တော်လှန်ရေးကာလ ၄နှစ်ကျော်အတွင်း ပြည်သူလူထုရဲ့ ကြံ့ကြံ့ခံရပ်တည်မှုဟာ မြန်မာပြည်မှာ စစ်အာဏာရှင်စနစ်အပါအဝင် ဘယ်လိုအာဏာရှင်မျိုးမဆို ဘယ်သောအခါမှ နေရာမရှိစေရဆိုတဲ့ သတင်းစကားပေးနိုင်ခဲ့ပြီလို့ အမျိုးသားညီညွတ်ရေးအစိုးရ၊ နိုင်ငံခြားရေးဝန်ကြီး ဒေါ်ဇင်မာအောင်က ပြောပါတယ်။
တိုင်းပြည်အတွက် အနာဂတ်ရှိတဲ့ တော်လှန်ရေးဟာ နိုင်ကိုနိုင်ရမယ်ဆိုတဲ့ မျှော်လင့်ချက်တွေနဲ့ လက်ရှိတာဝန်တွေကို ထမ်းဆောင်နေတာလို့ ဒေါ်ဇင်မာအောင်က ပြောပါတယ်။
အသက် ၄၉နှစ်အရွယ် ဒေါ်ဇင်မာအောင်ဟာ ဒီမိုကရေစီရေး တက်ကြွလှုပ်ရှားသူ၊ နိုင်ငံရေးအကျဉ်းသားဟောင်းတစ်ဦးဖြစ်ပြီး၊ ၂၀၁၅နဲ့ ၂၀၂၀ ရွေးကောက်ပွဲ နှစ်ကြိမ်တိုင် ရန်ကုန်တိုင်း၊ ရန်ကင်းမြို့နယ်ကနေ အမျိုးသားဒီမိုကရေစီအဖွဲ့ချုပ် NLD ပါတီ ကိုယ်စားပြု အနိုင်ရခဲ့သူ ဖြစ်ပါတယ်။
၂၀၂၁၊ ဖေဖော်ဝါရီ ၁ရက်နေ့ စစ်အာဏာသိမ်းပြီးတဲ့နောက် လပိုင်းအကြာမှာ ပေါ်ပေါက်လာတဲ့ ကြားကာလ အမျိုးသားညီညွတ်ရေးအစိုးရ NUG မှာ ဒေါ်ဇင်မာအောင်က နိုင်ငံခြားရေးဝန်ကြီးအဖြစ် လက်ရှိ တာဝန်ယူထားပါတယ်။
အမေရိကန်သမ္မတ အပြောင်းအလဲနဲ့အတူ ကမ္ဘာ့နိုင်ငံရေးအခင်းအကျင်း ပြောင်းလဲမှုနဲ့ အိမ်နီးချင်း တရုတ်နိုင်ငံတို့ရဲ့ ရပ်တည်မှုတွေဟာ မြန်မာ့နွေဦးတော်လှန်ရေးအတွက် ဘယ်လောက်ထိ ရိုက်ခတ်မှု ကြီးမားပါသလဲ၊ ဒီအကြောင်းအရာတွေနဲ့ ပတ်သက်ပြီး ဒေါ်ဇင်မာအောင် ကို ဆက်သွယ်မေးမြန်းထားပါတယ်။
မေးမြန်း – မျိုးသန့်
