တအန်းစစ်သမီး ၆ ဦး အဓမ္မကျင့် သတ်ဖြတ်ခံရသည်ဟု TNLA ပြော

(ရန်ကုန်) – ရှမ်းပြည်နယ်မြောက်ပိုင်း မန်တုံမြို့နယ်အတွင်း ပြီးခဲ့သည့်လက တပ်မတော်နှင့် ဖြစ်ပွားခဲ့သည့် တိုက်ပွဲတွင် ဖမ်းဆီးခံခဲ့ရသော ဆေးမှူးစစ်မေ ၆ ဦးသည် အဓမ္မကျင့် သတ်ဖြတ်ခံခဲ့ရကြောင်း တအန်းလွတ်မြောက်ရေး တပ်မတော် (TNLA) က သြဂုတ် ၆ ရက်နေ့တွင် ထုတ်ပြန်သည့် ကြေညာချက်တွင် စွပ်စွဲထားသည်။

တပ်မ(၈၈) လက်အောက်ခံ ခမရ – ၃ဝ၁ က ဖမ်းဆီးသွားခဲ့ကြောင်း၊ အဆိုပါလုပ်ရပ်သည် နိုင်ငံတကာစစ်ရာဇဝတ်မှု – ဂျီနီဗာ သဘောတူညီချက်စာချုပ်များကို ချိုးဖောက်ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။

ရုပ်အလောင်းများကို တိုက်ပွဲဖြစ်ပွားအပြီး သုံးရက်အကြာ ဇူလိုင် ၁၄ တွင် မန်တုံမြို့နယ် အွယ်လောကျေးရွာအနီး တူးဖော်တွေ့ရှိခဲ့သည်ဟု ဆိုသည်။

ဖမ်းဆီးခံရချိန်တွင် မလွေးမိုးမိုးအမည်ရှိ စစ်သမီးတစ်ဦး ခြေထောက်တွင် သေနတ်ဒဏ်ရာရပြီး စစ်မေ ၆ ဦးလုံး အသက်ရှင်လျက်ရှိနေသည်ဟု တိုက်ပွဲတွင် လွတ်မြောက်ခဲ့သူများအား ကိုးကားပြီး TNLA က ထုတ်ပြန်ထားသည်။

“ဒါက မုဒိမ်းမှုလည်းဖြစ်တယ်။ စစ်သုံ့ပန်းကိုလည်း ညှဉ်းပန်း နှိပ်စက် သတ်ဖြတ်တယ်။ ဒါက မြန်မာ့တပ်မတော်မှာ တာဝန်ရှိတယ် ” ဟု TNLA ၏ ပြောခွင့်ရ ဗိုလ်မှူးတာအိုက်ကျော်က ပြောသည်။

မျက်နှာအုပ်ပြီး ဖမ်းဆီးခေါ်ဆောင်ခံရစဉ်က ယူနီဖောင်းအပြည့်အစုံ ဝတ်ဆင်ထားကြကြောင်း၊ တူးဖော်တွေ့ရှိရသည့် ရုပ်အလောင်းနှစ်ခုမှာ ထဘီနှင့် ဖြစ်နေပြီး ရုပ်အလောင်း ၄ ခုတွင် ဘောင်းဘီဇစ်ပြုတ်ခြင်းကဲ့သို့သော မူမမှန်မှုများ တွေ့ရကြောင်း ထုတ်ပြန်ချက်က ဆိုသည်။

ရုပ်အလောင်းများကို စစ်ဆေးရာ လိင်အင်္ဂါတွင် သွေးစများ၊ ဒဏ်ရာများ၊ တစ်ရှူးစများ တွေ့ရှိသည်၊ ကျည်ဆန်ထိဒဏ်ရာ၊ ဓားဒဏ်ရာ၊ ရိုက်နှက်ခံထားရသည့် ဒဏ်ရာများ တွေ့ရသည်ဟုလည်း TNLA က စွပ်စွဲထားသည်။

ထိုစွပ်စွဲချက်များကို တပ်မတော်ဘက်က သြဂုတ် ၇ ညနေပိုင်းအထိ တရားဝင်တုံ့ပြန်ခြင်း မရှိသေးပါ။ အဆိုပါစွပ်စွဲချက်နှင့် ပတ်သက်ပြီး တပ်မတော်သတင်းမှန်ပြန်ကြားရေးမှ ဗိုလ်ချုပ်ထွန်းထွန်းညီကို ဖုန်းဖြင့် ဆက်သွယ်မေးမြန်း သော်လည်း အဆက်အသွယ်မရခဲ့ပါ။

သို့သော် တပ်မတော်ကာကွယ်ရေးဦးချုပ်ရုံး၏ ဇူလိုင် ၁၉ ရက်နေ့ သတင်းထုတ်ပြန်ချက်တစ်ခုတွင် TNLA နှင့် ဇူလိုင် ၁၁ တိုက်ပွဲအတွင်း ပြောက်ကျားယူနီဖောင်းဝတ် အမျိုးသားအလောင်း ၃ လောင်း၊ အမျိုးသမီးအလောင်း ၅ လောင်းတို့အား တွေ့ရှိသဖြင့် တိုက်ပွဲဖြစ်ပွားရာ အနီးတဝိုက်တွင် မြှုပ်နှံပေးခဲ့သည်ဟု ဖော်ပြထားသည်။

TNLA သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူညီချက်စာချုပ်တွင် လက်မှတ်ရေးထိုးခြင်း မရှိသေးပေ။

ရှမ်းပြည်နယ်အတွင်း တိုက်ပွဲအများအပြားတွင် ပါဝင်နေသည့် TNLA သည် မကြာသေးခင်က နေပြည်တော်တွင် ပြုလုပ်သည့် ပြည်ထောင်စုငြိမ်းချမ်းရေးညီလာခံ၊ ၂၁ ရာစုပင်လုံ တတိယအကြိမ်အစည်းအဝေးသို့ တက်ရောက်ခဲ့သည်။