မန္တလေးတိုင်း၊ ညောင်ဦးမြို့နယ်တွင် ပြည်သူ့ကာကွယ်ရေးတပ်ဖွဲ့ (PDF) ၏ စခန်းငယ်တစ်ခုကို စစ်ကောင်စီတပ်က ဝင်တိုက်စဉ် ထိုစခန်းတွင် ရှိနေသူ ၃ ဦး သေဆုံးပြီး ၆ ဦး အဖမ်းခံရသည်။
နိုဝင်ဘာ ၈ မနက်တွင် ယက်စမ်းကျေးရွာအနီးရှိ ယာတောကို စစ်ကောင်စီတပ်ဖွဲ့ဝင်များ သွားရောက် ပစ်ခတ်စီးနင်းခဲ့ခြင်းဖြစ်ကြောင်း ညောင်ဦး PDF တာဝန်ခံတစ်ဦးက ပြောသည်။
သေဆုံးသူများမှာ အမျိုးသားဒီမိုကရေစီအဖွဲ့ချုပ် (NLD) ညောင်ဦးမြို့နယ် အလုပ်အမှုဆောင်အဖွဲ့ဝင် အသက် ၄၂ နှစ်အရွယ် ဦးဇော်ဝင်းနိုင် (ခေါ်) ဦးဖိုးဇော်နှင့် အမည်စုံစမ်းဆဲ အမျိုးသား ၂ ဦးဖြစ်ကြောင်း၊ အဖမ်းခံရပြီးမှ သတ်ဖြတ်ခံရသည်ဟု သိရကြောင်း ၎င်းက ပြောပြသည်။
စစ်ကောင်စီတပ် ဖမ်းဆီးခေါ်ဆောင်သွားသူတို့မှာ ၄၂ နှစ်အရွယ် အမျိုးသမီးတစ်ဦး၊ ၃၈ နှစ်အရွယ် အမျိုးသမီးတစ်ဦးနှင့် အသက် ၄၀ ကျော်အရွယ် အမျိုးသား ၄ ဦး ဖြစ်သည်။
ထို ၆ ဦးသတင်း စုံစမ်း၍ မရသေးသလို စစ်ကောင်စီတပ်က မိသားစုဝင်များထံ အကြောင်းကြားခြင်း မရှိသေးကြောင်း ထိုတာဝန်ခံက ဆိုသည်။
လုံခြုံရေးအခြေအနေအရ ထိုနေ့က ဖြစ်စဉ်ကို အသေးစိတ်မပြောလိုကြောင်း ၎င်းက ဆိုသည်။
ဦးဇော်ဝင်းနိုင်၏ ဈာပနကို ၎င်းနေထိုင်ရာ အောက်ညဉ့်ကျေးရွာနေအိမ်၌ နိုဝင်ဘာ ၉ တွင် ပြုလုပ်နေစဉ် နာရေးလာသူ NLD ပါတီဝင် ၂ ဦးကိုလည်း အရပ်ဝတ်လက်နက်ကိုင်များက ဖမ်းဆီးသွားပြီး ပြန်မလွတ်သေးကြောင်း ၎င်းက ဆက်ပြောသည်။
စစ်ကောင်စီသည် ၎င်းတို့ဖမ်းဆီးရမိသောသူများကို စစ်ကြောရေးတွင် နှိပ်စက်စစ်ဆေးပြီး သေဆုံးသွားလျှင် မိသားစုထံ အလောင်းပင် ပြန်မပေးသည့် ဖြစ်စဉ်များ ရှိခဲ့သည်။
(လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့အကူအညီကို လိုအပ်နေပါတယ်။ ဒီနေရာကိုနှိပ်၍ လှူဒါန်းနိုင်ပါတယ်။)
