ပြည်သူများကို နေ့စဉ်တိုက်ခိုက်ရာတွင် သုံးသည့် လေတပ်သုံးဗုံးများ ထုတ်လုပ်နိုင်ရန် အရေးပါသည့် အကူအညီများမှာ တရုတ်အစိုးရကုမ္ပဏီတို့ထံမှ လာကြောင်း ကုလသမဂ္ဂ ကျွမ်းကျင်သူများက ဆိုသည်။
ထိုသို့ လေကြောင်းတိုက်ခိုက်မှုများ စဉ်ဆက်မပြတ်ပြုလုပ်ရာတွင် ကပစ ၂၁ သည် စစ်တပ်၏ အားကိုးရသော စက်ရုံတစ်ရုံဖြစ်သည်။
ကပစ ၂၁ သည် မကွေးတိုင်း ဆိပ်ဖြူမြို့နှင့် မိုင် ၃၀ ခန့်ရှိ ပေါက်ခုံရွာနှင့် ငှက်ပြာကြီးရွာအနီးတွင် ရှိပြီး ၂၀၀၄မှ၂၀၀၆ခုနှစ်အတွင်း တည်ဆောက်ခဲ့သည့် စက်ရုံဖြစ်သည်။ ထိုစက်ရုံတွင် စစ်တပ်အရာရှိ ၁၅၀ နှင့် ဝန်ထမ်း ၁၂၀၀ နီးပါးက လက်နက်များထုတ်လုပ်နိုင်ရန် နေ့စဉ်လုပ်ကိုင်ပေးနေသည်။
ကပစ ၂၁ အပါအဝင် စစ်တပ်၏ အသက်သွေးကြော လက်နက်ထုတ်စက်ရုံ ၂၅ ခုမှာ လူနေကျဲပြီး တောတောင်ထူထပ်သည့်နေရာများတွင် တည်ဆောက်ထားသည်။ ထိုနေရာများကို တော်လှန်ရေးအင်အားစုများက တိုက်ခိုက်သိမ်းပိုက်ရန် ခက်ခဲနိုင်သော်လည်း အခြေအနေမှာ အချိန်မရွေး ပြောင်းလဲသွားနိုင်သည်ဟု မြန်မာနိုင်ငံဆိုင်ရာ အထူးအကြံပေးကောင်စီ (SAC-M)က ဆိုသည်။
