အလုပ်ရှင်နှင့် မကျေမလည်ဖြစ်ပြီးနောက် လှိုင်သာယာမြို့နယ်ရှိ ဂရိတ်ဝေါ ဖိနပ်စက်ရုံမှ စက်ရုံအလုပ်သမားတို့က ၄င်းတို့တောင်းဆိုချက်များ မရပါက ရန်ကုန်တိုင်းအစိုးရ ရုံးရှေ့ သပိတ်စခန်းဖွင့်ရန် ပြင်ဆင်နေမှုကို ရဲက ခွင့်မပြုဘဲ နေရပ်ပြန်ရန် ဖိအားပေးနေသည်။
ဇူလိုင်လကတည်းက လုပ်ငန်းခွင်သို့ ဝင်ခွင့်မရသည့် ၄င်းတို့၏ ပြဿနာကို ဖြေရှင်းပေးမည်ဟု ရန်ကုန်တိုင်းအစိုးရ အလုပ်သမားဝန်ကြီး ဦးဇော်အေးမောင်က ကတိကဝတ် ပြုခဲ့သော် လည်း အကြောင်းမပြန်သဖြင့် အစိုးရရုံးသို့ လာရောက်ခြင်းဖြစ်ကြောင်း အလုပ်သမားများက ဆိုသည်။
အစိုးရရုံးရှေ့ရောက် အလုပ်သမားများ၏ ကိုယ်စားလှယ်များကို ဝန်ကြီး ဦးဇော်အေးမောင်က လာမည့်နာရီပိုင်းအတွင်းတွင် လက်ခံတွေ့ဆုံရန် သဘောတူလိုက်ပြီး အပြန်အလှန်အားဖြင့် အလုပ်သမားများက အစိုးရရုံးအနီးမှ အခြားတစ်နေရာသို့ ထွက်ခွာပေးခဲ့ရသည်။
အလုပ်သမားများက ၄င်းတို့အား အလုပ်ပြန်ခန့်ရန်နှင့် ၄င်းတို့နစ်နာခဲ့သည့် အခွင့်အရေးများ ပြန်လည်ကုစားပေးရန် တောင်းဆိုထားသည်။
