မန္တလေးတိုင်း၊ ပြင်ဦးလွင်ခရိုင်၊ အုန်းချောကျေးရွာအနီး ဂျပန်လျှိုတွင် မေလ၂၆ရက်နေ့မနက်ပိုင်းက ကျောက်ထုတ်ရာမှ ပြိုကျမှုဖြစ်ရာ လူနှစ်ဦးသေဆုံးပြီး၊နှစ်ဦးဒဏ်ရာပြင်းထန်ကာ မန္တလေးအထွေထွေဆေးရုံကြီးသို့ တင်ပို့ကုသရာ ညပိုင်းတွင် တစ်ဦးထပ်မံသေဆုံးသွားကြောင်း မြို့နယ်မီးသတ်ဦးစီးမှူး ကိုနေမျိုးလင်းကပြောသည်။
“မနေ့ကနှစ်ဦးသေတယ်၊ နှစ်ဦးက ဒဏ်ရာပြင်းထန်လို့ မန္တလေးဆေးရုံကြီးပို့တယ်၊ ဆေးရုံမှာတစ်ဦး ထပ်သေသွားတယ်လို့ ကြားတယ်။ မနေ့ကကျောက်ပိနေသူတွေ ကျန်နေသေးတယ်ဆိုတာ မဟုတ်ပါဘူး။ တကယ်က လေးဦးထဲပါ”ဟု ၎င်းကရှင်းပြသည်။
အဆိုပါလုပ်ကွက်သည် ပုဂ္ဂလိကလုပ်ငန်းဖြစ်ပြီး၊ အခင်းဖြစ်ပွားချိန်တွင်ရှိနေသည့် လူဦးရေစာရင်းကိုကနဦးတွင် အတိအကျမသိရှိရ၍ ရှာဖွေမှုခက်ခဲခဲ့သည်ဟု ၎င်းကဆိုသည်။
“အစက ထော်လာဂျီအောက်မှာ ထော်လာဂျီမောင်းသမား ပိနေတယ်ဆိုပြီး ရှာကြတယ်။ တကယ်က ဖြစ်တဲ့လေးဦးထဲမှာ ထော်လာဂျီသမားပါတယ်။ အများအပြောနဲ့ အခြားသူတွေကျန်သေးတယ်ဆိုပြီးလည်း ထပ်ရှာကြတယ်”ဟု ၎င်းကဆိုသည်။
အဆိုပါကျောက်တုံးများ ပြိုကျမှုမှာ ၁၂ပေပတ်လည်ခန့်အထိ ပြိုဆင်းလာခြင်းဖြစ်ပြီး၊ တောင်ကို ဒေါက်ဖြတ်(တောင်အောက်ခြေကို ဖြတ်ထုတ်ပြီး ကျောက်ထုတ်ခြင်း)ပြီး ကျောက်ထုတ်ယူမှု လုပ်သဖြင့် မိုးရွာအပြီး ပြိုကျခြင်းဖြစ်သည်ဟု မီးသတ်ဌာနက သုံးသပ်သည်။
