အမေရိကန်နိုင်ငံခြားရေးဝန်ကြီး အန်တိုနီဘလင်ကန်နှင့် အိန္ဒိယပြည်ပရေးရာဝန်ကြီး အက်စ်ဂျိုင်ရှန်ကာတို့ ယမန်နေ့ (ဧပြီ ၁၉) တွင် ဖုန်းဖြင့် ဆွေးနွေးခဲ့ရာ၌ မြန်မာနိုင်ငံတွင် ဒီမိုကရေစီပြန်လည်အသက်သွင်းရန် ထောက်ခံကြောင်း ထည့်သွင်းဆွေးနွေးခဲ့ကြသည်။
အမေရိကန်နှင့် အိန္ဒိယ နှစ်နိုင်ငံနိုင်ငံခြားရေးဝန်ကြီးများသည် မြန်မာနိုင်ငံတွင် ဒီမိုကရေစီပြန်လည်ဖော်ဆောင်ရေး ထောက်ခံကြောင်း ထည့်သွင်းဆွေးနွေးခဲ့ကြသည့်အပြင် ဒီမိုကရေစီတန်ဖိုးများနှင့် ပတ်သက်၍ တူညီသော ကတိကဝတ်များကို ထပ်လောင်းအတည်ပြုခဲ့ကြကြောင်းလည်း အမေရိကန်အာရှပစိဖိတ်ဌာနက သတင်းထုတ်ပြန်သည်။
ထို့အပြင် ဒေသတွင်းလုံခြုံရေးအတွက် နှစ်နိုင်ငံပူးပေါင်းဆောင်ရွက်ရေးကိစ္စများ ဆွေးနွေးခဲ့ကြောင်း အဆိုပါ ထုတ်ပြန်ချက်တွင် ဖော်ပြထားသည်။
အမေရိကန်နှင့် အိန္ဒိယနိုင်ငံတို့သည့် အာရှနေတိုးဟု ခေါ်သော QUAD အဖွဲ့ဝင် မဟာမိတ်နိုင်ငံများဖြစ်ပြီး မြန်မာနိုင်ငံတွင် စစ်အုပ်စုက အာဏာသိမ်းမှုကို ကန့်ကွက်ကာ ဖမ်းဆီးထားသော ခေါင်းဆောင်များ ပြန်လွှတ်ပေးရန်နှင့် မြန်မာနိုင်ငံတွင် ဒီမိုကရေစီ ပြန်လည်အသက်သွင်းရေးအတွက် ဝိုင်းဝန်းဖိအားပေးကူညီကြရန်လည်း အဖွဲ့ဝင်လေးနိုင်ငံခေါင်းဆောင်များက ကတိပြုထားသည်။
ဧပြီ ၁၆ ရက်က အမေရိကန်သမ္မတ ဂျိုးဘိုင်ဒင်နှင့် ဂျပန်ဝန်ကြီးချုပ် ဆူဂါယိုရှီဟိဒဲကိုတို့ ဝါရှင်တန်တွင် တွေ့ဆုံဆွေးနွေးအပြီး ပူးတွဲထုတ်ပြန်ရာတွင်လည်း “မြန်မာစစ်တပ်နဲ့ ရဲတွေရဲ့ အရပ်သားပြည်သူတွေအပေါ် အကြမ်းဖက်မှုကျူးလွန်တာတွေကို မိမိတို့ ပြင်းပြင်းထန်အထန် ကန့်ကွက်ရှုတ်ချပါတယ်။ အကြမ်းဖက်မှုတွေ ချက်ချင်းရပ်တန့်ရေး၊ ဖမ်းဆီးထားသူတွေအားလုံးကို ပြန်လွှတ်ပေးရေးနဲ့ ဒီမိုကရေစီ အမြန်ဆုံးပြန်လည်အသက်သွင်းရေး ဆက်လက်ဖိအားပေး အရေးယူဖို့ မိမိတို့က ကတိပြုပါတယ်” ဟု ကတိပြုခဲ့သည်။
