ထိုင်းနိုင်ငံ ဘန်ကောက်မြို့အနီးမှာရှိတဲ့ စာသင်ကျောင်းတစ်ကျောင်းမှာ ဒီနေ့မနက်ပိုင်းက ပစ်ခတ်မှုဖြစ်ပွားခဲ့ပြီး သေဆုံးသူ ၈ ဦး ရှိတယ်လို့ ထိုင်းရဲတပ်ဖွဲ့က ထုတ်ပြန်ပါတယ်။
ပစ်ခတ်မှုကို ကျူးလွန်တယ်လို့ ရဲတပ်ဖွဲ့က သံသယရှိသူဟာ လူငယ်တစ်ဦးဖြစ်ပြီး အဖိုးဖြစ်သူရဲ့ လက်နက်ကို အသုံးပြုပြီးတော့ ပစ်ခတ်ခဲ့တာလို့ ဆိုပါတယ်။ ဒီလူငယ်ဟာ အဖိုးနဲ့အဖွားဖြစ်သူတို့ကို အရင် ပစ်သတ်ခဲ့ပြီးတဲ့နောက် ဘန်ကောက်မြို့မြောက်ဘက် နွန်းထဘူရီခရိုင်ရှိ အထက်တန်းကျောင်းကို ရောက်လာပြီး ထပ်မံ ပစ်ခတ်ခဲ့တာလို့ AFP သတင်းတစ်ရပ်မှာ ဖော်ပြပါတယ်။
သေနတ်ပစ်ခတ်သူဟာ အဲ့ဒီကျောင်းမှာတက်နေတဲ့ ၉တန်းကျောင်းသား လူငယ်တစ်ဦး ဖြစ်တယ်လို့ ဖော်ထုတ်နိုင်ခဲ့ပြီး ၎င်းကိုယ်တိုင်လည်းသေဆုံးသွားပြီလို့ သက်ဆိုင်ရာ တာဝန်ရှိသူတွေကို ကိုးကားပြီး ဒေသတွင်း မီဒီယာတွေမှာ ဖော်ပြပါတယ်။
သတင်းအချို့မှာတော့ ရဲတပ်ဖွဲ့ဝင်တွေက သံသယရှိသူကို ပစ်ခတ်ဖမ်းဆီးခဲ့တာလို့ ဖော်ပြကြပြီ အချို့သတင်းတွေမှာတော့ ၎င်းဟာ မိမိကိုယ်ကို သေကြောင်းကြံစည်သွားတာဖြစ်တယ်လို့ ဖော်ပြကြပါတယ်။
