၂၀၂၁ ခုနှစ် စစ်အာဏာသိမ်းမှုအပြီး ရရာလက်နက်ဆွဲကိုင်တော်လှန်နေသူတို့ကို ရင်ဆိုင်ရာတွင် စစ်တပ်သည် လက်နက်အင်အား များစွာ သာလွန်သည့်အပြင် ပြည်သူ့ ဘဏ္ဍာငွေကို စိတ်ကြိုက်သုံးစွဲနေခြင်း၊ နိုင်ငံကြီးအချို့၏ အကူအညီ ရနေခြင်း စသည့် အားသာချက်များ ရှိနေလင့်ကစား အဆောင်ယတြာများကိုပါ ကျယ်ကျယ်ပြန့်ပြန့် အားကိုးနေဆဲဖြစ်ကြောင်း သက်သေအထောက်အထားများ ထွက်ပေါ်လာနေသည်။
ယခုနှစ် ဇွန်လဆန်းပိုင်းတွင် စစ်ကိုင်းတိုင်း၊ ပုလဲမြို့နယ်၊ ကန့်ဒေါင့်ရွာတိုက်ပွဲသို့ စစ်ကူသွားရောက်ပစ်ခတ်သည့် တိုက်ခိုက်ရေး ရဟတ်ယာဉ်တစ်စီး ပျက်ကျခဲ့သည်။ ထိုပျက်ကျခဲ့သည့် နေရာတွင် လေယာဉ်မောင်းသူ၏ ဦးထုပ်ကိုတွေ့ရပြီး ၂၄ ပစ္စည်း စက်ဝိုင်း ကပ်ထားသည်ကိုတွေ့ရသည်။
၂၄ ပစ္စည်းကို ရွတ်ဖတ်ခြင်း၊ ဆောင်ထားခြင်းဖြင့် ဘေးအန္တရာယ် ကင်းလွတ်နိုင်သည်ဟု အယူအဆရှိကြသည်။ သို့သော် ထိုဦးထုပ်ဆောင်းခဲ့သူ၏ ရုပ်အလောင်းမှာ တစ်စစီဖြစ်သွားခဲ့သည်။
လူသတ်၊ ပြည်သူ့အိမ်များကို မီးရှို့ဖျက်ဆီးသည့် စစ်သားတို့ ငရဲပြည်ရောက်မည်မဟုတ်၊ “ရဲသော်မသေ၊ သေသော်ငရဲမလား”ဟု အထက်က ဝါဒဖြန့်ထားဆဲဖြစ်သည်။ ဘာသာအသီးသီး၏ တားမြစ်ချက်ကိုပင် ပြောင်းပြန်လုပ်ကာ စစ်ဗိုလ်ချုပ်အဆက်ဆက် ဦးနှောက်ဆေးထားကြသည်။
စစ်ဆင်ရေးတစ်ခုရှိလာပါက တပ်ရင်းများ၏ အဝင်အထွက်တံခါးပေါက်များတွင် နေ့နာမ်များအလိုက် ပန်းအိုးထိုးရန် အမွှေးတိုင်နှင့် ဖယောင်းတိုင်များထွန်းရန်၊ တန်ခိုးကြီးဘုရား၊ နတ်နန်းနှင့် အစောင့်အရှောက်များကို သွားရောက် ပူဇော်ရန် စစ်ဆင်ရေးကွပ်ကဲမှုဌာနချုပ်နှင့် တိုင်းစစ်ဌာနချုပ်များက အမိန့်စာဖြင့် ညွှန်ကြားတတ်သည်။
နိုင်ငံအနှံ့တိုက်ပွဲများမှအစ ယခုနှစ်ကုန်ပိုင်း ကျင်းပရန်ပြင်ဆင်နေသည့် ရွေးကောက်ပွဲ အစီအစဉ်များအထိ စစ်တပ်၏ ခြေလှမ်းတိုင်းတွင် အစီအရင်ယတြာများ ရှိနေကြောင်း တော်လှန်ရေးတပ်ဖွဲ့ဝင်များ၊ အာဏာဖီဆန်ရေးလှုပ်ရှားမှု(CDM)တွင် ပါဝင်သည့် စစ်အရာရှိများက ဆိုသည်။
ဆောင်းပါး၊ အောင်နိုင်၊ တင်ဆက် – ဟန်လင်း
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် https://myanmar-now.org/mm/members/ တွင် ကူညီနိုင်ပါသည်။
