဝင် လူ ၁၀ ဦးကို AA က ဖမ်းဆီးခဲ့သေးသည်။ ဖမ်းခံရသူများအနက် အိန္ဒိယနိုင်ငံသားတစ်ဦး သေဆုံးသွားပြီးနောက် အခြားသူများကို ပြန်လွှတ်ပေးခဲ့သော်လည်း ပလက်ဝမြို့နယ် အမျိုးသားလွှတ်တော် NLD အမတ် ဦးဝှေ့တင်းကို ဆက်လက်ဖမ်းဆီးထားသည်။
