အောက်တိုဘာ၂၉ ရက်နေ့က စစ်ကိုင်းတိုင်း၊ ခင်ဦးမြို့နယ်မှ ဒေသခံကာကွယ်ရေးအဖွဲ့ဝင် ၄ ဦး စစ်ကောင်စီတပ်နှင့် ထိပ်တိုက်တိုးပြီး သတ်ဖြတ်ခံရကြောင်း သိရသည်။
ထိုနေ့ နေ့ခင်းပိုင်း မြို့အရှေ့ဘက်ပျူစောထီးများ တပ်စွဲအခြေစိုက်ရာ မကျီးတုံကျေးရွာအနီး မိုင်းဖြင့် တိုက်ခိုက်ရန် ပြင်ဆင်နေချိန် ပစ်ခတ်ခံရခြင်း ဖြစ်သည်ဟု ဒေသအခြေစိုက် Khin U Dynamite Squad အဖွဲ့မှ တာဝန်ရှိသူ ကိုဂျပန်ကြီးက ဆိုသည်။
“သူတို့က စစ်ကြောင်းတစ်ခုကို လုပ်ဖို့ ကြိုးစားနေတဲ့အချိန် စစ်ကြောင်းရဲ့လှည့်ကင်းဖြစ်မယ် ထင်တယ်။ ထိပ်တိုက်တိုးပြီး ပစ်ခံလိုက်ရတာ” ဟု ၎င်းက ပြောသည်။
သေဆုံးသူများ၏ အမည်များကို ထုတ်ပြန်ခြင်းမပြုသော်လည်း အသက် ၂၀ ဝန်းကျင်လူငယ်များ ဖြစ်သည်၊ Khin U Dynamite Squad အဖွဲ့မှ ၃ ဦးနှင့် အခြားမဟာမိတ်အဖွဲ့မှ ၁ ဦးဖြစ်ကြောင်း သိရသည်။
ထိုလူငယ်များတွင် ပြန်လည်ခုခံပစ်ခတ်နိုင်သည့်လက်နက် မပါရှိကြောင်း ၎င်းက ဆိုသည်။
“ကျွန်တော်တို့အဖွဲ့က လက်နက်တပ်ဆင်ဖို့က အားနည်းတော့ ကိုယ့်ကိုယ်ကိုယ်ကာကွယ်ဖို့ ဘာမှ မပါဘူးဗျာ” ဟု ၎င်းက ပြောသည်။
ရုပ်အလောင်းများကို နောက်တစ်နေ့ညနေပိုင်းတွင် ကောက်ယူသင်္ဂြိုဟ်နိုင်ခဲ့သည်ဟု သိရသည်။
ခင်ဦးမြို့အရှေ့ဘက် ၃ မိုင်အကွာတွင် တည်ရှိသည့် မကျီးတုံရွာတွင် ပြည်သူ့စစ် ခေါ် အရပ်ဝတ် လက်နက်ကိုင်ပျူစောထီးများ အခြေစိုက်တပ်စွဲထားကြောင်း ဒေသတွင်းကာကွယ်ရေးအဖွဲ့များက ပြောသည်။
ခင်ဦးအခြေစိုက် Khin U-Dynamite Squad သည် NUG နှင့် ပူးပေါင်းဆောင်ရွက်နေသော ဒေသခံကာကွယ်ရေးအဖွဲ့ဖြစ်ပြီး သေနတ် ၄ လက်ဝယ်ယူရန် ကျပ် သိန်း ၄၀၀ နီးပါး လိမ်လည်ခံရသောကြောင့် မကြာသေးမီကမှ NUG ထံ တိုင်ကြားထားသည်။
စစ်ကောင်စီဝါဒဖြန့် လူမှုကွန်ရက်စာမျက်နှာများတွင် PDF နှင့် တိုက်ပွဲဖြစ်ပွားခဲ့ပြီး လက်လုပ်သေနတ် တစ်လက်၊ လက်လုပ်မိုင်းနှစ်လုံး၊ ဝါယာကြိုးနှစ်ခွေနှင့် ရုပ်အလောင်း ၄ လောင်း ရရှိကြောင်း ထုတ်ပြန်ထားသည်။
ခင်ဦးမြို့နယ်သည် စစ်အာဏာရှင်ဆန့်ကျင်ရေးကို လက်နက်ကိုင်ခုခံမှု အားကောင်းဆုံး မြို့နယ်များထဲတွင် ပါဝင်ပြီး ယခုနှစ် ဇန်နဝါရီမှ ဇွန်လကုန်ထိ တိုက်ပွဲပေါင်း ၁၄၀နှင့်အထက် ဖြစ်ပွားခဲ့ကြောင်း မြန်မာနိုင်ငံဆိုင်ရာ ကုလသမဂ္ဂအထူးအကြံပေးကောင်စီ SAC -M အဖွဲ့အစီရင်ခံစာတွင် ဖော်ပြထားသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
