ဘင်္ဂလားပင်လယ်အော်မှာ ဖြစ်ပေါ်နေတဲ့ မိုခါမုန်တိုင်းဟာ ပိုမိုအားကောင်းတဲ့ ဆိုင်ကလုန်းမုန်တိုင်းအဖြစ် ရောက်ရှိလာပြီလို့ မြန်မာ မို/ဇလဌာနနဲ့ နိုင်ငံတကာမိုးလေဝသထုတ်ပြန်ချက်တွေမှာ မေလ ၁၁ ရက်နေ့က အသီးသီး ထုတ်ပြန်ထားကြပါတယ်။
မုန်တိုင်းလမ်းကြောင်းနဲ့ မလွတ်တဲ့ ဒေသတွေနဲ့ ပင်လယ်ကမ်းရိုးတန်းမှာ နေထိုင်သူတွေအနေနဲ့ ဘေးလွတ်ရာကို တိမ်းရှောင်ကြဖို့ မိုးလေဝသနဲ့ ဇလဗေဒညွှန်ကြားမှုဦးစီးဌာနက ထုတ်ပြန်ထားပါတယ်။
ဆိုင်ကလုန်မုန်တိုင်း မိုခါ ဟာ လာမယ့် မေလ ၁၄ ရက်နေ့မှာ ရခိုင်ကမ်းရိုးတန်းကို ဖြတ်ကျော်မှာဖြစ်ပြီး မုန်တိုင်းပြင်းအား တိုက်ရိုက်ထိခိုက်နိုင်တဲ့ မြို့တွေဟာ စစ်တွေ၊ ကျောက်ဖြူ၊ သံတွဲနဲ့ ဂွမြို့တွေ ဖြစ်တယ်လို့ နိုင်ငံတကာမိုးလေဝသထုတ်ပြန်ချက်တွေကို ကိုးကားပြီး မိုးလေသဝခန့်မှန်းတွက်ချက်သူ ဦးဝင်းနိုင်က ပြောပါတယ်။
မုန်တိုင်းဟာ ရခိုင်ကမ်းရိုးတန်းကို ဝင်ရောက်ဖို့ ခန့်မှန်းထားတာကြောင့် ရခိုင်ပြည်နယ်မြောက်ပိုင်းက ပေါက်တော၊ မင်းပြား၊ မြေပုံ စတဲ့ မြို့နယ်တွေက ဒေသခံတွေ ထောင်နဲ့ချီပြီး ဘေးလွတ်ရာလို့ ယူဆရတဲ့ အမြင့်ပိုင်းကျေးရွာတွေနဲ့ မြို့ပေါ်တွေကို တိမ်းရှောင်နေကြပါတယ်။
ရက္ခိုင့်တပ်တော် (AA) အနေနဲ့လည်း မုန်တိုင်းအန္တရာယ် အဓိကကျရောက်နိုင်တဲ့ ကျေးရွာက ဒေသခံတွေကို မေလ ၁၀ ရက်နေ့က စတင်ပြီး ကူညီရွှေ့ပြောင်းပေးတာတွေ လုပ်နေတယ်လို့ AA ပြောခွင့်ရသူ ဦးခိုင်သုခက Myanmar Now ကို ပြောပါတယ်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
