မန္တလေးတိုင်း၊ သပိတ်ကျင်းမြို့အနီး ဗဟိုပြု၍ အင်အားပြင်းထန်သော မြေငလျင်တစ်ခု ယနေ့ (ဇူလိုင် ၂၉) ညနေ ၃ နာရီ ၉ မိနစ်တွင် လှုပ်ခတ်ခဲ့ရာ ငလျင်ဒဏ်ကြောင့် စစ်ကိုင်းတိုင်း ရေဦးမြို့ရှိ မင်္ဂလာရာမပရိယတ္တိစာသင်တိုက်၊ အုတ်တံတိုင်းတွင် အခန်း ၁၀ ခန်း ပြိုကျပျက်စီးခဲ့သည်။
သပိတ်ကျင်းမြို့ အရှေ့တောင်ဘက် ၅ မိုင်ခန့်အကွာကို ဗဟိုပြု၍ ပြင်းအား ၆ ဒသမ ၃ ရှိ အင်အားပြင်းထန်သော မြေငလျင်လှုပ်ခတ်သွားကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်သည်။
မြေငလျင်သည် မြေအနက် ၁၀ ကီလိုမီတာ (၆ မိုင်ကျော်) တွင် ဗဟိုပြုလှုပ်ရှားခြင်းဖြစ်ပြီး၊ ပိုမိုဖျက်ဆီးနိုင်စွမ်းရှိပြီး အန္တရာယ်ပိုကြီးမားသော ဇောက်တိမ်ငလျင်အမျိုးအစားဖြစ်ကြောင်း ငလျင်ပညာရှင်များက ဆိုသည်။
အဆိုပါ ငလျင်လှုပ်ခတ်မှုကို မန္တလေးတိုင်း၊ စစ်ကိုင်းတိုင်း၊ ရှမ်းပြည်နယ်နှင့် မကွေးတိုင်းရှိ မြို့နယ်များတွင် သိရှိခံစားခဲ့ရပြီး စစ်ကိုင်းတိုင်း၊ ရေဦးမြို့ရှိ စာသင်တိုက်တွင် အုတ်ရိုးများပျက်စီးကြောင်း ကနီဦးသိရှိရခြင်းဖြစ်သည်။
မန္တလေးတိုင်းရှိ သပိတ်ကျင်း၊ ပြင်ဦးလွင်၊ နေပြည်တော်၊ ကျောက်ဆည်၊ မြင်းခြံ၊ မိတ္ထီလာ၊ မိုးကုတ်၊ စသည့်မြို့နယ်များ၊ စစ်ကိုင်းတိုင်းရှိ ရွှေဘို၊ မုံရွာ၊ ရေဦး၊ စစ်ကိုင်း၊ ချောင်းဦး၊ မင်းကင်း စသည့်မြို့နယ်များ၊ ရှမ်းပြည်နယ်ရှိ တောင်ကြီး၊ လားရှိုး၊ မိုးမိတ် စသောမြို့နယ်များတွင် ငလျင်လှုပ်ခတ်မှုကို သိရှိခဲ့ရကြောင်း ဒေသခံများထံမှ သိရသည်။
“အိမ်တောင်ပြိုတော့မယ့် အတိုင်းပဲ”ဟု မန္တလေးမြို့တွင် နေထိုင်သောအမျိုးသမီးတစ်ဦးက ပြောပြီး မန္တလေးမြို့ခံ အခြားသူတစ်ဦးကလည်း ၂၀၀၄ ဆူနာမီဖြစ်ခဲ့သော ငလျင်နောက်ပိုင်း အားအပြင်းဆုံးဟု ထင်ကြောင်း ပြောသည်။
မိုးဇလက ပြင်းအား ရစ်ချ်တာစကေး ၆ ဒသမ ၃ ရှိသည်ဟုဆိုသော်လည်း အမေရိကန်အခြေစိုက် USGS ကမူ မြေငလျင်သည် ရွှေဘိုမြို့အရှေ့မြောက်ဘက် ၄၆ ကီလိုမီတာ (၂၆ မိုင်ကျော်)ကို ဗဟိုပြု၍ အင်အား ရစ်ချ်တာစကေး ၅ ဒသမ ၅ ရှိ ငလျင်လှုပ်ခတ်ခဲ့ခြင်းဖြစ်ကြောင်း သတင်းထုတ်ပြန်သည်။ မြေငလျင်အနက်မှာ ၁၀ ကီလိုမီတာတွင် လှုပ်ရှားခဲ့ခြင်းဖြစ်ကြောင်း ဖော်ပြထားသည်။
မန္တလေးတိုင်း သပိတ်ကျင်းမြို့နယ်တွင် ၂၀၁၂ ခုနှစ် နိုဝင်ဘာ ၁၁ ရက်က ပြင်အား ရစ်ချ်တာစကေး ၆ ဒသမ ၈ အဆင့်ရှိ အင်အားပြင်းငလျင် လှုပ်ခတ်ခဲ့ရာ လူသေဆုံးမှုနှင့် ပျက်စီးဆုံးရှုံးမှုများ ရှိခဲ့သည်။
သပိတ်ကျင်းမြို့နယ်ကို ဗဟိုပြု၍ ယနေ့လှုပ်ခတ်သော ငလျင်ကြောင့် နောက်ဆက်တွဲ ထိခိုက်ပျက်စီးမှုများရှိမရှိ Myanmar Now က ဆက်လက်စုံစမ်းနေဆဲဖြစ်သည်။
