အခုနှစ်အတွင်း စစ်တပ်ဟာ နေရာအချို့မှာ စစ်ရေးအရ အသာစီးရလာပြီး တော်လှန်ရေးတပ်တွေသိမ်းထားတဲ့ လားရှိုး၊ နောင်ချို၊ သပိတ်ကျင်း၊ မိုးဗြဲ၊ ဒီးမော့ဆို စတဲ့မြို့တွေကို ပြန်လည်ထိန်းချုပ်လာနိုင်ပါတယ်။
စစ်တပ်က စစ်ရေးအောင်မြင်မှုတချို့ပြန်ရလာတဲ့ အကြောင်းအရင်းတွေကို ပိုမိုသိရှိနိုင်ဖို့ တအာင်းတပ် TNLA ၊ သက်တမ်းရင့် ကရင့်လက်နက်ကိုင် KNU ၊ ကရင်နီအမျိုးသားများကာကွယ်ရေးတပ် KNDF နဲ့ မန္တလေးတိုင်းထဲမှာ စစ်ရေးလှုပ်ရှားတဲ့ တော်လှန်ရေးတပ်တွေက အဆင့်မြင့်တာဝန်ယူထားတဲ့ သတင်းရင်းမြစ်တွေကို Myanmar Now က ဆက်သွယ်မေးမြန်းခဲ့ပါတယ်။
တော်လှန်ရေးသတင်းရင်းမြစ်တွေ ပြန်ဖြေတဲ့ အချက်တွေထဲမှာ တူညီတဲ့ အချက် ၅ ချက်ကို တွေ့ရပါတယ်။
အဲ့ဒါတွေကတော့ လက်နက်အတွက် လိုအပ်တဲ့ ခဲယမ်းမလုံလောက်မှု၊ မြောက်ပိုင်းမဟာမိတ်အဖွဲ့တွေကို တရုတ်က ဖိအားပေးမှု၊ စစ်တပ်ရဲ့ စစ်ရေးဗျူဟာအပြောင်းအလဲနဲ့ အင်အားသာလွန်မှု၊ တော်လှန်ရေးတပ်အချင်းချင်း မညီညွတ်မှုနဲ့ နယ်မြေအငြင်းပွားမှု၊ ကျယ်ပြောလာတဲ့ ထိန်းချုပ်နယ်မြေအတွက် တော်လှန်ရေးတပ်တွေ တပ်ဖြန့်ထားရမှု စတဲ့အချက်တွေပဲ ဖြစ်ပါတယ်။
စောရယ်/ Myanmar Now
