အသက် ၂၇ နှစ်အရွယ် Broddy Indihood ဟာ ဂီတကို ချစ်မြတ်နိုးတဲ့ လူငယ်တစ်ဦးပါ။ အာဏာမသိမ်းခင်က သူငယ်ချင်းတွေနဲ့ ဂီတအဖွဲ့တစ်ခု ဖွဲ့စည်းပြီး ဂီတလမ်းကြောင်းကို အလေးအနက် လျှောက်လှမ်းဖို့ ပြင်ဆင်နေခဲ့ပေမယ့် ၂၀၂၁ ခုနှစ် စစ်အာဏာသိမ်းမှုက သူ့ရဲ့ အိပ်မက်တွေကို ရုတ်တရက် ပြောင်းလဲသွားစေခဲ့ပါတယ်။ ဆန္ဒပြလှုပ်ရှားမှုတွေမှာ ပါဝင်ရင်း ဖမ်းဆီးနှိပ်စက်ခံခဲ့ရသလို၊ မိတ်ဆွေတွေ သေဆုံးခဲ့ရတာနဲ့ အကျဉ်းချခံခဲ့ရတာတွေက သူ့ကို လက်နက်ကိုင်တော်လှန်ရေး လမ်းကြောင်းဆီ ရောက်ရှိသွားစေခဲ့ပါတယ်။
စစ်သင်တန်းတက်ပြီး ကရင်ပြည်နယ်အခြေစိုက် PDF တပ်ဖွဲ့တစ်ခုမှာ သတင်းပြန်ကြားရေးနဲ့ ရိုက်ကူးရေးတာဝန်ကို နှစ်နှစ်နီးပါး ထမ်းဆောင်ခဲ့တဲ့ Broddy ဟာ ရှေ့တန်းစစ်မြေပြင်တွေကို လိုက်လံမှတ်တမ်းတင်ရင်း ဂီတကိုလည်း မစွန့်လွှတ်ခဲ့ပါဘူး။ လေကြောင်းဗုံးကြဲမှုနဲ့ လက်နက်ကြီးပစ်ခတ်သံတွေကြားကပဲ သူ့သီချင်းတွေကို ဆက်လက် ဖန်တီးခဲ့ပြီး၊ သူ့ရဲ့ ဖန်တီးမှုတွေထဲမှာ စစ်ပွဲ၊ ဆုံးရှုံးမှုနဲ့ မျှော်လင့်ချက်တွေကို ထင်ဟပ်ဖော်ပြထားပါတယ်။
ကျန်းမာရေးအခြေအနေကြောင့် လက်နက်ကိုင်ဘဝကို စွန့်ခွာခဲ့ပေမယ့် တော်လှန်ရေးကိုတော့ ဂီတနဲ့ ဆက်လက်ပါဝင်နေဆဲလို့ Broddy က ဆိုပါတယ်။ လက်ရှိ ထိုင်းနိုင်ငံမှာ နေထိုင်ရင်း တော်လှန်ရေးရန်ပုံငွေပွဲတွေမှာ သီချင်းသီဆိုနေသလို၊ သူ့ရဲ့ သီချင်းစာသားတွေကလည်း စစ်အာဏာသိမ်းမှုအောက်မှာ ရှင်သန်ခဲ့ရတဲ့ လူငယ်တွေရဲ့ နာကျင်မှု၊ ယုံကြည်ချက်နဲ့ မျှော်လင့်ချက်တွေကို ဆက်လက် သယ်ဆောင်ပေးနေဆဲ ဖြစ်ပါတယ်။
ကိုလှိုင်း၊ မြတ်ကြီး/ Myanmar Now
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် https://myanmar-now.org/mm/members/ တွင် ကူညီနိုင်ပါသည်။
