လက်နက်ကိုင်ပဋိပက္ခတွေ ဆက်လက်ဖြစ်ပွားနေတဲ့ ကရင်နီ(ကယား)ပြည်နယ်က စစ်ရှောင်အမျိုးသမီးတွေအတွက် လုံခြုံရေးဆိုတာ တိုက်ပွဲအန္တရာယ်ကိုသာ ရှောင်ရတာ မဟုတ်တော့ပါဘူး။
ရေသွားခပ်တဲ့လမ်း၊ ထင်းသွားရှာတဲ့တော၊ ညအိပ်တဲ့ ယာယီတဲအိမ်အထိ နေ့စဉ်ဘဝရဲ့ နေရာတိုင်းမှာ မမြင်ရတဲ့ အန္တရာယ်တွေနဲ့ ရင်ဆိုင်နေကြရတယ်လို့ ကရင်နီ အမျိုးသမီးအရေး လှုပ်ရှားသူတွေက ပြောပါတယ်။
ယာယီစစ်ရှောင်စခန်းအများစုမှာ ခြံစည်းရိုး၊ မီးအလင်းရောင်၊ သီးသန့်ရေချိုးခန်းနဲ့ အိမ်သာလို အခြေခံလုံခြုံရေး အဆောက်အအုံတွေ မပြည့်စုံသေးပါဘူး။
ကရင်နီအမျိုးသမီးအစည်းအရုံး KNWO ရဲ့ စာရင်းအရ ၂၀၂၆ ခုနှစ် ဇန်နဝါရီကနေ ဇွန်လအထိ ခြောက်လအတွင်း ကျားမအခြေပြုအကြမ်းဖက်မှု အမှု ၃၆ မှုကို ဝန်ဆောင်မှုပေးခဲ့ပြီး ၂၀၂၁ ခုနှစ်ကနေ ၂၀၂၅ ခုနှစ်အထိ အမှု ၄၀၀ ကျော်ကို ကူညီခဲ့ပါတယ်။
အမျိုးသမီးအရေး လှုပ်ရှားသူတွေကတော့ လက်နက်ကိုင် ပဋိပက္ခတွေ ဆက်လက်ရှိနေသရွေ့ အမျိုးသမီးတွေရဲ့ လုံခြုံရေးအတွက် အကာအကွယ်ပေးရေး၊ တရားမျှတမှုရရှိရေးနဲ့ လုံခြုံတဲ့ ခိုလှုံရာတွေ ပိုမိုတိုးချဲ့ပေးဖို့ လိုအပ်နေတယ်လို့ ပြောပါတယ်။
ရိုက်ကူး၊ တင်ဆက် – မြတ်မိုးသူ
