မန္တလေးတိုင်း၊ မိတ္ထီလာမြို့တွင် ဆူပူအောင်လှုံ့ဆော်မှု ပုဒ်မ ၅၀၅-က ဖြင့် ဖမ်းဝရမ်းထုတ်ခံထားရသည့် ဆန္ဒပြခေါင်းဆောင် ကိုအောင်ချစ်ကိုအပါအဝင် ၄ ဦးကို ယမန်နေ့ (ဇူလိုင် ၂၆) ည ၁၁ နာရီခန့်တွင် ရဲနှင့်စစ်သားများက ရိုက်နှက်ဖမ်းဆီးသွားသည်။
မိတ္ထီလာမြို့မစျေးကြီးအနီးရှိ နေအိမ်တစ်ခုတွင် အိမ်တံခါးကို ရိုက်ချိုးဖျက်ဆီးဝင်ရောက်ပြီး အကြမ်းဖက်ရိုက်နှက် ဖမ်းဆီးသွားခြင်းဖြစ်ရာ အသက်အန္တရာယ်စိုးရိမ်နေရကြောင်း၊ အသက် ၂၈ နှစ်အရွယ် ကိုအောင်ချစ်ကို၊ အခြားအမျိုးသား နှစ်ဦး၊ အမျိုးသမီးတစ်ဦးတို့ကို မိတ္ထီလာ တပ်မ ၉၉ တွင် စစ်ကြောရေးပြုလုပ်နေသည်ဟု ကြားသိရကြောင်း ကိုအောင်ချစ်ကို၏ ဦးလေးဖြစ်သူက ပြောသည်။
“သူ့အမေကတော့ သူ့သားသေပြီဆိုပြီး ငိုနေတယ်။ လူမဆန်လုပ်တာတွေ ရှေ့မှာရှိထားတော့ အလောင်း ဘယ်နေ့ထုတ်ရမလဲဆိုပြီး ငိုယိုနေတာ။ ခုထိတော့ မိသားစုက ဘာအဆက်အသွယ်မှမရသေးဘူး” ဟု ဦးလေးဖြစ်သူက ဆိုသည်။
လွန်ခဲ့သည့်တစ်လကျော်ကလည်း ကိုအောင်ချစ်ကိုတို့သားအမိနှစ်ဦး နေထိုင်သည့် မိတ္ထီလာမြို့၊ မြင်းကန်အုပ်စု၊ အိုင်ကျေးရွာနေအိမ်သို့ စစ်ကောင်စီတပ်များဝင်ရောက်စီးနင်းရာ သားအမိနှစ်ဦးလုံး ခြံကျော်၍ ထွက်ပြေးရပြီး အခြားနေရာသို့ တိမ်းရှောင်ခဲ့ရသည်။
တစ်လကျော်ကြာ တိမ်းရှောင်နေသည့် ကိုအောင်ချစ်ကိုသည် မိတ္ထီလာသို့ ပြန်လာရောက်လာပြီး တစ်ပတ်ကျော်အကြာတွင် ဖမ်းဆီးခံရခြင်းဖြစ်သည်ဟု ဦးလေးဖြစ်သူထံမှ သိရသည်။
“ပြန်ရောက်လာပြီး အာဇာနည်နေ့မှာ ဆန္ဒထွက်ပြတယ်၊ သူနေတဲ့နေရာကို နောက်ယောင်ခံရင်း ခြေရာခံမိသွားတာ” ဟု ဦးလေးဖြစ်သူက ဆက်ပြောသည်။
“စစ်တပ်က မတရားအာဏာသိမ်းတယ်။ သူတို့အုပ်ချုပ်မှုစနစ်ကို မကြိုက်လို့ ဆန္ဒပြကြတယ်။ ဒါကို အကြမ်းဖက်တယ်၊ ဖမ်းဆီးတယ်။ ကိုယ့်မိသားစုဝင်တစ်ယောက် အခုလိုဖြစ်တော့ ပိုဝမ်းနည်းတာပေါ့ဗျာ”
မန္တလေးတိုင်းအနှံ့အပြားတွင် ဆန္ဒပြစစ်ကြောင်းများအား စစ်ကောင်စီက အကြမ်းဖက်ဖြိုခွင်း၊ ဖမ်းဆီးနေပြီး မိတ္ထီလာတွင်လည်း ယင်းကဲ့သို့နှိမ်နင်းလေ့ရှိသောကြောင့် ယခုအခါ မြို့ခံကျောင်းသား၊ ပြည်သူ တက်ကြွသူများမှာ ပြောက်ကျားစနစ်ဖြင့်သာ ဆန္ဒပြနေရကြောင်း မိတ္ထီလာမြို့ခံများက ဆိုကြသည်။
ဧပြီလအတွင်းက အသက် ၃၇ နှစ်အရွယ် NLD တိုင်းအမတ် ဦးလွင်မောင်မောင်သည် ဧပြီ ၂၈ ညပိုင်း၌ မိတ္ထီလာစက်မှုဇုန်ရှိ ၎င်းနေအိမ်ရှိရာသို့ ခေတ္တပြန်လာစဉ် နာရီပိုင်းအတွင်း အဖမ်းခံခဲ့ရသည်။
ထိုသို့ ညအချိန် ဝင်ရောက်ဖမ်းဆီးမှုများကြောင့် မိတ္ထီလာမြို့နယ်မဲဆန္ဒနယ်မှ ဝင်ရောက်အရွေးခံခဲ့ရသော NLD ပါတီဝင် လွှတ်တော်ကိုယ်စားလှယ်အားလုံးသာမက NLD ပါတီဝန်းရံသူ မြို့မိမြို့ဖများ၊ ဆန္ဒပြပွဲခေါင်းဆောင်များ၊ တက်ကြွလှုပ်ရှားသူလူငယ်များအားလုံး လုံခြုံသည့်နေရာသို့ တိမ်းရှောင်နေထိုင်နေရသည်ဟု မြို့ခံများထံမှ သိရသည်။
မိတ္ထီလာမြို့သည် လေတပ်အပါအဝင် စစ်တပ်စခန်းများရှိပြီး စစ်တပ်၏ ကျောထောက်နောက်ခံပါတီဖြစ်သည့် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီအားကောင်းသည့် ဒေသဖြစ်သော်လည်း ပြီးခဲ့သည့် ၂၀၂၀ ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်ပါတီ (NLD) က အနိုင်ရခဲ့သည်။
